گه‌ڕان

Shadow Shadow
چیرۆكه‌كانمان

ناس كورد وردەكاری ئەلبومە نوێیەكەی ڕەوا جەمال بڵاودەكاتەوە

2019.03.12 - 14:08

 

ناس كورد- شۆڕش محەمەد

هونەرمەندی گۆرانی بێژ رەوا جەمال عەبدول نوێترین ئەلبوومی خۆی بەناوی (بۆ كوێ‌ بڕۆم) بڵاودەكاتەوە ‌و وردەكارییەكەی بۆ ناس كورد، ئاشكرا دەكات.

ڕەوا جەمال عەبدول هونەرمەندی گۆرانی بێژ  لە بارەی ئەلبومە نوێیەکەیەوە تایبەت بە ناس كورد-ی راگەیاند: "ئەلبومەكە بەناوی (بۆ كوێ‌ بڕۆم)ە‌و لە 15 تراك پێكهاتووە ‌و بەنیازم لە جەژنی نەورۆزدا بڵاوی بكەمەوە".

 

لە بارەی ئاوازی گۆرانییەكانی ناو ئەلبومەکەیەوە ڕەوا جەمال ئاشکرای کرد، حەوت تراكی لە لایەن مامۆستا بورهان موفتی زادە ئامادە كراوە، هەروەها هەریەك لە مامۆستا سەڵاح رەئوف‌، توانا فەرەج، رۆژ كەریم ‌و نامۆ و ئەفشین شوکری ئاوازیان بۆ بەرهەمەكانی تر ئامادە كردووە.

شیعری گۆرانییەكانی ناو ئەلبومەكەش شیعری شاعیران (عەبدوڵا پەشێو‌، ساڵح بێچارە، ئەحمەد محەمەد، نامۆ، نزار ناشاد، كارزان جەلال، ئیسماعیل ساڵح ‌و یەحیا بەرزنجی)ن.

 

ڕەوا جەمال رونیدەكاتەوە، لەدوای بڵاوكردنەوەی ئەلبوومی (گەڕانەوە) لەساڵی 2013دا، نزیكەی شەش ساڵە ئامادەكاری دەكات بۆ بەرهەمهێنانی ئەم سیدییە ‌و هیوایخواست كە لانی كەم كاردانەوەی سیدی پێشوی هەبێت لەلای خەڵك‌و  وتی: "بەڕای من ئەلبومی پێشوو زۆر باش چووە ناو خەڵكەوە ‌و ژمارەیەكی زۆری لێ‌ فڕۆشرا ئەگەر لەو باشتر نەبێت ئەوا وەكو ئەو دەبێت".

 

وتیشی: "لەم ئەلبوومە نوێیەدا هەوڵی ئەوەم داوە كاری چەند ئاوازدانەرێك تاقی بكەمەوە‌ و هەروەها هەوڵی ئەوەم داوە لەم سیدییەدا هەموو چین ‌و توێژەكان بەسەربكەمەوە".

 

بۆ بڵاوكردنەوەی ئەلبوومەكە هونەرمەند خۆی سەرپەرشتی بڵاوكردنەوەكەی دەكات‌و تائێستا بەرهەمەكەی نەداوەتە هیچ شوێن‌و دەزگایەك بۆ بڵاوكردنەوەی.

لەو بڕوایەشدایە كە هەر كەس جوانی دیزاین ‌و كەتەلۆگی بەرهەمەكە ببینێت بیر لە كۆپیكردنی ناكاتەوە ‌و جەختیشی كردەوە "كۆپی رایت دیاردەیەكە سەد دەر سەد كۆنترۆڵ ناكرێت".

 

تێچووی تەواوی ئەلبوومەكە لەئەستۆی هونەرمەند خۆی بووە‌ و بەو هۆیەشەوە بەمافی خۆی دەزانێت كە داوای ئەوە لەخەڵك بكات "بەرهەمەكەی كۆپی نەكەن ‌و نوسخەی ئۆرجیناڵی ئەلبوومەكە بكڕن".

ئەلبوومی (بۆ كوێ‌ بڕۆم) لەقۆناغی یەكەم ‌و گوژمەی یەكەم 10 هەزار دانەی لێ‌ چاپكراوە‌و بەوتەی ڕەوا "ئەگەر هەمووی بفڕۆشرێت رەنگە نیوەی تێچووی سیدییەكە بگەڕێنێتەوە".

 

https://www.facebook.com/rawa.abdul/videos/10212994675373032/?t=8