گه‌ڕان

Shadow Shadow
سیاسه‌تی

فەرمانی دەستگیرکردن بە بەشداربووانی کۆنگرەیەکی هەولێر دەرچوو

2021.09.26 - 10:44
App store icon Play store icon Play store icon
فەرمانی دەستگیرکردن بە بەشداربووانی کۆنگرەیەکی هەولێر دەرچوو

ناس کورد-

ئەنجومەنی باڵای دادوەری عێراق فەرمانی دەستگیرکردنی بۆ سێ لە ڕێکخەرانی و سەرپەرشتیارانی کۆنگرەکەی هەولێر دەرکرد کە تێیدا داوای ئاساییکردنەوەى پەیوەندییەکانی عێراق-ئیسرائیلیان کردبوو.  

کەناڵی ناس کورد لە تێلیگرام جۆین بکە   

 

ناوەندی ڕاگەیاندنی ئەنجومەنی باڵای دادوەری لە ڕوونکردنەوەیەکدا (26ی ئەیلولی 2021) دەڵێت، دادگای لێکۆڵینەوەی بەری کەرخ لەسەر بناغەی ئەو زانیارییانەى کە ڕاوێژکاری ئاسایشی نیشتمانییەوە پێیگەیشتووە فەرمانی دەستگیرکردنی بۆ (ویسام حەردان) کرد بەهۆی ڕۆڵی ناوبراو لە داواکردنی ئاساییکردنەوەى پەیوەندییەکان لەگەڵ ئیسرائیل."

 

دەشلێت، هەروەها فەرمانی دەستگیرکردنی دەرکرد بۆ (میسال ئالوسی) و (سەحەر کەریم تائی) کە فەرمانبەرە لە وەزارەتی ڕۆشنبیرییە بە هەمان تۆمەت.

 

ڕوونکردنەوەکەى ئەنجومەنی باڵای دادوەری جەخت دەکاتەوە کە ڕێکاری یاسایی بەرامبەر هەموو بەشداربووانی تری کۆنگرەکە دەگیرێتەبەر هەرکاتێک ناو و ناسنامەیان ئاشکرا بوو.

 

ڕۆژی هەینی ڕابردوو، 24ی ئەیلولی 2021، زیاتر لە 300 کەسایەتی عەشایەری سونە و شیعەی عێراق کۆنگرەیەکیان لە هەولێر بەست لەژێر ناوی "مؤتمر السلام والاسترداد - کۆنگرەی ئاشتی و چاکبوونەوە"، لە بەیاننامەی کۆتایی کۆنگرەکەدا داوای ئاساییکردنەوەى پەیوەندییەکانی عێراق و ئیسرائیل کرا.  

 

دواتر کاردانەوەیەکی فراوانی حکومی و حزبی و جەماوەری لێکەوتەوە، سەرۆکایەتی کۆمار، سەرۆکایەتی ئەنجومەنی وەزیران و زۆربەى حزبە شیعی و سونییەکان بەیاننامەی ناڕەزایەتییان دەرکرد.  

  

دەستبەجێ سەرۆکایەتی هەرێم، حکومەتی هەرێم و وەزارەتی ناوخۆی ڕاگەیەنراویان دەرکرد و تێیدا ئاماژەیان بەوە کرد کە "ئاگامان لە بەستنی کۆنگرەکە نەبووە و ناوەڕۆکەکەى ڕای حکومەتی هەرێم نییە بەڵکو تەنها بەشداربووانی کۆنگرەکەیە."  

  

سەرچاوەیەكی ئاگادار بە ئەلمەدای راگەیاندووە رێكخەری پشت كۆنگرەی كەسایەتییە عێراقییەكانی هەولێر كەسێكی ئەمەریكی جووە كە لە بنەڕەتدا عێراقییە و ناوی جۆزیف برودییە و سەنتەرێك بەڕێوەدەبات بەناوی "پەیوەندییەكانی ئاشتی".  

 

  

بەگوتەی لێدوانی سەرچاوەكە كە "ناس كورد" بینیویەتی (26ی ئەیلولی 2021) رێكخەرە ئەمەریكییەكە ناوەڕۆكی كۆنگرەكەی ئاشكرا نەكردووە بۆ ئاسایش و دەسەڵاتداران وایانزانیوە لەبارەی هەڵبژاردنەوەیە كە ئێستا باسی گەرمی ڕۆژە.  

  

سەرچاوەكە ئەوەش دەخاتەڕوو، جۆزێف برودی هەندێك كەسایەتی كۆمەڵایەتی كۆكردووەتەوە و لەپڕدا باسی ئاساییكردنەوەی پەیوەندییەكان كراوە لەگەڵ ئیسرائیل و تەنانەت دواتر "مەسعود بارزانی بێئاگایی خۆی دەربڕیوە لە ناوەڕۆكی كۆنگرەكە".  

  

ئەو كەسەی بەیاننامەی كۆتایی دەخوێنێتەوە ویسام حەردان دلێمییە، پێشتر لەسەردەمی مالیكی وەك فەرماندەی هێزەكانی سەحوە دیاری كراوە، پەیوەندی زۆریشی لەگەڵ مالیكی و فەیاز هەیە و لەهەندێ سەردانیشدا لەگەڵ سەدر و حەكیم دەركەوتووە.  

 

ویسام حەردان، سەرپەرشتیاری كۆنگرەكەی هەولێر داوای لێبوردنی كرد و ڕایگەیاند، "بەیاننامەیەكم خوێندنەوە نەمزانی باسی ئاساییكردنەوەی پەیوەندییەكانی تێدایە لەگەڵ ئیسرائیل".

 

سەرۆکایەتی هەرێمی کوردستان ڕوونکردنەوەیەکی لەسەر کۆنگرەکە دەڵێت، سەرۆکایەتیى هەرێمى کوردستان بە هیچ شێوەیەک ئاگادارى کۆبوونەوەکە و ناوەڕۆکى بابەتەکانى نەبووە و ئه‌وه‌ی له‌ کۆبوونه‌وه‌که‌ ده‌رچووه‌، به‌‌ هیچ شێویه‌ک بۆچوون و سیاسه‌ت و هه‌ڵوێستی هه‌رێمی کوردستان نییه‌.  

  

لە لایەكیترەوە هەژماری فەرمی نەفتالی بینیت، سەرۆك وەزیرانی ئیسرائیل بەزمانی عەرەبی پەیامێكی ئاراستەی كۆنگرەی دوێنێی هەولێر كرد و باس لەوە دەكات، "سەدان كەسایەتی عێراقی لەپێناو دروستكردنی ئاشتی لەگەڵ ئیسرائیل كۆبوونەتەوە".  

  

هەژمارەكە "تویتەر" لە پەیامێكدا كە "ناس كورد" بینیویەتی (25ی ئەیلولی 2021) بانگەشەی ئەوە دەكات بەشدارانی كۆنگرە سەدان كەس بوون لە شیعە و سوننە و گرنگییەكەی ئەوەیە لە گەلەوە هاتوون نەك حكومەت و دانیان ناوە بەو ستەمە مێژوییەی لە جووی عێراق كراوە.  

  

سەرۆك وەزیرانی ئیسرائیل دەڵێت، "لە بەرانبەردا ئیسرائیل دەستی ئاشتیتان بۆ درێژ دەكات".