گه‌ڕان

Shadow Shadow
سیاسه‌تی

ئەکتەری پشت ڕووداوەکان

هەیبەتوڵا ئاخوندزادە.. ئەو ڕێبەرەی تاڵیبان كە دوورە لە چاوی كامێرا

2021.09.04 - 14:49
App store icon Play store icon Play store icon
هەیبەتوڵا ئاخوندزادە.. ئەو ڕێبەرەی تاڵیبان كە دوورە لە چاوی كامێرا

ناس كورد-

دەركەوتووترین ڕێبەری ئێستای بزوتنەوەی تاڵیبان مەلا عەبدولغەنی برادەرە، بەڵام لە ڕاستیدا چ ناوبراو و چ سەركردەكانی تری تاڵیبان بریكار و جێگری ڕیبەرێكی باڵان بەناوی مەلا هەیبەتوڵڵا ئاخوندزادە كە بڕیارە لەسەر شێوازێكی نزیك لە خامنەیی ببێتە رابەری باڵای "ئیمارەتی ئەفغانستانی ئیسلامی".

کەناڵی ناس کورد لە تێلیگرام جۆین بکە   

 

سەرچاوەكانی تاڵیبان لە لێدوان بۆ میدیا عەرەبی و جیهانییەكان كە "ناس كورد" بەدواداچوونی بۆكردووە (4ی ئەیلولی 2021) باس لەوە دەكەن ئاخوند زادە دەبێتە ڕێبەری باڵای حكومەتی نوێی ئەفغانستان، رۆڵی ئەویش زیاتر جەختكردنەوە دەبێت لە كاروباری ئاینی و مسۆگەركردنی جێبەجێكردنی شەریعەت، بەڵام هێشتا ناوبراو تەنها یەك فۆتۆی هەیە، باوەڕیش وەهایە هەر لە قەندەهاری مەڵبەندی سەرەكی تاڵیبانەوە كاروباری بزووتنەوەكە هەڵبسوڕێنێت و لە گرتنی كابولیشەوە هیچ لێدوان و هەواڵێكی نییە.

 

مەلا ئاخوندزادە كە پسپۆڕییەكەی یاسایە، لە ساڵی 2016 و پاش كوژرانی مەلا ئەختەر مەنسوری سەرۆكی پێشووی تاڵیبان لە هێرشێكی ئەمەریكادا پۆستی رێبەرایەتی تاڵیبانی وەرگرتووە، بەر لەویش مەلا محەمەد عومەر ڕابەری تاڵیبان بوو، هەر لەسەردەمی ئەویشدا هێرشەكانی 11 سێبتەمبەری قاعیدە و كەوتنی ئەفغانستان بەدەستی ئەمەریكا ڕوویدا و دوای مردنیشی سەركردەكانی تاڵیبان بۆ ماوە دوو ساڵ هەواڵەكەیان بەنهێنی هێشتەوە، كاتێكیش ئاشكرایان كرد خەریكبوو دابەشبوون و جیابوونەوەی گەورە لە ڕیزەكانی بزووتنەوەكە سەرهەڵبدات.

 

بەگوێرەی زانیارییەكانی ئۆرگانەكانی نەتەوەیەکگرتووەکان، ئاخوند زادە سەرۆكی سیستمی دادی تاڵیبان بووە ئەوكاتەی لە نێوان 1996 - 2001 حوكمڕانی ئەفغانستانی كردووە. لەپاش دەستبەكاربوونیشی وەك سەرۆكی تاڵیبان بەهەستیاری جموجوڵی كردووە بۆ یەكخستنەوەی ڕیزەكانی بزوتنەوەكە و بەرگرتن لە پەلكێشانی قاعیدە لە ڕیزەكانی تاڵیبان و پەرتەوازەبوونی چەكدار و لایەنگرانی بزووتنەوەكە.

 

ناوبەناو دەوترێت ئاخوندزادە مردووە، یان توشی كۆرۆنا بووە، چونكە لە كەوتنی كابوڵەوە تا ئێستا هیچ لێدوان و دەركەوتنێكی نییە، بەڵام مەلا زەبیحولڵای وتەبێژی تاڵیبان، چەند رۆژێك بەر لە ئێستا گفتی ئەوەیدا بەم نزیكانە دەربكەوێت. هەندێك پێیانوایە ناوبراو خۆی حەزی لەدەركەوتن نییە بەهەمانشێوەی مەلا محەمەد عومەری سەرۆكی پێشووتر، هەندێكیتر باس لەوە دەكەن ئەمە پلانێكی تاڵیبانە بۆ دروستكردنی كەسایەتییەكی كاریزماتیك بۆ ئاخوندزادە كە زۆر نەكەوێتە بەرچاوی كامێراكان.

 

ئاخوندزادە لە شاری قەندەهاری باشوور دادەنیشێت كە مەڵبەندی سەرەكی تاڵیبانە، خۆیشی هەر لەدایكبووی ئەم شارەیە و لە پێكهاتەی بەشتۆنە كە بڕبڕەی سەرەكی تاڵیبان پێكدەهێنن. بەگوێرەی زانیارییە ئەمەریكییەكانیش لەوانەش (واشنتۆن پۆست) ئاخوندزادە، دەستوەردان لەكاروباری رۆژانەو سەرپێی بزووتنەوەكە ناكات، سێ جێگریشی داناوە كە متمانەی زۆری پێیان هەیە بۆ راپەڕاندنی كاروبارە خێراو كتوپڕەكان كە ئەوانیش: مەلا برادەر و مەلا یەعقوبی كوڕی مەلا محەمەد عومەر و مەلا سیراجەدین حەقانین و لەناو ئەوانیشدا مەلا برادەر دەركەوتووترینە لەڕووی میدیا و دیبلۆماسییەتەوە و بڕیارە ببێتە سەرۆكی ئەو حكومەتەی تاڵیبان لە سەروبەندی ڕاگەیاندنیدایە بۆ ئەفغانستان لەجێگای حكومەتەكەی ئەشرەف غەنی كە دۆست و هاوپەیمانی ئەمەریكا بوو.