گه‌ڕان

Shadow Shadow
سیاسه‌تی

بافڵ تاڵەبانى لەهەولێر باسى ’’بەربەست و کۆسپ’’ دەکات

2021.12.14 - 16:57
App store icon Play store icon Play store icon
بافڵ تاڵەبانى لەهەولێر باسى ’’بەربەست و کۆسپ’’ دەکات

ناس کورد-

 

بافڵ تاڵەبانى رایگەیاند، هەولێر قەڵاى یەکێتى یە و رێگە نادەن ھیچ کادرێکی یەکێتی لەسەر کاری سیاسی و رێکخراوەیی کۆسپ و بەربەستی بۆ دروست بکرێت.

 

کەناڵی ناس کورد لە تێلیگرام جۆین بکە   

 

ئەو وتانەى بافڵ تاڵەبانى لەمیانەى کۆبوونەوەیەکیدا هات لەهەلێر لەگەڵ ئەنجومەنی مەڵبەندی رێکخستنی ھەولێرى حزبەکەى، ئەوەش بەپێی راگەیەنراوێکى نوسینگەکەى کە دەست "ناس کورد" کەوتووە.

 

بافڵ تاڵەبانى وتى "یەکێتی لەچوارچێوەی بەرژەوەندی گشتی و ئامانجە باڵاکاندا سیاسەت و بەرنامەی خۆی گەڵاڵەکردووە".

 

دەقى راگەیەنراوەکە:



بافڵ جەلال تاڵەبانی بەئامادەبوونی دەرباز کۆسرەت رەسوڵ، کارگێڕی مەکتەبی سیاسی و چەتۆ ساڵح، ئەندامی سەرکردایەتی لە مەکتەبی سیاسی لە ھەولێر لەگەڵ ئەنجومەنی مەڵبەندی رێکخستنی ھەولێر کۆبووەوە.

 

لە کۆبوونەوەکەدا بافڵ جەلال تاڵەبانی وێڕای ھەڵوەستەکردن لەسەر دۆخی گشتی و پێشھاتە سیاسی و ئەمنییەکان تێڕوانینی یەکێتی خستەڕوو بۆ پرسەکان و زاڵبوون بەسەر ئاڵنگارییەکان، ئاشکرایکرد یەکێتی لەچوارچێوەی بەرژەوەندی گشتی و ئامانجە باڵاکاندا سیاسەت و بەرنامەی خۆی گەڵاڵەکردووە و بە دیدگایەکی  نیشتمانیی کوردستانیی لەگەڵ کۆی رووداو و پێشھاتەکان مامەڵەدەکەین و دەمانەوێت یەکێتی بین بۆ کوردستانێکی بەھێزتر و حکومڕانییەکی باشتر.

 

گیانی حزبایەتی رەسەن دەگێڕینەوە و یەکێتی دەخەینەوە سەر رێچکە راستەقینەکەی خۆی کە ھی تێکۆشەران و ھاوڵاتی بێت.

 

لەبارەی ئەرک و خەباتی نوێی حزبی و بەرپرسیارێتی رێکخراوەیی، بافڵ جەلال تاڵەبانی بەرچاوڕوونی دا بە ئامادەبووان و ھەڤاڵان و کادرانی راسپارد بەگیانی یەکێتییەکەی مام درێژە بەکاری حزبی بدەن و لە ئاست داخوازی و ویستی ھەولێر بن، لای یەکێتی خزمەتکردنی ھەولێر و ھەولێرییەکان لە ئەولەویەتی کارەکانمان دەبێت.

 

چونکە ھەولێر بۆ ئێمەی یەکێتی قەڵای کوردایەتیمانە و ئاماژەی بۆ ئەوە کرد یەکێتی بوون شانازییە، ئەم شانازی بوونەش دەپارێزین و لەسەر کاری سیاسی و ماف و ئەرک و کاری رێکخراوەیی لە ھەولێر، پاڵپشت و پشتیوان دەبم و رێگەش نادەین ھیچ کادرێکی یەکێتی لەسەر کاری سیاسی و رێکخراوەیی کۆسپ و بەربەستی بۆ دروست بکرێت.

 

ھەر لەکۆبوونەوەکەدا د.ڕێبوار ئیسماعیل لێپرسراوی مەڵبەندی هەولێر لە راپۆرتێکدا رۆشنایی خستەسەر میکانیزمی کاری رێکخراوەیی و چۆنێتی گەشەپێدانی ئۆرگانەکان و پێداچوونەوەیان و بەربەستەکانی بەردەم راپەڕاندنی ئەرکە حزبییەکانی روونکردەوە.