گه‌ڕان

Shadow Shadow
سیاسه‌تی

وردەکاریی

وەزارەتی پەروەردە باوەڕبوونی بە ڕۆژی دوایی لە پڕۆگرامی خوێندن لابرد

2021.10.24 - 11:48
App store icon Play store icon Play store icon
وەزارەتی پەروەردە باوەڕبوونی بە ڕۆژی دوایی لە پڕۆگرامی خوێندن لابرد

ناس کورد- 

 سەرۆکی لیژنەی ئەوقاف و کاروباری ئاینی لە پەرلەمانی کوردستان ڕایگەیاند، وەزارەتی پەروەردە چەندین بابەتی گرنگی لە پڕۆگرامی وانەی پەروەردەی ئیسلامیی پۆلی نۆیەمدا لابردووە کە گرنگترینیان لابردنی بابەتی باوەڕبوونە بە ڕۆژی دوایی، دەشڵێت، نابێت هیچ کەس لەسەر ئەو کارە بێدەنگ بێت، چونکە مەترسیدارە و ئەگەر ئەمە قبوڵ بکرێت گۆڕانکاریی دیکەش دەکرێت.

کەناڵی ناس کورد لە تێلیگرام جۆین بکە   

 

هەورامان گەچێنەیی، سەرۆکی لیژنەی ئەوقاف و کاروباری ئاینی لە پەرلەمانی کوردستان (یەکشەممە 24ی تشرینی یەکەمی 2021) لە کۆنفرانسێکی ڕۆژنامەوانیدا ڕایگەیاند، "بەداخەوە وەزارەتی پەروەردەی حکومەتی هەرێمی کوردستان دەستکاری کردنی پڕۆگرامی وانەی پەروەردەی ئیسلامی خستەبواری جێبەجێکردنەوە و چەندین وانەی گرنگ سەبارەت بە پایە و ڕوکنەکانی ئیمان و عەقیدە، بڕوابوون بەڕۆژی دوایی، قەزاو قەدەر، ئەحکامەکانی سوێن خواردن و باس و خواسی هاوەڵانی ئازیزی پێغەمبەری خوا (د.خ) و چەند بابەتێکی دیکە لەسەر حوکم و سیاسەت لە ئیسلامدا و پیادەکردنی عەدالەتی لە پەروەردەی ئیسلامیی پۆلی نۆیەم لابردووە." 

 

وتیشی، "ئەو بابەتانەی کە لابراون هیچ بۆچوونێکی جیاوازیان لەسەر نییە و هیچ بیانوویەک نییە بۆ لابردنیان، لەگەڵ ئەوەشدا هیچ بابەتێکی دیکە لەجێگەیان دانەنراوە." 

 

سەرۆکی لیژنەی ئەوقاف ئاماژەی بەوەشکرد، "پێشتر دەنگۆی ئەوە هەبوو، من پەیوەندیم بە وەزیری پەروەردەوە کرد، بەڵام ئەو وتی، ئەوە بانگەشەی هەڵبژاردنە و ڕاست نییە، بەڵام ئێستا کتێبەکەمان دیوە و بەداخەوە کە دەستکارییەکی زۆر کراوە." 

 

باسی لەوەشکرد، "من هاووڵاتیان و سەرجەم چین و توێژەکان و حزبە ئیسلامییەکان ئاگادار دەکەمەوە ئەگەر ئەمە بچێتەسەر ئەوا ڕێگەخۆشکەرە بۆ گۆڕانکاریی دیکە، بۆیە پێویستە هیچ کەس لە ئاست ئەمەدا بێدەنگ نەبێت." 

 

هەورامان گەچێنەیی ڕاشیگەیاند، "یەکێک لەو بابەتانەی کە لابردراوە، باوەڕبوونە بە ڕۆژی دوایی، من دەپرسم باوەڕبوون بە ڕۆژی دوایی کە چەندین جار لە قورئاندا باسکراوە کێ بوێری ئەوەی هەبوو لە وانەی پەروەردەی ئیسلامیدا بیسڕێتەوە، لەکاتێکدا زۆرینەی کێشەکانی ئێمە باوەڕنەبوونە بە ڕۆژی دوایی."