کەناڵی ناس کورد لە تێلیگرام جۆین بکە
ناس کورد- لەدوای بڵاوکردنەوەی ئەنجامی تاقیکردنەوەکانی قۆناغی 12 و ئاشکراکردنی یەکەمەکانی سەر ئاستی هەرێم، بردنە دواوەی کچێکی نیقاب پۆش لە ڕیزی خوێندکارەکاندا ڕەخنەیەکی زۆری لەنێو هاوڵاتیاندا دروستکرد، وا لێكدرایه‌وه كه بەهۆی نیقابەکەیەوە براوەتە دواوە. . هەر لە دوای ئەو ڕەخنانە، وەزارەتی پەروەردە لە ڕوونکردنەوەیەکدا، ڕەتیکردەوە ئەو کچە بەهۆی نیقابەکەیەوە بردرابێتە دواوە و ڕایگەیاند، وەستانی خوێندکارەکان بەپێی ڕیزبەندی نمرەکانیان بووە و خوێندکارە یەکەمەکان لە ڕیزی پێشەوە بوون و ئەو کچەش سێیەم بووە، بۆیە بردراوەتە دواوە. . ڕوونکردنەوەکەی وەزارەتی پەروەردەش هێشتا کاردانەوەکانی کپ نەکردەوە و لە بەدواداچوونێکی ناس کورد کە بۆ ڕیزبەندی خوێندکارەکان ئەنجامیدا، دەرکەوت کە بەپێی ڕیزبەندی نەوەستاون و خوێندکاری پلەی سێیەم هەبوو لە ڕیزی پێشەوە و یەکەمی سەر ئاستی هەرێمیش لە ڕیزی سێیەمدا بوو. . مەنسور قادر موحسین پلەى یەکەمی لە ئاستی پۆلی 12ی زانستی بەدەستهێناوە، بەڵام لە کۆتاییدا نایهێننە پێشەوە و مەنسور لە ڕیزی سێیەمدا دەمێنێتەوە، وێنەکە ببینە. .
وێنە
.
هاوکات پێچەوانەى لێدوانی وەزارەتى پەروەردە، خوێندکار دالیا هاشم کە پلەى سێیەمی هێناوە لە ڕیزبەندییەکەدا لە سەرەتادا لە ڕیزی دواوەیە، بەڵام دواتر دەهێنرێتە پێشەوە بۆ ڕیزی یەکەم.
.
وێنە.....
لە چەند ڕۆژی ڕابردووشدا پشتیوان سادق، وەزیری پەروەردە بانگهێشتی زەینەبی کرد بۆ وەزارەتی پەروەردە بەمەبەستی خەڵاتکردنی و دواتر لە بەرنامەیەکی تەلەفزیۆنیدا ڕایگەیاند، سوپاسی وەزیری پەروەردە دەکات.
.
کچە نیقاب پۆشەکە ئاماژەی بەوەشکرد، ڕووداوەکە بەو شێوەیە نەبووە و خەڵک گەورەیان کردووە و ئەو بەهۆی نیقابەکەیەوە نەبراوەتە دواوە، بەڵکو بەهۆی باڵا به‌رزییەوە براوه‌ته دواوە.
.
قسەکانی زەینەب پێچەوانەی ڕوونکردنەوەکەی وەزارەتی پەروەردەیە کە ڕایگەیاندبوو، بەهۆی ڕیزبەندی نمرەی خوێندکارەکان شوێنەکانیان گۆڕدراوە.
.
هاوکات لێدوانه‌كانی کچە نیقاب پۆشەکە نیگەرانی لەنێو هاوڵاتیاندا لێکەوتەوە و چالاکوانانی تۆڕە کۆمەڵایەتییەکان ئاماژە بەوە دەکەن، زەینەب بەو پشتگیرییە زۆرەی هاوڵاتیانی نەزانیوە کە بۆیان دەربڕیوە و لەجێی سوپاسکردنیان دەڵێت:"خەڵک شتەکەیان گەورە کردووە".
.
