ناس کورد-
بەهۆی نەگەیشتنی 200 ملیارەکەی بەغدا، دابەشکردنی مووچە لە هەرێم بەخاوی بەڕێوەدەچێت و ئەمڕۆش تەنها مووچەی وەزارەتێک دابەش دەکرێت.
کەناڵی ناس کورد لە تێلیگرام جۆین بکە
بەگوێرەی خشتەیەک کە وەزارەتی دارایی درەنگانی شەوی ڕابردوو ئاڕاستەی گەنجینەکانی کردووە و وێنەیەکی دەست "ناس کورد" کەوتووە، ئەمڕۆ سێشەممە 14ی کانونی یەکەمی 2021، مووچەی وەزارەتی کشتوکاڵ و سەرچاوەکانی ئاو دابەش دەکرێت.
ئەگەرچی لە 25ی مانگی ڕابردووەوە واتە 19 ڕۆژە وەزارەتی دارایی هەرێم دەستی بە دابەشکردنی مووچە کردووە، بەڵام هێشتا مووچەی بەشێک لە فەرمانبەران دابەش نەکراوە و پرۆسەکە تەواو نەبووە.
بەوتەی بەرپرسانی هەرێم لە مانگەکانی ڕابردوودا، خاو دابەشکردنی مووچە پەیوەندی بە درەنگ کەوتنی گەیشتنی 200 ملیارەکەی بەغدا و نەگەڕانەوەی داهاتی سنوری سلێمانی هەیە بۆ خەزێنەی وەزارەتی دارایی، بەڵام بۆ ئەم مانگە تاوەکو ئێستا هیچ ڕوونکردنەوەیەکیان نەداوە.
