ناس کورد-
وتەبێژی ئەنجومەنی وەزیرانی عێراق ڕایگەیاند، وڵاتەکەی هەنگاوی گەورەی ناوە لەگفتوگۆکانی لەگەڵ ئەمەریکا لەبارەی پاشەکشەی هێزەکانی ئەو وڵاتە لە عێراق و ئاماژەی بەوەشکرد، هەنگاوەکانی داهاتووی حکومەت جەخت دەکەنەوە لەسەر بنیادنانەوەی وڵاتەکە .
کەناڵی ناس کورد لە تێلیگرام جۆین بکە
حەسەن نازم، وتەبێژی حکومەتی عێراق (هەینی 30ی تەموزی 2021) لەمیانەی چاوپێکەوتنێکدا لەگەڵ کەناڵی فەرمیی عێراقییە ڕاگەیاند، " لەماوەی یەک ساڵی ڕابردوودا گفتوگۆکانمان لەگەڵ ئەمەریکا پەیوەست بوون بەکۆتاییهێنان بەبوونی هێزە شەڕکەرەکانی ئەو وڵاتە لە ناو خاکی عێراق، بۆیە دەبێت لە هەنگاوەکانی داهاتوودا جەخت بکەینەوە لەسەر بنیادنانەوەی کەرتەکانی ئابوری و فێرکردن و ڕۆشنبیری بەهاوکاری ئەو وڵاتە".
لەبارەی ناوەڕۆکی ئەو گفتۆگۆ ئابورییانەی کە عێراق ئەنجامیداوە لە واشنتۆن، نازم وتی، " هەردوو دۆسییەی کارەبا و نەوت پشکی شێریان بەرکەوتووە لە دانوستانەکاندا و هاوکات جەختیشمان کردووەتەوە لەسەر پێدانی متمانە بە کۆمپانیا بیانییەکان لەڕووی فەراهەم کردنی ئاسایش و سەلامەتی بۆیان لەکاتی کارکردنیان لەناو خاکی عێراقدا".
حەسەن نازم باسی لەوەشکردووە، "قۆناغی نوێی پەیوەندییەکانمان لەگەڵ ئەمەریکا دەست پێدەکات."
ئەوەشی خستە ڕوو، "بەڵێن بەکۆمپانیا بیانی و ئەمەریکییەکان دراوە کە بەشێوەیەکی ڕاستەوخۆ ڤیزایان پێ بدرێت لە فڕۆکەخانەکاندا ئەوەش لەپێناوە هاندانی وەبەرهێنانی بیانی لە عێراق".
لەدوای کۆبوونەوەی مستەفا کازمی و جۆ بایدن، لە ڕۆژی دووشەممەی ڕابردوو، هەردوولا ئەوەیان ڕاگەیاند کە کۆتایی ئەمساڵ چالاکیی هێزە شەڕکەرەکانی ئەمەریکا لە عێراق کۆتایی دێت.
