گه‌ڕان

Shadow Shadow
سیاسه‌تی

یەکەم کاردانەوە لەسەر سزاى شەش مانگ زیندانى بۆ ئەندامێکى سەرکردایەتى یەکێتى

2021.12.21 - 22:31
App store icon Play store icon Play store icon
یەکەم کاردانەوە لەسەر سزاى شەش مانگ زیندانى بۆ ئەندامێکى سەرکردایەتى یەکێتى

ناس کورد-

 

کەسێکى نزیک لە محەمەد عوسمان ئەندامی سەركردایەتی یەكێتیی رایگەیاند، سزادانى ئەو بەرپرسەى یەکێتى لەلایەن دادگاوە لەسەر "گەندەڵی و جاسوسی" نییە و پەیوەندیدارە بە سکاڵایەکى حەشدى شەعبییەوە.

کەناڵی ناس کورد لە تێلیگرام جۆین بکە   

 

هەوڕاز شوانى  ئەندامی مەڵبەندی ٢ی کەرکوکی یەکێتی کە برازاى حەمەسور دوشیوانییە لەبڵاوکراوەیەکدا کە دەست "ناس کورد" کەوتووە نوسیویەتى "سزاکە لەسەر بابەتی گەندەڵی و جاسوسی و شتی تر نییە، بابەتەکە پەیوەندی دارە بە بەرگری کردن لە خەڵکی کورد".

 

دادگای تاوانەكانی كەركوك، ئەمڕۆ سزای شەش مانگ زیندانی بۆ محەمەد عوسمان، ئەندامی سەركردایەتی یەكێتیی نیشتیمانیی كوردستان و لێپرسراوی پێشوی مەڵبەندی كەركوكی ئەو حزبە دەركرد، بەڵام بەلەبەرچاوگرتنی بارودۆخی تایبەتی ناوبراو سزاكە جێبەجێناكرێت.  


سزای شەش مانگ زیندانی بۆ ئەندامێكی سەركردایەتی یەكێتی دەركرا

 

دەقى بڵاوکراوەکە:

 

دوای ململانێکی (چوار ساڵ و دوو مانگ و پێنج ڕۆژ)  لەگەڵ نوێنەری حەشدی شەعبی لە دادگای جنایاتی کەرکوک و کەداوایان لەدژ هەڤاڵ حەمە سور تۆمارکردبوو کە ئەوکات ئەندامی پەڕلەمانی عیراق بووم لەسەر کێشەی (۱٦)ی ئۆکتۆبەر و کۆنگرەی ڕۆژنامەوانی ئەوکات کە تایبەت بوو بە دەست درێژی و زوڵم وغەدری بەشێک لە هێزە چەکدارەکان دژی  کوردانی دووز و داقوق.

 

کە ئەوکات هێزە چەکدارەکان بەم شێوە ڕەشبەگیریان دەست پێ کردبوو دژی کوردانی دوزخورماتوو وداقوق وکەرکوک:

۱ـ (۷)پێشمەرگە و (۲)هاوڵاتی شەهید بوون

۲ـ (۱۱٥)کەس لە پێشمەرگە و هاوڵاتی ریندار بوون.

۳ـ (٤۱)دیل دوای ئەشکەنجەدان ئازادکران.

٤ـ (٤)حاڵاتی دەستدرێژی بۆ سەر ژنان کە یەکێکیان لای دادگا تۆمارکراوە.

٥ـ زیاتر لە (٥) هاوڵاتی لە کاتی ئاوارەبوون کۆچی دواییان کرد.

 

زیانە مادیەکان

ـــــــــــــــــــــــ

۱ـ زیاتر لە(۳۱٥۰)ماڵی هاوڵاتیانی کورد تاڵانکران و شێوێندران.

۲ـ (٥۳)خانو و دوکان و کارگە تەقێندرایەوە.

۳ـ نزیکەی(٥۳۰)خانووی هاوڵاتیانی کورد لەگەڵ دوکان و مارکێتی گەورە و شوێنی بازرگانی  بەرتاڵان و سوتاندن کەوتن.

٤ـ دزینی(۱٥٦)ئۆتۆمۆبیل بچوک و بارهەڵگر وتراکتۆر و شۆفڵ و حەفارە.

٥ـ سوتاندن و تاڵانکردنی (٢١)کارگەی بلۆک و کارگەی چەو و لم.

٦ـ سوتاندن و تاڵانکردنی بارەگای(۱٥)حزبی کوردستانی.

۷ـ تاڵانکردن و سوتاندنی (٦) دامەزراوەی سەر بەحکومەتی هەرێمی کوردستان.

٨ـ سوتاندن و تاڵانکردنی(٤)ڕادیۆ و(١)tv لۆکاڵی کوردی.

۹ـ سوتاندن و تاڵانکردنی(۱۰)بەنزینخانەی ئەهلی هی هاوڵاتیانی کورد.

بۆیە وەکو ئەرکێکی ئەخلاقی وسیاسی وکوردایەتی ، هەڤال حەمەسور دوشیوانی لە ناو جەرگەی کەرکوکەوە هاتە دەنگ وبەرگری لە کوردانی ئەو ناوچانە کرد. وە هەوڵی دا رزگاریان بکات لە هێرشی ڕەشبەگیری و قەتل وعامی خەڵکی ئەو ناوچەیە بۆیە لە کۆنگرەیەکی ڕۆژنامەوانیدا هەڤال حەمەسور دوشیوانی هێزە چەکدارەکان وگروپێکی حەشدی تۆمەتبار کرد بە پەیرەوکردنی سیاسەتی کوردقڕکردن  لەوناوچانەدا، بۆیە ئەمرۆ دادگایی جنائی کەرکوک لەسەر داواوسکاڵای یاسایی نوێنەری حەشدی شەعبی سزایی زیندانکردنی بۆ ٦ مانگی بەسەر حەمەسور دوشیوانی دەرکرد، هاوکات لە گەڵ وەستاندنی جێبەجێ کردنی سزاکە.

 

سەربەرزین کە سزاکە لەسەر بابەتی گەندەڵی وجاسوسی وشتی تر نیە، بابەتەکە پەیوەندی دارە بە بەرگری کردن لە خەڵکی کوردی ڕەسەن ومەردی دەڤەری ناوجە جێناکۆکەکان.

 

ئێمە بەسزایی نازانین، بەلکو بە مەدالیای زێرین وخەڵاتی پڕ شکۆمەندی ئەزانین، سەرکەوتن ومانەوە هەر بۆ کوردانە..