گه‌ڕان

Shadow Shadow
سیاسه‌تی

هەشت چەکدارى داعش و شەڕڤانێک کوژران

هەسەدە: 300 چەکدارى داعش خۆیان رادەستکرد

2022.01.24 - 18:11
App store icon Play store icon Play store icon
هەسەدە: 300 چەکدارى داعش خۆیان رادەستکرد

ناس کورد-

هێزەکانى سوریاى دیموکرات رایگەیاند، 300 چەکدارى داعش خۆیان رادەستکردووە و هەڵمەتى پاککردنەوەى زیندانى غوێران لەحەسەکە بەردەوامە.

کەناڵی ناس کورد لە تێلیگرام جۆین بکە   

 

بەپێی بەیاننامەکى هەسەدە، دواى بانگەوازى خۆرادەستکردن و دانانى چەک، هێزەکانیان هێرشیان کردووەتە سەر زیندانى سناعە و دەستیان بەسەر یەکێک لە بیناکانى زیندانییەکەدا گرتووە کە چەکدارانى داعش تێیدا جێگیربوون و نزیکەى 300 چەکداریان خۆیان رادەستکردووە.

 

ئاماژەى بەوەشکردووە، هەروەها هێزەکانیان بەردەوامن لە پاککردنەوەى غوێران و گەڕان بەدواى ئەو ئەندامانەى داعش کە ئاڵۆزیان نایەوە و هێرشیان کردە سەر زیندانییەکە و هەشت چەکدارى داعش کوژران و شەڕڤانێکیش گیانى لەدەستدا.

 

هێزەکانى سوریاى دیموکرات بەپشتیوانى ئاسمانى ئەمەریکا گەمارۆى سەر زیندانى غوێرانیان چڕکردووەتەوە کە داعش هێرشیکردووەتە سەر، لەکاتێکدا ئەو رێکخراوە لەهەوڵى رێکخستنەوەى ریزەکانیدایە بە زیندانییە هەڵهاتووەکان لەرێگەى توندترین شەڕەوە لەماوەى چەند ساڵێکدا کە لەئێستادا بەڕێوەدەچێت.  

  

پێکدادانەکە ئێوارەى یەکشەممە کەمێک خاوبوونەوەى بەخۆوە بینى، بەڵام هێشتا ترس لەسەر چارەنوسى سەدان منداڵى ناو زیندانییەکە هەیە، لەکاتێکدا چەکدارانى داعش بەردەوامن لەهێرشکردنە سەر شەڕڤانان، ئەوەش بەپێی پێگەى حورە.  

  

هێزەکانى سوریاى دیموکرات، بەکارهێنانى منداڵان لەلایەن داعشەوە وەک بەربەستى مرۆیی کە ژمارەیان 700 کەسە بە رێگرى گەورەى بەردەم پێشڕەوی هێزەکانى دادەنێت.  

  

لاى خۆیەوە، داعش گرتەیەکى ڤیدیۆیی بڵاوکردەوە کە تێیدا چەکدارەکانى لەسەرووى ئەو کەسانەوە وەستاون کە لەناو زیندانییەکەدا دەستگیرکراون و دەڵێت ئەوانە شەڕڤانانى هەسەدەن. بەڵام هەسەدە دەڵێت ئەوانە لەچێشتخانەى زیندانییەکەدا کاریان کردووە.  

  

بەپێی ئامارەکانى روانگەى سورى بۆ مافەکانى مرۆڤ، تا ئێستا لەنێوان 500 بۆ 600 داعش لەناو زیندانییەکەدان و ئەو رێکخراوە زیاتر لە 50 پاسەوان و کارمەندانى زیندانییەکەى بەبارمتەگرتووە.  

  

روانگەى سورى دەڵێت، چەکدارانى داعش لەرێگەى بڵندگۆوە هەڕەشەى لەسێدارەدانى سەرجەم بارمتەکان دەکەن لەناو زیندانییەکەدا.  

  

هێرشەکەى داعش بۆ سەر زیندانى غوێران بە گەورەترین و توندترین دادەنرێت لەو کاتەوە کە لە ئازارى 2019 شکستهێنانى تەواوى ئەو رێکخراوە راگەیەنرا.  

  

هێرشەکە بە هەوڵێک دادەنرێت بۆ بەرزکردنەوەى ورەى شوێنکەوتووانى داعش لەرێگەى گەڕانەوە بۆ یەکێک لە تاکتیکەکانى رێکخراوەکە کە خۆى دەبینێتەوە لە هەڵهاتنى زیندانی، ئەوەش بەپێی رۆژنامەى وۆل ستریت جۆرناڵى ئەمەریکى.  

  

هەسەدە دەڵێت، 112 چەکدارى داعشى کوشتووە کە هێرشیان کردووەتە سەر زیندانییەکە، لەکاتێکدا داعش بانگەشەى هەڵهاتنى 800 زیندانى دەکات، بەبێ ئەوەى هیچ بەڵگەیەک لەو بارەیەوە بخاتەڕوو.