گه‌ڕان

Shadow Shadow
سیاسه‌تی

وردەکاریی

لەپشتەوە لێیدرا..پەکەکە راگەیەنراوێکى لەسەر کوژرانى کادیرەکەى لەسلێمانى بڵاوکردەوە

2021.09.17 - 13:49
App store icon Play store icon Play store icon
لەپشتەوە لێیدرا..پەکەکە راگەیەنراوێکى لەسەر کوژرانى کادیرەکەى لەسلێمانى بڵاوکردەوە

ناس کورد-

کۆمیتەی پەیوەندیەکانی دەرەوەی پەکەکە رایگەیاند، ئەو کادیرەیان کە لەسلێمانى تیرۆرکرا لەپشتەوە لێیدراوە لەکاتێکدا ماڵەکەى بەرەو نەخۆشخانە جێهێشتووە.

کەناڵی ناس کورد لە تێلیگرام جۆین بکە   

 

کۆمیتەکە ئەمڕۆ هەینى لە راگەیەنراوێکدا کە دەست "ناس کورد" کەوتووە ئاماژەى بەوەکردووە، پێویستە حکومەتی باشوور و بەرپرسانی هەرێمی سلێمانی دەستبەجێ ڕاگەیەنراوی بەپەلە بڵاوبکەنەوە و ڕێوشوێنی پێویست بگرنەبەر.

 

دەشڵێت "یاسین بولوت (شوکری سەرحەد) بەرەبەیانی ئەمڕۆ لە بەردەم ماڵەکەیدا لە شاری سلێمانی، بە شێوەیەکی دڕندانە شەهیدکرا، هاوڕێمان یاسین بولوت بەیانی ئەمڕۆ ماڵەکەی بەجێهێشت بۆ ئەوەی بچێتە نەخۆشخانە، لەم کاتەدا کۆنترایەکی تورک لە پشتەوە لێی نزیک بوویەوە، تەقەی لێکرد و شەهید بوو، ئەم کردەوە دڕندانەیە نەک هەر هێرشکردنە بۆسەر ئێمە، هێرشکردنە بۆسەر هەموو خەڵکی باشوور و سەقامگیریی سلێمانی”.

 

بەپێی راگەیەکراوەکە، "ڕۆژێک بەر لە ئەم کردەوە دڕندانەیە، هەمان هێز لە شوێنی کارەکەی هێرشیان کردە سەر نیشتمانپەروەری کورد فەرهاد بارش قۆندو کە پەنابەرێکی سیاسی باکوورە".

 

میدیاى سەر بە پەکەکە بڵاویکردەوە، “یاسین بولوت” ئەندامی کۆمیتەی ماڵباتی شەهیدانی پەکەکە، کە بە ‘شوکری سەرحەد’ ناسراوە، ماوەیەک بوو، بەهۆی کێشەی تەندروستیی، هاتبووە شاری سلێمانی، ئەمڕۆ کاتژمێر ٠٩:٠٠ی بەیانی لە هێرشێکی چەکداریی "میتی تورکیادا" گیانى لەدەستدا.  

  

یاسین  بولوت ساڵی ١٩٥٧ لە شاری قەرسی باکووری کوردستان لەدایک بووە، ساڵی ١٩٧٨ پەکەکەی ناسیوە و لە کاتی کودەتاکەی ١٢ی ئەیلولی ١٩٨٠ـدا لە تورکیا دەستگیرکراوە و لە زیندانی ئامەد زیندانی کراوە.  

  

 یاسین بولوت ساڵى ١٩٩١ روو لە چیاکانى کوردستان دەکات، ماوەی ١٥ ساڵیشە وەک ئەندامی کۆمیتەی شەهیدانی پەکەکە لە باشووری کوردستان کاری کردووە.  

  

بەپێی میدیاى پەکەکە، شوکری، لە ئەنجامی ئەشکەنجەى زینداندا، کێشەی تەندروستیی بۆ دروست بوو و ماوەیەک بوو، بۆ چارەسەریی ئەو نەخۆشییانە هاتبووە شاری سلێمانیی.  

  

سەرچاوەیەکى ئاگادار ئەمڕۆ هەینى بە "ناس کورد" ى راگەیاند، کادیرێکى پەکەکە لە سلێمانى بەناوى "شوکر سەرحەد" تەقەى لێکراوە و دەستبەجێ گیانى لەدەستداوە.    

  

لاى خۆیەوە، سامان نارد بەڕێوەبەرى سەنتەرى فریاگوزاریی سلێمانى بە "ناس کورد" ى راگەیاند، لەرووداوێکى کوشتنى پیاوێک لە گەڕەکى چوارچرا کە لەشەستەکانى تەمەنیدایە ئاگادارکراونەتەوە.    

  

وتیشى ئەو پیاوە لە نزیک فڕنێکى سەمون تەقەى لێکراوە و چوار فیشەکى بەرکەوتووە و دەستبەجێ گیانى لەدەستداوە و تەرمەکەى رەوانەى پزیشکى داد کراوە.    

  

تا ئێستا پۆلیس و دەزگا ئەمنییەکانى سلێمانى هیچ رونکردنەوەیەکیان لەو بارەیەوە نەداوە.