تیمى فڕۆکەوانیش نەیانتوانیوە ئەو هاوڵاتییانە ڕزگار بکەن کە لە شاخی پیرەمەگرون گیریان خواردووە

کەناڵی ناس کورد لە تێلیگرام جۆین بکە   

ناس کورد- چوار هاوڵاتی دانیشتوی شارۆچکەی پیرەمەگرون، لە شاخی پیرەمەگرون گیریان خواردوە، دوای چەندین هەوڵ بۆ ئازادکردنیان، نەتواندراوە تائێستاش ڕزگار بکرێن. . سیروان سەرحەد، قایمقامی قەزای دوکان بە ناس کوردی ڕاگەیاند، لەگەل تەواوی تیمەکانی دوکان و پیرەمەگرون و سورداش و بەرگری شارستانی سلێمانی و بەشێک لە هاوڵاتییانی سنورەکە، لە هەوڵدان بو ڕزگاركردنى ئەو هاوڵاتییانە کە ئەمڕۆ بەمەبەستی شاخەوانی ڕویان لەو شاخە کردووە. . سیروان سەرحەد ئاماژەى بەوەشکرد: "تیمی فڕۆکەوانی سلێمانی هاتووەتە شوێنەکە، نەیتوانیوە ڕزگاریان بکات، بەڵام دواتر بەهەوڵی تیمەکان یەکێک لەو هاوڵاتییانە ڕزگار کراوە، لە ئێستاشدا ئەو سێ کەسەکەی دیکە لەسەر شاخەکەن و گیریان خواردووە". . بە وتەی قائیمقامی دوکان، لە ئێستادا تیمێکی تری سورداش چوونەتە سەر شاخەکە و لە هەوڵدان ئەو سێ هاوڵاتییە ڕزگار بکەن، وتیشی: "خۆراک و ئاوی پێویستمان بۆ فریا خستوون". . قائیمقامی دوکان داوای لە هاوڵاتییان کرد، چیتر ڕوو لەو شاخە نەکەن و دوور بکەونەوە لە شوێنە سەخت و مەترسیدارەکان. . ساڵانە لە وەرزە جیاوازەکاندا، گەشتیاران و هاوڵاتییانی سنورەکە، ڕوو لەشاخی پیرەمەگروون دەکەن و بەشێکیشیان وەک سەرکێشی بەسەر شوێنە مەترسیدارەکانی شاخەکەدا سەردەکەون. . شاخی پیرەمەگرون کەوتووەتە ڕۆژئاوای شاری سلێمانی و بەرزییەکەی دوو هەزار و 624 مەترە لە ئاستی ڕووی دەریاوە، کۆمەڵێک ئەشکەوتی دێرینی تێدا هەڵکەوتووە کە سەردەمانێک ماڵ و دیوەخانی کورد بووە، لەسەردەمی شۆڕشیشدا سەنگەر و پەناگەی پێشمەرگە بووە، بە یەکێک لە لووتکەکانی زینجیرەچیاکانی زاگرۆس هەژمار دەکرێت و درێژیەکەی دەگاتە حەوت کیلۆمەتر. . .