گه‌ڕان

Shadow Shadow
سیاسه‌تی

بۆچی ئەو سێ کەسە کراونەتە ئامانج

’’بەرپرسانی ژەهرخواردکراوی ناو یەکێتی زیاتر دەبن’’

2021.11.18 - 18:09
App store icon Play store icon Play store icon
’’بەرپرسانی ژەهرخواردکراوی ناو یەکێتی زیاتر دەبن’’

ناس کورد- 

مەلا بەختیار، ئەندامی ئەنجومەنی باڵای سیاسی و بەرژەوەندییەکانی یەکێتی ڕایگەیاند، ژەهر خواردکردنی بەرپرسی دیکەش لەنێو یەکێتی دەردەکەوێت و هاوکات باس لە هۆکاری ئەوەش دەکات کە بۆچی ئەو و بافڵ تاڵەبانی و حەسەن نوریی بەڕێوەبەری پێشووی ئاسایشی سلێمانی کراونەتە ئامانج.

کەناڵی ناس کورد لە تێلیگرام جۆین بکە   

 

بەگوێرەی ڕاگەیەنراوێکی نوسینگەکەی، مەلا بەختیار لە میانەی میوانداریکردنی ژمارەیەک کەسایەتیدا (پێنجشەممە 18ی تشرینی دووەمی 2021) ڕایگەیاند، "بەهۆی ئەوەی بافڵ تاڵەبانی كوڕی مام جەلالە بۆیە ژەهرخوارد کروە، بۆیە كوڕە گەورەكەشیان والێكردووە، تا بڵێن ئێمە میراتگری مام جەلال-ین، هاتوون منیشیان هەڵبژاردووە بۆ ئەوەی بڵێن، لەمێژوودا، مەلا بەختیار هەبوو، كە شارەزای مێژووی رابردوو بێ‌‌ت و ئاگاداری نهێنییەكانبێ‌ و هەڵوێستێكی هەیە، بەكۆتایهێنان بەمن، ئەو مێژووەش كوێر بكەنەوە، وەستا حەسەن-یشیان هەڵبژاردووە، ئەویش بەهۆكاری ئیشوكارەكەی، كە نهێنییەكانی ئەم دەڤەرە زۆر باش دەزانن." 

 

ئاماژەی بەوەشکردووە، "ئەوەی بەرامبەر بەمن و بە كاكە بافڵ ‌و وەستا حەسەن كراوە، هی دیكەش دەردەكەوێت." 

 

دەقی ڕاگەیەنراوەکەی نوسینگەی مەلا بەختیار: 



پێشنیوەڕۆی ئەمڕۆ (18/11/2021) مەلا بەختیار، ئەندامی ئەنجومەنی باڵای سیاسی‌و بەرژەوەندییەكانی یەكێتی، لەوتەیەكیدا لەپێشوازی ژمارەیەك لەهەڤاڵان و دۆستان، ئەو میوانانەی بەمەبەستی بەخێرهێنانەوە سەردانیانكردبوو، ئاماژەی بۆ ئەوەكرد، لەهەركوێیەكەوە، گەرمیان یان لەكوێستانەوە هاتوون، بەخێرهاتن سەرچاوان، هەروەك پێشوتریش وتومەو ئێستاش دەیڵێمەوە: هاتن و سەردانتان بۆلای من، بۆ من نییە، بەڵكو بۆ یەكێتییە! بۆمن نییە، بەڵكو بۆ ئیدانەكردنی كارێكی قێزەونە! هەروەك سوپاسی سەرجەم هەڤاڵان و دۆستانی كردو هەواڵپرسین‌و سەردانیكردنیشی بەوەفاو دڵسۆزیی هەڤاڵانە ناوبرد.

 

وتیشی: مرۆڤ ئەگەر لەژیانیدا، دژی كاری خراپە نەبێ‌، باوەڕناكەم بتوانێ‌ خزمەتی مرۆڤایەتی بكات! چونكە خزمەتكردنی مرۆڤایەتی، بەهەڵوێستی مرۆڤ ‌و بەتێگەیشتنە لەخراپەكاری!

 

رونیشیكردەوە، لەزمانی عەرەبیدا، زۆر بەجوانی ناو لەمرۆڤ نراوە (ئینسان)! واتە كۆی دوو ئینسە! ئینسی شەڕو ئینسی خێر! هەر بۆیە هەندێكجار ئینسی خێر زاڵ دەبێت‌و بەپێچەوانەشەوە.

 

راشیگەیاند: ئەوەی بەرامبەر بەمن، بەرامبەر بەكاكە بافڵ ‌و وەستا حەسەن كراوە، كە هی دیكەش دەردەكەوێت! ئەگەرچی هیوادارم كەسی دیكە توش نەبوبێت. بەڵام ئەوانەی بەرامبەر بەئیچمە ئەمكارەیان كردووە، هەمان هۆكار پاڵی پێوەناون، بەرامبەر بەخەڵكانی تریش كردبێتیان، كە لێیان ترساون. لەگەڵ ئەوەشدا هیوادارم بەئێمە كۆتایی هاتبێت.

 

بێگومان تاوانە‌و ئەمكارە ماكی هەیە! هەربۆیە وەك برین تا ماكەكەی دەرنەكەیت، ئەو برینە ساڕێژ نابێتەوە! ماكی ئەمكارەش ئەقڵییەتێكی تەسكی پیلانگێڕی مەترسیدارە!

 

مەلا بەختیار، لەوتەكەیدا، ئاماژەشی بۆ ئەوەكرد، تاوانباران سێ‌ كەسیان هەڵبژاردووە، یەكەمیان كوڕی مام جەلالە، كە من هەقم بەسەر پلەكەیەوە نییە لەناو یەكێتیدا، كە ئەوانیش بۆ پلەكەی ئەمكارەیان نەكردووە! بەڵكو لەبەرئەوەیە كە كوڕی مام جەلالە بۆیە وایانكردووە! بۆیە كوڕە گەورەكەشیان والێكردووە، تا بڵێن ئێمە میراتگری مام جەلال-ین! هاتوون منیشیان هەڵبژاردووە بۆ ئەوەی بڵێن: لەمێژوودا، مەلا بەختیار هەبوو، كە شارەزای مێژووی رابردووبێ‌‌و ئاگاداری نهێنییەكانبێ‌ و هەڵوێستێكی هەیە، بەكۆتایهێنان بەمن، ئەو مێژووەش كوێر بكەنەوە! وەستا حەسەن-یشیان هەڵبژاردووە، ئەویش بەهۆكاری ئیشوكارەكەی، كە نهێنییەكانی ئەم دەڤەرە زۆر باش دەزانن، بەمشێوەیەش هاتوون هەر یەكێك لەم كەسایەتییانە، بەئامانجێكی گڵاو لەناوبەرن‌و دواتریش پاش لەناوچوونی ئێمە، نەخشەكانی خۆیان ترسناكتر جێبەجێ‌ بكەن! ئەمە پێشەكیش هەبوو، بەڵام بەداخەوە، یەكێتی نیشتمانی كوردستان و ئەو مەكتەب سیاسییەی ئێستا هەیە، دركیان پێنەدەكرد!

 

پێشەكییەكەش ئەوەیە، بەداخەوە لەناو یەكێتی، حزبایەتی نەما! بیروباوەڕ نەما! لێپرسینەوە، سزاو پاداشت نەما! مەركەزیەت نەما! پۆلێنی سیاسەت، كێ‌ دۆستە، كێ‌ دوژمنەو كێ‌ بێلایەنە، هیچی ئەمانە نەما! ئەم قۆناغە دەبێ‌ ستراتیژمان لەگەڵ كێ‌ بێ‌؟ دژایەتی‌و ململانێمان لەگەڵ كێ‌ بێ‌؟ یەكگرتنمان لەگەڵ كێ‌ بێ‌؟ هیچی ئەمانە لەناو یەكێتی نەما! ئەمانەشیان بۆیە نەهێشت هەتا كەشێك دروست بكەن، هەتا بتوانن پیلانەكانیان تێبپەڕێنن ‌و لەڕووی سایكۆلۆجییەوە خەڵك بتوانێ‌ بەئاسانی قوتی بدات! چونكە كە حزبایەتی، مەركەزیەت، مەرجەع نەما، دیارە تاوان دەسەپێت ‌و كوردیش دەمێكە وتویەتی: دز بازاڕی شێواوی دەوێ‌، یان ماسی لەئاوی لێڵدا راو دەكات! ئەمەش پەندو حیكمەتەو یەكێتیش وەك بازاڕی شێواو، دز تێیكەوت! متمانە لێوەرگرتنەوەی جەماوەریش، بەڵگەیە.

 

هەروەک ئاماژەشی بەوەکرد: مۆسۆلۆنی بۆچی فاشییەتی لەئیتاڵیا سەرخست و هیتلەریش، نازییەتی لەئەڵمانیا سەرخست؟ لەبەرئەوەی دۆخی ئابوری تێکچوو، هێزە نازی و فاشیستەکان دەستیان هەبوو لەفەوزاو ئەنارشیستی. کاتێک فەوزا دروستبوو، بازاڕشێوا، مۆسۆلۆنی هێزێکی جل ڕرشی هێناو رۆمای داگیرکرد. هیتلەریش بەناوی دڵسۆزی بۆ نەتەوەی ئەڵمانیا، بازاڕەکەی وا تێکدا، لە هەڵبژاردن بردییەوەو دنیاشی تێکوپێکدا! ئەم فاشییەتە لە شتی بچوکەوە دەستپێدەکات، لەدنیاشدا فاشییەت لە ئۆپۆزسیۆنەوە دەستیپێکردووە و کە هاتۆتە دەسەڵاتیش دنیای تێکداوە. ئەم فاشیەتەی ناو یەکێتیش بە ئۆپۆزسیۆنی دەستیپێکردووە! لافلێدەدات دژی پارتییە!؟ بەڵام بابزانین چی کردووە دژی پارتی! بەپێچەوانەوە پارتی دەنگی زیاتری هێنا! ململانێ بەجنێودان ناکرێ، بەڵکو ململانێ لەسەر دیموکراسی، ئازادی، دادپەروەری، مەدەنییەت، لەسەر پرسە جیاوازەکان، لەسەر فکر ململانێ دەکرێ! نەک بەموزایەدەو جنێودان..!

 

مەلا بەختیار، راشیگەیاند: ئێمە گیاكەڵە نەبووین، هەر لەخۆمانەوەو روابین! بەڵكو بەبیروباوەڕەوە دروستبووین و هەر بەو بیروباوەڕەشەوە بەرەنگاریمان كردووە‌و هەر بەوشێوەیەش گەیاندومانەتە راپەڕین‌و لەراپەڕینیشەوە گەیاندمانە هەڵبژاردن، لەویشەوە بۆ پەرلەمان‌و حكومەت.

 

بۆیە، هیچ كات پێویست بەجنێودان‌ و بەموزایەدە ناكات.

لەكۆتایی وتەكەشیدا، مەلا بەختیار، ئاماژەی بۆ ئەوەكرد، لەئاییندە كۆڕێك رێكدەخات‌و تیایدا لەسەر سێ‌ تەوەری دیاریكراو، شرۆڤەو خوێندنەوەكانی خۆی دەخاتەڕوو، هەروەك هەڵوێستە نەگۆڕ‌و جدییەكان‌و سەرەنجامی پێشبینییەكانیشی، دەخاتەوەڕوو.