گه‌ڕان

Shadow Shadow
سیاسه‌تی

وردەکاریی

زیانی ئاگری دارستانەکانی تورکیا لەسەر هەرێمی کوردستان چییە؟

2021.07.31 - 21:07
App store icon Play store icon Play store icon
زیانی ئاگری دارستانەکانی تورکیا لەسەر هەرێمی کوردستان چییە؟

ناس کورد- هەڤاڵ فەتاح

وتەبێژی دەستەی ژینگەی هەرێمی کوردستان دەڵێت، سوتانی دارستانەکانی تورکیا کاریگەریی نەرێنی دەبێت بۆ سەر ژینگە و کەشوهەوای هەرێمی کوردستان، دەشڵێت، ئەگەری هەیە ئەو گازە زیانبەخشانەی کە لە ئاکامی دوکەڵی ئاگرەکەدا دروست بووە با بیگوازێتەوە بۆ ئاسمانی هەرێم و ببێتە هۆکاری دروست بوونی" ترشە باران" کە ئەوەش زیانێکی زۆری مەترسیداری هەیە.

کەناڵی ناس کورد لە تێلیگرام جۆین بکە   

 

ماوەی چەند رۆژێکە ئاگر لەدارستانەکانی ژمارەیەک ناوچە و شاری وڵاتی تورکیا کەوتووەتەوە و لەئاکامدا  بەهەزاران دۆنم زەوی و سەوزایی سوتاون و زیانێکی زۆری لێکەوتووەتەوە. 

 

ئەحمەد محەمەد، وتەبێژی دەستەی ژینگەی هەرێم ( 31ی تەموزی 2021) لە لێدوانێکدا بۆ"ناس کورد"ڕایگەیاند، "هەموو ژینگەی جیهان بەستراون بەیەکەوە یەک زنجیرەیە، دوریی سنورەکان بەربەست نابن لە گەیاندنی زیان بە بەشەکانی دیکە  ئەگەر هاتوو ژینگەی وڵاتێک یان ناوچەیەک دووچاری کارەساتی ژینگەیی ببێتەوە." 

 

وتیشی، "سوتانی دارستانەکانی تورکیا کاریگەریی نەرێنی دەبێت بۆ سەر ژینگە و کەشوهەوای ناوچەکە و هەرێمی کوردستان، دارستانەکان لەهەر شوێنێکی جیهاندا بن هاوشێوی سییەکانن وهەوای پاک دروست دەکەن و کاریگەری  ئەرێنی هەیە بۆ کەمکردنەوەی پلەکانی گەرما".

 

ئاماژەی بەوەشکرد، "هەرچەندە سنورەکانی وڵاتی ئیتاڵیا بەراورد بە وڵاتی تورکیا لەهەرێمی کوردستانەوە دوورن، بەڵام  چەند ساڵێک لەمەوبەر کاتێک  گڕکانەکانی ئەو وڵاتە هەڵچوون پاشماوەی ئەو دوکەڵ و گازانەی کە گڕکانەکان هەڵیاندابوو دوای ماوەیەک گەیشتە ئاسمانی هەرێم، هەروەها لە سەرەتای نەوەدەکانیش کاتێک عێراق بیرە نەوتییەکانی وڵاتی کوەیتی سوتاند دوای ماوەیەک دوکەڵ و گازی ئەو سوتانە گەیشتە ئاسمانی هەرێم و ناوچەکە و زیانی بەرچاوی لە کەشوهەوای هەرێم دا".

 

وتەبێژەکەی دەستەی ژینگەی ئەوەشی خستەروو، " ئەو گازە زیان بەخشانەی کە لە ئەنجامی سوتانی داراستەکان و پاوانەکاندا دروست دەبێت، ئەگەری هەیە ببێتە هۆکاری دروستبوونی دیاردەی (ترشە باران) کە زیانێکی ئێجگار گەورەی دەبێت لەسەر تەندروستی مرۆڤ، زیندەوەرەکان بەگشتی، بەروبوومە کشتوکاڵییەکان ".  

 

ئاگرەکانی دارستەکانی تورکیا تائێستاش سەرباری هەوڵەکان، کۆنترۆڵ نەکراوە و بەردەوامە لەپەرەسەندن کەئەوەش وایکردەوە زانایان و چالاکوانانی ژینگە بەزەبەرێکی کوشندەی لە قەڵەم بدەن بۆ ژینگەی ناوچەکە و پێشبینی ئەوە دەکەن کاریگەرییە نەرێنییەکانی چەندین ساڵ بەردەوام بێت.