گه‌ڕان

Shadow Shadow
سیاسه‌تی

’’پێکەوەیی یان ماڵجیایی’’

راپۆرتێک: لەچەند کاتژمێری داهاتوودا پارتى و یەکێتى بڕیار لەسەر کێبڕکێی سەرۆک کۆمار دەدەن

2022.02.11 - 15:42
App store icon Play store icon Play store icon
راپۆرتێک: لەچەند کاتژمێری داهاتوودا پارتى و یەکێتى بڕیار لەسەر کێبڕکێی سەرۆک کۆمار دەدەن

ناس کورد-

 

سەرباری گفتووگۆی نێوان مەسعود بارزانی و بافڵ تاڵەبانی، بەڵام هێشتا ئەو دوو حیزبە بڕیاری یەکلایی کەرەوەیان بۆ ڕێککەوتن لەسەر پۆستی سەرۆک کۆمار نەداوە، ڕەنگە لەچەند کاتژمێری داهاتوودا بڕیاری پێکەوەچوون یاخود ماڵجیایی لەبەغدا بدەن، ئەوەش بەپێی راپۆرتێکى دەنگى ئەمەریکا.

کەناڵی ناس کورد لە تێلیگرام جۆین بکە   

 

دوێنێ پێنجشەمە، مەسعود بارزانی سەرۆکی پارتی دیموکراتی کوردستان لەگەڵ بافڵ تاڵەبانی هاوسەرۆکی یەکێتی نیشتیمانی کۆبوویەوە، چەند پێشنیارێک لەنێوان هەردوولا خرانە ڕوو، بەڵام بڕیار لەسەر هیچ پێشنیارێک نەدراو دواتر بافڵ تاڵەبانی بۆ تاوتوێکردنی پێشنیارەکان، لەگەڵ مەکتەبی سیاسی حیزبەکەیدا کۆبوویەوە، بڕیارە ئەمڕۆ هەینیش کۆبوونەوەکەیان بەردەوامی هەبێت.

 

بەپێی راپۆرتەکە، کۆمەڵێک پێشنیار و ڕاگۆڕینەوە لەنێوان بارزانی و بافڵ تاڵەبانی ڕوویداوە، سەرەتا بارزانی پێشنیاری کردووە، پۆستی سەرۆک کۆمار بۆ ئەم خولەی پەرلەمان بۆ حیزبەکەی بێت، لەبەرامبەردا پۆستەکانی تری بەغدا کە بەرکەوتەی کوردن لەگەڵ هەندێک پۆستی تردا لەهەرێم بدرێن بە یەکێتی.

 

یەکێتی بڕیار لە دوو پێشنیازی بارزانی دەدات

 

کەریم شکور جێگری سەرۆکی فراکسیۆنی یەکێتی نیشتیمانی لەپەرلەمانی عێراق وتى "تا ئێستا پارتی داوای پۆستی سەرۆک کۆمار دەکات، ئەوان دەڵێن با ئەم خولەی پەرلەمان پۆستەکە لای ئێمە بێت، لەکاتێکدا ئێمە وەکو یەکێتی ئەو پۆستە بە پشکی خۆمان دەزانین."

 

هەر بەپێی راپۆرتەکە، دواتر بافڵ تاڵەبانی گەڕاوەتەوە لای مەکتەبی سیاسی حیزبەکەی و لەبارەی پێشنیارەکانی بارزانیەوە گفتووگۆی لەگەڵ کردوون، بەڵام سەرباری بوونی ڕاجیایی، زۆربەی مەکتەب سیاسیەکانی یەکێتی دژی دەستبەرداربوون لەپۆستی سەرۆک کۆمار و گۆڕینی بەرهەم ساڵەحیش بوون، کە پارتی داوای گۆڕینی دەکات، بۆیە بڕیارە کۆبوونەوە ناوخۆییەکانی یەکێتی درێژەیان هەبێت.

 

ڕۆژی یەکشەمەی داهاتوو کۆتا وادەیە بۆ پێشکەشکردنی ناوی کاندیدانی سەرۆک کۆمار، گەر لە کاتژمێرەکانی داهاتوودا، یەکێتی و پارتی ڕێکبکەون، ئەوا کاندیدی هاوبەش پێشکەش دەکەن، گەر ڕێکیش نەکەون، پەرلەمانی عێراق ناکۆکی نێوانیان لەسەر پۆستی سەرۆک کۆمار یەکلایی دەکاتەوە.

 

زانیاریەکان ئاماژەبەوەدەکەن، هەم یەکێتی و هەم پارتیش لەبەردەم ترس و هەڵوێستی یەکلاکەرەوەدان، بەتایبەت پارتی بەدوو دڵیەوە چاوەڕێی بڕیاری دادگای فیدراڵی لەبارەی چارەنوسی هۆشیار زێباریەوە دەکات، هەروەک ترسی لەوەش هەیە، گەر بڕیارەکەی دادگا لەبەرژەوەندی زێباریش بێت، ئەوا کێبەرکێکەی نێو پەرلەمان لەبەرژەوەندی نەبێت، بەو پێیەی ڕای گشتی لەسەر ئاستی عێراق لەدژ دروستکراوە.

 

یەکێتی نیشتیمانیش، لەبەردەم هەڵوێستێکی قورسدایە، بەو پێیەی گەر دەستبەرداری بەرهەم ساڵەح بێت یاخود دەستبەرداری پۆستی سەرۆک کۆمار بێت، ئەوا لایەنگران و بەشێکی زۆر لە سەرکردەکانی حیزبەکەی بە پاشەکشەکردن لەبەرامبەر خواستی پارتی لێکیدەدەنەوە، گەر پێداگیریش بێت لەسەر کاندیدکردنی بەرهەم ساڵەح و بردنی پۆستەکە، ترسی ئەوەی هەیە ڕێککەوتنەکەی پارتی لەگەڵ لایەنە سەدر، ببێتە مایەی لەدەستدانی پۆستی سەرۆک کۆمار.

 

سەرچاوەیەکی باڵای یەکێتی، سەرباری ئەوەی ئەگەری ڕێککەوتنی نێوان یەکێتی و پارتی بەدوور نەزانی، بەڵام پێیوابوو بردنی ململانێکە بۆ نێو پەرلەمانیش عێراق ئەگەرێکی بەهێزە.