بارزانی پۆستەکەى ڕادەستى برازاکەى کرد، ئەى بارەگاکەى؟ [تایبه‌ت]

کەناڵی ناس کورد لە تێلیگرام جۆین بکە   

ناس كورد- هەرچەندە نێچیرڤان بارزانی لە ڕێوڕەسمێکدا کە زیاتر لە هەزار میوانی بیانی و ناوخۆیی ئامادەی بوون و وەک سەرۆکی هەرێمی کوردستان لە هەولێر سوێندی یاسایی خوارد، هێشتا لە شوێنی مانەوەی پێشووی خۆیەتی لەناو ئەنجومەنی وەزیران و لەوێ دەوام دەکات. . ڕۆژی 10ی ئەم مانگە نێچیرڤان بارزانی وەک دووەم سەرۆکی هەرێم لە خوولی سێیەمی سەرۆکایەتیدا دەستبەکاربوو، پاش ئەوەی ماوەی دوو ساڵ بوو پۆستەکە بە بڕیارێکی مەسعود بارزانی سەرۆکی ئەوکاتەی هەرێم، سڕکرابوو. . بۆماوەی 13 ساڵ، پیرمام بوبویە شوێنی دیدارە گەرمەکانی بارزانی و ناوەندی بڕیارە سیاسیەکانی هەرێمی کوردستان، بەڵام لە 2017دا لێکترازانی لایەنەکان گەیشتە لووتکە و ڕووداوەکانی 16ی ئۆکتۆبەری ئەو ساڵە، جوگرافیای هەرێمی گەڕاندەوە بۆ 14 ساڵ لەوەوپێش. . لەنێوان دەسەڵاتی پێشووی بارزانی مام و دەسەڵاتی ئێستای بارزانی ئامۆزادا، بارەگای سەرۆکایەتی هەرێم و تەواوی خزمەتگوزاری و مومتەلەکاتی دیوانی سەرۆکایەتی هەرێم تائێستاش بەنادیاری ماونەتەوە و پێچەوانەی هەموو نەریت و مەرسومە فەرمییەکان، نێچیرڤان بارزانی لە کۆشکە نوێکەیدا دەستبەکار نەبوو، بەڵکو تا ئێستاش شوێنە کۆنەکەی لەناو بینای ئەنجومەنی وەزیراندا بەکاردەهێنێت و لەوێ دیدارو کۆبوونەوەکانی ئەنجام دەدات. . سەرەڕای ئەوەش، تائێستا هەواڵ و چالاکییەکانی نێچیرڤان بارزانی وەک سەرۆکی هەرێم لە ماڵپەڕی فەرمی سەرۆکایەتی هەرێمدا بڵاونەکراوەتەوە، لەکاتێکدا هەواڵی سەردان و ڕاگەیەنراوەکانی مەسعود بارزانی لە دوای دەستبەرداربوونیشی لە پۆستی سەرۆکی هەرێمدا لە ماڵپەڕەکە بڵاودەکرانەوە. . بەپێی زانیارییەکانی ناس کورد، زۆربەی دیدارو کۆبونەوەکانی بارزانی لەدوای دەستبەکاربونیشی، هەر لەناو ئەو بینایە ئەنجام دەدرا. . ناس کورد زانیویەتی، باڵەخانەیەکی 12 نهۆمی لەسەر ڕووبه‌ر‌ی ‌شەش هه‌زار مه‌تر دووجا لەسەر شەقامی 40 مەتری شاری هەولێر بۆ بارەگای سەرۆکایەتی هەرێم دیاریکراوەو لەئێستادا کاری نۆژەنکردنەوەی بۆ دەکرێت، بەڵام هەفتەی ڕابردوو بەهۆکارێکی نەزانراو تەواوی ئەو کەرەستانە سووتان کە بۆ نۆژەنکردنەوەکە بەکاردەهات. . باڵەخانەکە لەنزیک بینای ئەنجومەنی وەزیران و نزیک کونسوڵخانەی تورکیا، هەرچەندە باڵەخانەکە بۆ وەزارەتی سامانە سروشتییەکان دروستکرا، بەڵام لەماوەی چوار ساڵی رابردوودا تەنها ستافێکی ئەو وەزارەتە لەو بینایە دەوامی کردووە. . وێنه‌ی باڵه‌خانه‌ نوێكه‌ی سه‌رۆكایه‌تی هه‌رێمی كوردستان له‌ هه‌ولێر. .