گه‌ڕان

Shadow Shadow
سیاسه‌تی

وردەکاریی

هۆکارێکى دیکەى لافاوەکەى هەولێر دیاریکرا: 25 ملیۆن مەتر سێجا باران لەدوو کاتژمێردا باریوە

2021.12.26 - 22:57
App store icon Play store icon Play store icon
هۆکارێکى دیکەى لافاوەکەى هەولێر دیاریکرا: 25 ملیۆن مەتر سێجا باران لەدوو کاتژمێردا باریوە

ناس کورد-

 

بەڕێوەبەرى ئاو و ئاوەڕۆى هەولێر هۆکارى لافاوەکەى 10 رۆژى رابردوو بۆ هۆکارى سروشتى گێڕایەوە و دەڵێت لەدوو کاتژمێردا  25 ملیۆن مەتر سێجا باران باریوە، ئەوەش لەتواناى سیستەمى ئاوەڕۆى شارەکەدا نییە.

 

کەناڵی ناس کورد لە تێلیگرام جۆین بکە   

 

زەردەشت عەبدولخالق بەڕێوەبەرى ئاو و ئاوەڕۆى هەولێر (26 كانونى یەکەمى 2021) لەبەرنامەیەکى تەلەفزیۆنیدا لەمدیاى زمانحاڵى پارتى وتى "بەپێی ئەو روپێوییەى کردویانە لەبارەى هاتنى ئەو ئاوە زۆرەى بووە هۆى روودانى لافاو، بۆیان دەرکەوتووە لە سێ شوێنەوە 25 ملیۆن مەتر سێجا ئاو لەماوەى دوو کاتژمێردا باریوە و پاش کۆبوونەوەى هاتووە بەرەو ناو هەولێر".

 

وتیشى لە بەرزاییەکانى چەمرگا بەرەو لاى دارەتوو چوار ملیۆن مەتر سێجا، مەلا ئۆمەر بەرەو گوندى زێڕین و کۆرى نزیکەى سێ ملیۆن مەتر سێجا، بازنەى 150 مەترى 18 ملیۆن مەتر سێجا باران باریوە، ئەوەش وەک ئەوە وایە  بەنداوێک بەسەر هەولێردا روخابێت.

 

زەردەشت عەبدولخالق باسى لەوەشکرد، هەرچى بکرێت ئاوەڕۆکانى هەولێر بەرگەى ئەوە بڕە زۆر ناگرێت، هەرچەندە بەشى زۆرى رۆیشتووەتە ناو ئاوەڕۆکانەوە کە درێژییەکەى دوو ملیۆن مەترە.

 

دەشڵێت بەرزاییەکانى دەوروبەرى هەولێر هۆکارێک بوون چونکە هەندێکیان 600 مەتر بەرزترن، جگە لەوەى ئەمساڵ نەکێڵراون، ئەوەش وایکردووە ئاوەکە خێراتر کۆبێتەوە و بەرەو ئەو شوێنە بڕوات.

 

بەپێی ئامارەکان، لەلافاوەکەى هەولێر 12 کەس بوونە قوربانی، تەرمی 10 کەس دۆزراونەتەوە و دوو کەسی دیکەش کە دانەری تەمەن 10 مانگ و شوانێک بەناوی ئومێد شامل بێسەروشوێنن.

 

هەروەها دوو هەزار و 509 ماڵ ئاویان چووەتە ناو و زیانیان پێگەیشتووە، 402 ماڵ دیواریان ڕووخاوە و دەرگا و پەنجەرەکانیان تێکشکاون، هەروەها 867 ئۆتۆمبێل زیانیان پێگەیشتووە.