گه‌ڕان

Shadow Shadow
چیرۆكه‌كانمان

لەسەر دۆسیەی دزینی پارەی كارمەندانی نەخۆشخانەكە

لێكۆڵینەوە لەژمارەیەك لەكارمەندانی نەخۆشخانەی شار دەكرێت

2019.03.13 - 14:39


ناس كورد- شۆڕش محەمەد
ژمارەیەك لەكارمەندی نەخۆشخانەی شار بەهۆی دۆسیەی دزینی مووچەی كارمەندەكانی نەخۆشخانەكە لەلایەن هێزە ئەمنییەكانی شاری سلێمانییەوە براوون بۆ لێكۆڵینەوە.

دزینی مووچەی كارمەندانی نەخۆشخانەی شار لەسلێمانی كاردانەوەیەكی زۆری لەنێو تۆڕە كۆمەڵایەتییەكان لێكەوتەوە‌و لەمیانەی ئەنجامدانی كۆنگرەیەكی رۆژنامەوانیدا كە پەیامنێری ناس كورد- ئامادەی بوو، سەباح هەورامی بەڕێوەبەری گشتی تەندروستی سلێمانی لە كۆنفرانسێكی ڕۆژنامەنوسیدا ڕایگەیاند"تەواوی پارە دزراوەكەی نەخۆشخانەی شارمان ڕادەستكراوە و ئەمڕۆ (چوارشەممە) بەسەر كارمەندانی نەخۆشخانەكەدا دابەش دەكرێت".

بەڕێوەبەری گشتی تەندروستی سلێمانی بانگێشتكردنی كارمەندەكانی نەخۆشخانەی شار بۆ لێكۆڵینەوە لەلایەن هێزە ئەمنییەكانەوە بە كارێكی ئاسایی دەزانێت‌و دەڵێ‌ "ئەوە رێكارێكی ئەمنییەوە‌و ناتوانین قسەی لەبارەوە بكەین".

دوێنێ‌ (سێشەممە) لەنزیك شەقامی ئیبراهیم پاشا لەشاری سلێمانی، لەلایەن چەند چەكدارێكی نەناسراوەوە هێرشكرایە سەر ئەو تیمەی كە مووچەی كارمەندانی نەخۆشخانەی شاری لەبانكەوە دەگواستەوە‌و كۆی ئەو پارەیەیان دزی كە مووچەی بێ‌ پاشەكەوتی كارمەندانی نەخۆشخانەكە بوو‌و لەدوای تێپەڕبوونی 15 سەعات بەسەر رووداوەكە لەلایەن هێزە ئەمنییەكانی سلێمانییەوە تەواوی پارەكە كە ملیارێك‌و 200 ملیۆن دینار بوو دۆزرایەوە‌و باندێكی 7 كەسی بەتۆمەتی دزینی دەستگیركران.