ناس کورد-
کوڕێکى د. عەبدولەتیف سەلەفى ئاشکراى کرد، ئەو هەواڵانەى باس لە پشتگیرى سەلەفییەکانى کوردستان دەکەن بۆ کاندیدێکى هاوپەیمانى كوردستان هەڵواسراون و دورن لە ڕاستییەوە.
کەناڵی ناس کورد لە تێلیگرام جۆین بکە
عەبدولحەق کوڕى عەبدولەتیف یەكێك لە ڕابەرانی سەلەفی کوردستان، ئەمڕۆ (28ى ئەیلولى 2021) بە "ناس کورد" ى ڕاگەیاند، "ئەو هەواڵانەى دەربارەی مامم مەلا غەریب ئەحمەد و باوکمەوە بڵاو بوەتەوە سەبارەت بە پشتگیرى و دەنگدان ساختەن و دوورن لە ڕاستییەوە".
عەبدولحەق، لە وەڵامى ئەو پرسیارەى ئایە نوێژخوێنان ئاڕاستە دەکەن دەنگ بە چ کاندیدێک دەدەن، وتى: "وەڵامى ئەو پرسیارە نادەمەوە".
ئەوەشى ئاشکراکرد، تا ئێستا وەکو خۆى بڕیارى نەداوە دەنگدەدات یاخود نا .
ئەمە لە کاتێکدایە، لە هەندێک پەیج وسۆشیال میدیا دەنگۆى ئەوە بڵاوە کە عەبدولەتیف سەلەفى پشتگیرى مەلا غەریب ئەحمەد دەکات کە برایەتی و کاندیدى هاوپەیمانى کوردستانە لە بازنەی رانیە.
لە وەرزەكانی دەنگداندا مشتومڕ و بیروڕای جیاواز لە نێو هێزە ئیسلامی و قوتابخانە سەلەفییەكاندا سەرهەڵدەدات لەبارەی شەرعیەتی خۆ پاڵاوتن و دەنگدان و زۆرینەی سەلەفییەكان لەسەر رەتكردنەوەی حیزبایەتی و حەرامكردنی لە ئیسلامدا كۆكن و لەسەر ئەمەش لەگەڵ لایەنە ئیسلامییەكان بەركەوتنیان زۆرە.
