گه‌ڕان

Shadow Shadow
سیاسه‌تی

ناس کورد وردەکاریی ئاشکرا دەکات

لەسەر پێنەدانی مووچە بەو کەسانەی ڤاکسینیان وەرنەگرتووە ڕوونکردنەوە دەدرێت

2021.10.24 - 14:43
App store icon Play store icon Play store icon
لەسەر پێنەدانی مووچە بەو کەسانەی ڤاکسینیان وەرنەگرتووە ڕوونکردنەوە دەدرێت

ناس کورد- 

 

بەڕێوەبەری تەندروستیی هەڵەبجە ڕەتیدەکاتەوە هەر کارمەندێکی تەندروستی ڤاکسینی وەرنەگرتبێت مووچەکەی ڕابگیرێت و دەڵێت، بەڵام پێویستە پشکنینی کۆرۆنا بکەن ئەوکات مووچەیان پێدەدرێت، بەوەش تەنها یەک ڕۆژ مووچەکەیان دوادەکەوێت.

کەناڵی ناس کورد لە تێلیگرام جۆین بکە   

 

دوێنێ شەممە 23ی تشرینی یەکەمی 2021، بڕیارێکی بەڕێوەبەری تەندروستیی هەڵەبجە بڵاوبووەوە و وا لێکدانەوەی بۆ کرا کە هەر کارمەندێکی تەندروستی ڤاکسینی وەرنەگرتبێت مووچەی پێنادرێت. 

 

لەوبارەیەوە د. ئازاد مستەفا، بەڕێوەبەری تەندروستیی هەڵەبجە (یەکشەممە 24ی تشرینی یەکەمی 2021) بە "ناس کورد"ی وت، "بڕیارەکە بە هەڵە گوازراوەتەوە و لێکدانەوەی هەڵەی بۆ کراوە، ئێمە نە موچەی کەس دەبڕین نە مووچەی کەسیش ڕادەگرین." 

 

وتیشی، "بڕیارەکە بەوشێوەیەیە کە هەر کارمەندێکی سەربە بەڕێوەبەرایەتی تەندروستیی هەڵەبجە ئەگەر ئامادە نەبێت ڤاکسین وەربگرێت پێویستە پشکنینی کۆرۆنا بکات، ئەوکات مووچەی پێدەدرێت."

 

ڕوونیشیکردەوە، "بەوەش تەنها یەک ڕۆژ مووچەکەی دوادەکەوێت، چونکە پشکنینەکە ڕۆژێکی پێدەچێت و ئەنجامی پشکنینەکەش هەرچییەک بێت مووچەکە بە کارمەندەکە دەدرێت، لە سبەینێشەوە کە مووچەی وەزارەتی تەندروستی دابەش دەکرێت ئەو بڕیارە جێبەجێ دەکرێت." 

 

بەڕێوەبەری تەندروستیی هەڵەبجە باسی لەوەشکرد، "کارمەندانی تەندروستی گوێزەرەوەی کۆرۆنان، چونکە بەرکەوتنیان لەگەڵ توشبووانی کۆرۆنا زۆرە، بۆیە ئامانجی ئێمە لەم کارە پاراستنی خۆیان و کەسوکاریان و سەرجەم هاووڵاتیانە." 

 

ئاماژەی بەوەشکرد، "ئێمە وەرگرتنی ڤاکسینمان نەکردووە بە ناچاری، هەرکەس ئامادەنییە ڤاکسین وەربگرێت، پێویستە هەفتانە پشکنینی کۆرۆنا بکات بۆ دڵنیابوونەوە لە سەلامەتی." 

 

بڕیارە سبەینێ دووشەممە 25ی تشرینی یەکەمی 2021، مووچەی مانگی تشرینی یەکەمی وەزارەتی تەندروستی دابەش بکرێت.