گه‌ڕان

Shadow Shadow
سیاسه‌تی

’’گیراوەی پرتەقاڵ و دانیشتنی شەوانە’’

كێشەی هاوسەرۆكانی یەكێتی گەیشتە ’’خاڵی نەگەڕانەوە’’

2021.08.06 - 13:07
App store icon Play store icon Play store icon
كێشەی هاوسەرۆكانی یەكێتی گەیشتە ’’خاڵی نەگەڕانەوە’’

ناس کورد-

پاش نزیكەی مانگێك لە تەقینەوەی ناكۆكییەكانی بافڵ تاڵەبانی و لاهور شێخ جەنگی، زەقكردنەوەی دۆسییەی هەوڵی ژەهرخواردكردنی بافڵ تاڵەبانی و دانانی سیخوڕ لە دەباشان، كێشەكەی بردە قۆناغێكی دژوار، تائێستاش هیچ نێوانگرییەك نەیتوانیوە بەئاراستەی ئەگەری پێكهاتنەوە ناكۆكییەكان ئاراستە بكات، ئەمەش دەرگای بۆ چەند سیناریۆیەكی ئایندەیی لەبەردەم یەكێتیدا كردووەتەوە.

کەناڵی ناس کورد لە تێلیگرام جۆین بکە   

 

دۆسییەكانی ژەهرخواردكردن و دانانی سیخوڕ

بەگوێرەی گێڕانەوەكانی دەباشان بۆ شاند و میوانەكان كە لەچەند سەرچاوەیەكی جیاجیاوە دەست "ناس كورد" كەوتووە (6ی ئابی 2021)، هەوڵی ژەهرخواردكردنی بافڵ تاڵەبانی لەرێگەی گیراوەی پرتەقاڵ و لە دانیشتنێكی بەكۆمەڵی شەوانەی گەشتیاری ئەم هاوینەدا بووە، دواتریش لە یەكێك لە نەخۆشخانە تایبەتەكانی سلێمانی و لەلایەن تیمی پزیشكی بیانییەوە تونراوە بافڵ تاڵەبانی چارەسەر بكرێت كە دەڵێن "بەموعجیزە بووە".

 

 هەر بە گوێرەی ئەم گێڕانەوانەی دەباشان كە بەرەی لاهور شێخ جەنگی بەتوندی ڕەتیدەكەنەوە، سەمپڵی ژەهرەكە هەمان ئەو جۆرەیە كە لە سەلاجەی بارەگای دەزگاكانی دژە تیرۆر و زانیاری، لای یەكێك لە خزم و نزیكەكانی لاهور شێخ جەنگی بووە (ڕەنجە عەلی)، بەڵام سەكۆ ئەلەكترۆنییەكانی لاهور شێخ جەنگی دەڵێن "بەزۆر و ئەشكەنجە دانپێدانانی لێ وەرگیراوە و تۆمەتی بۆ دروستكراوە" هەروەها "لەسەر ئەوەش لە بەریتانیا سكاڵای تۆماركردووە".

 

لە مەسەلەی سیخوڕیكردندا گێڕانەوەكانی دەباشان باس لە دانانی سیخوڕ دەكەن لەناو دەستەی پاسەوانەكانی بافڵ تاڵەبانی، كە پێشتر لە دەستەی پاسەوانەكانی هاوژینەكەی بووە، بەلای ماڵ تاڵەبانییەوە "دانانی سیخوڕ بە بێ رێزیكردن بە ماڵ و یادگاری سەرۆك تاڵەبانی وێنا دەكرێت".

 

 لەمبارەیەوە لاهور شێخ جەنگی جگە لە نكولیكردنی سەراپای گێڕانەوەكانی ژەهر و سیخوڕیكردن، ڕایگەیاندووە لە دادگای سلێمانی سكاڵای تۆماركردووە لەسەر ئەم تۆمەتانەی كە ئاراستەی كراون، لە سەرەتای قەیرانەكەشدا بافڵ تاڵەبانی لەپەیجی تایبەتی خۆی و لەسەر ئارامگای باوكی لە دەباشان باسی سیخوڕیكردنی وروژاند و، دوێنێ (5ی ئابی 2021) لە كۆبوونەوەی سەرۆك هۆز و كەسایەتییە كۆمەڵایەتییەكانیشدا بافڵ تاڵەبانی و قوباد تاڵەبانی جارێكیتر جەختیان لێ كردووەتەوە، ئەمرۆش شاناز ئیبراهیم ئەحمەد دیسانەوە پشتڕاستی كردووەتەوە. 

 

كارتێكەرە دەرەكی و ئیقلیمییەكان

لەسەرەتای قەیران و تێكچوونی پەیوەندی هاوسەرۆكان "ناس كورد" ئەوەی ئاشكراكرد بەشێك لە كێشەكان پەیوەندیدارن بە گوشار و داواكاریی باڵیۆزخانەی وڵاتانانی هاوپەیمان، بەتایبەت لە دۆسییەكانی یەكخستنەوەی پێشمەرگە لەگەڵ یەكخستنی هەڵوێستی كوردی لەبارەی چۆنییەتی مامەڵەكردن لەگەڵ ئێران و توركیا و هێزە شیعەكانی عێراق.

 

لەم میانەیەشدا "ناس كورد" زانیویەتی ئەوەی بەهاری 2020  لە زەینی وەرتێ ڕوویدا كە لاهور شێخ جەنگی ڕەبایەی پێشمەرگەی یەكێتی نزیك لەخۆی بردە بەرامبەر ڕەبایەی هێزە هاوبەشەكانی پێشمەرگە، ئەمەریكی و رۆژئاواییەكانی توڕە و نیگەران كردووە، چونكە ئەو ڕەبایە هاوبەشە بەپێداگری ئەوان چووەتە ئەوێ و ئامانجی تایبەتی لە پشتەوە بووە.

 

لەدەرەوەی ئەمەش راپۆرتەكانی رۆژنامەی ئەلمۆنیتەری ئەمەریكی و سەنتەری ئیمارات بۆ پۆلەتیك (ECP) جەختیان لەوەكردووەتەوە توركیا خۆشحاڵە بەلادانی لاهور شێخ جەنگی بەوپێیەی ئەم هاوسەرۆكەی یەكێتی هاوپەیمان و پاڵپشتی پەكەكە بووە.

 

لەبەرەی ئێرانیشەوە رۆژنامەی "العالم الجدید" ی عێراقی لەزاری سەرچاوەكانییەوە (4ی ئابی 2021) ئاماژەی بەوەكردووە، لاهور شێخ جەنگی هانای بۆ ئێرانییەكان بردووە، بەڵام وەڵامدانەوەی پێویستیان نەبووە و بەدەمییەوە نەهاتوون. پێشتریش ئاژانسی میهری ئێرانی بڵاویكردەوە كە بافڵ تاڵەبانی بژاردەیەكی باشترە بۆ ئێران، زۆر  میدیایتری دەرەوە باس لەوە دەكەن تاران دەتوانێت بەئاسانی گۆڕانكارییەكانی ناو یەكێتی لەگەڵ ئەجێندای خۆیدا بگونجێنێت.

 

لەم میانەیەشدا سەرچاوەكانی "ناس كورد" باس لەوە دەكەن، ئێرانییەكان هەوڵێكیان داوە ئاراس شێخ جەنگی لە كۆبوونەوە و چارەسەرەكاندا هەبێت، بەڵام بافڵ تاڵەبانی ڕەتیكردووەتەوە، ئەوانش پێداگری زۆریان نەكردووە.

 

لای خۆشییەوە لاهور جەنگی جەخت لەوە دەكاتەوە، ئەوەی ڕوویداوە "پلانگێڕی توركی - پارتییە لەدژی" بەهاوكاری ئەوانەی كە ئێستا لەناو یەكێتیدا جێبەجێی دەكەن.

 

ئایندەی كێشەی هاوسەرۆكان

ناس كورد زانیویەتی هەموو هەوڵەكانی نێوانگری بەئاراستەی ئەگەری پێكهاتنەوە گەیشتوونەتە بنبەست، پاش نزیكەی یەك مانگیش لە تەقینەوەی كێشەكان هیچ گوشار و كاردانەوەیەكی دەرەكی بەهێز بەدی ناكرێت.

 

لاهور شێخ جەنگی داوای لیژنەی لێكۆڵینەوە دەكات لەسەر ئەو تۆمەتانەی ئاراستەی كراون، لەچەند ڕۆژی ڕابردووشدا بریكارنامەی گشتی بۆ پارێزەرێكی خەڵكی سلێمانی كردووەتەوە، بۆ ئەوەی لە سكاڵاكردنەكانی و بەرگریكردندا لەبری ئەو بەشداری بكات.

 

هەروەها لە دوا دەركەوتنیشیدا لەگەڵ مامۆستایانی ئاینی (5ی ئابی 2021) داوای چارەسەركردنی ئاشتیانە و پەیڕەوییانەی كێشەكانی كردووە، بەڵام بافڵ تاڵەبانی و قوباد تاڵەبانی پێداگرن لەسەر ئەوەی نەگەڕێنەوە بۆ پاش 8 ی تەمموز و جارێكیتریش ڕێگە نەدەن هیچ كەس لەدەرەوەی ماڵی تاڵەبانی هەڵبكشێت بۆ لوتكەی یەكێتی، هەر بەم ئاراستەیەش سەرقاڵی گۆڕینی سیستمی هاوسەرۆكایەتین و لە رێگای چەند لیژنەیەكەوە خەریكی داڕشتنەوەی پەیكەری یەكێتین بەبێ ئەوەی كەمكردنەوە لە سەركردایەتی و ژمارەی كادرانی ئێستا بكەن.

 

ئایندەی یەكێتی لەسەردەمی بافڵ تاڵەبانی

لەسەر ئاستی ناوخۆ گەورەترین تەحەدای دەم و دەستی بەردەم بافڵ تاڵەبانی و قوباد تاڵەبانی هەڵبژاردنە چاوەڕوانكراوەكەی تشرینی یەكەمی داهاتووە، بەهۆی ئەوەی بەشێكی بەرچاو لە كاندیدانی پەرلەمانی عێراق باڵی لاهور شێخ جەنگین بەتایبەت كەركوك، هەروەها هێشتا بەفەرمی لاهور شێخ جەنگی سەرۆكی هاوپەیمانی كوردستانە، كێشەی زۆر لەمامەڵەكردن لەگەڵ ئەم وێستگەیە دروست بووە.

 

لەسەر ئاستی دوور مەوداش راپۆرتە ڕۆژنامەوانییە دەرەكی و ناوخۆییەكان، یەكدەنگن لەسەر ئەوەی قۆناغی داهاتوو پەیوەندییەكانی پارتی و یەكێتی باشتر دەبن.

 

 بەرپرسە باڵاكانی یەكێتی لەوانە جەمیل هەورامی باس لەگەڕانەوە بۆ رێككەوتننامەی ستراتیژی نێوان هەردوو حیزب دەكەن، بەڵام لەسەر ئاستی ناوخۆی حیزب زۆر شت هەن بە ناڕوونی ماونەتەوە، لەم میانەیەشدا مەلا بەختیار لەدوا بڵاوكراوەیدا (5ی ئابی 2021) باس لەوە دەكات كێشەكانی ناوخۆی یەكێتی چوونەتە قۆناغێكی نوێی ململانێ.

 

هەروەها زانیارییە بەردەستەكانیش ئاماژە بە جموجوڵی بەرچاوی سەركردە دێرینەكانی یەكێتی دەكەن، ئەو جەمسەرانەی ناو یەكێتیش كە لاهور شێخ جەنگی كاڵی كردبوونەوە ئێستا دیسان هاتووەنەتەوە پێشەوە (كەركوكییەكان، كۆسرەت رەسوڵ، شێخ جەعفەر، جافەكان و....هتد).

 

جگە لەمانەش چۆنییەتی ئیدارەدانی بنكەی جەماوەریی دژە پارتی ناو یەكێتی و مامەڵەكردن لەگەڵ هێڵی لاهور شێخ جەنگی هێشتا هەر جێگەی پرسیار و مشتومڕی گەورەی بەردەم ئەو یەكێتییە نوێیە كە بافڵ تاڵەبانی چەند جارێك باسی كردووە. لەلایەكیتریشەوە سەنتەری ئیمارات بۆ پۆلەتیك باس لەوە دەكات جگە لەكێشە ناوخۆییەكان یەكێتی بەردەوام لەمەولاش هەر ڕووبەڕووی بزاڤ و جموجوڵی نوێی رەخنەگر و ئۆپۆزسیۆن دەبێتەوە كە بەشێكن لە سروشتی دانەبڕاوی شارەكە.