گه‌ڕان

Shadow Shadow
سیاسه‌تی

گرژی زیاتر بەڕێوەیە

ناس زانیاری لەبارەی دوا پەرەسەندنی كێشەی هاوسەرۆكان ئاشكرا دەكات

2021.07.23 - 11:33
App store icon Play store icon Play store icon
ناس زانیاری لەبارەی دوا پەرەسەندنی كێشەی هاوسەرۆكان ئاشكرا دەكات

ناس کورد- 

لە ئێوارەی پێش جەژنەوە هەڵمەتی میدیایی و پەیام گۆڕینەوە لەنێوان هاوسەرۆكانی یەكێتیدا بەردەوامە و  ئاماژەكانیش بەرەو ئەوەن لەگەڵ كۆتاییهاتنی پشووی جەژندا دۆخەكە گرژتر دەبێت و لەلایەن ماڵی تاڵەبانییەوە قۆناغێكی نوێی بەریەككەوتن بۆ یەكلاییكردنەوە و چەسپاندن دەستپێبكات كە هەڵدانەوەی هەندێك دۆسییە لەخۆدەگرێت.

کەناڵی ناس کورد لە تێلیگرام جۆین بکە   

 

ناس كورد لەزاری چەند سەرچاوەیەكی سیاسی ئاگادارەوە زانیویەتی (23 تەمموزی 2021) پەیامەكانی لاهور شێخ جەنگی هاوسەرۆكی یەكێتی لە ئێوارەی جەژن (19 تەمموز) و هەڵمەتە میدیاییەكانی هەندێ لەو پەیجانەی ماوییەتی لە دوو ڕۆژی دوای جەژنیدا، پەرچەكرداری توندی لەماڵ تاڵەبانییەوە بەدوادا هاتووە و شەوی ڕابردوو گەیشتە دەستگیركردنی بەڕێوەبەری ناحیەی بەکرەجۆ و سەرۆکی شارەوانی ڕاپەڕین، لە دۆسیەی 10 هەزار پارچە زەوییەكەی دژە تیرۆر لەگەڵ دەستبەسەرداگرتنی خانووی بەرێوەبەری یەكێك لە پرۆژە میدیاییەكانی لاهور شێخ جەنگی كە پێی بەخشراوە و بەهاكەی زیاترە لە نیو ملیۆن دۆلار. 

 

بەگوێرەی ئەو زانیارییانەی دەست ناس كەوتوون، بافڵ تاڵەبانی و ستافی دەوروبەری ماڵ تاڵەبانی بەدرێژایی ڕۆژانی ڕابردوو سەرقاڵی ئامادەكاریی بوون بۆ چەسپاندنی گۆڕانكارییەكان و گرتنەبەری چەند هەنگاوێكی توندتر لەگەڵ كۆتاییهاتنی پشووی جەژن، بەرامبەر بەمەش لاهور شێخ جەنگی لەماڵەكەی خۆی هەر سەرقاڵی پێشوازیكردن لە هەندێك لەو كادر و هەوادارانەی خۆی بووە كە بۆ پشتگیریكردنی سەردانیان كردووە.

 

سەرچاوە جیاجیاكانی ناس ئاماژە بەوە دەكەن ئەوەی تا ئێستا یەكلاییە و كاری لەسەردەكرێت كۆتاییهێنانە بە سیستمی هاوسەرۆكی لەناو یەكێتی لەرێگەی سەركردایەتی و هەمواری پەیڕەوی ناوخۆوە، پاشان هەڵدانەوەی هەندێ دۆسییەی پەیوەستە بە بەكارهێنانی دژە تیرۆر و زانیاری بۆ دەسكەوتی دارایی و خەرجكردنی دارایی یەكێتییە لە دروستكردنی جۆرەها پڕۆژەی سۆشیال میدیای سێبەرو نەناسراو كە لەدوو ساڵی ڕابردوودا كێشەی زۆریان بۆ ماڵی تاڵەبانی دروستكردبوو. لەم میانەیەشدا زانیارییە بەردەستەكان ئاماژە بەوەدەكەن ئەو كەناڵەی لاهور شێخ جەنگی بەنیازبووە بیكاتەوە، تا رۆژی داخستنی زیاتر لە ٩ ملیۆن دۆلاری تێچووە، لەو پارەیەش زیاتر لە ٤ ملیۆن و ٥٠٠ هەزار دۆلار بۆ ئامێر و كەرەستە بووە، مووچەی مانگانەی كارمەندانی كەناڵەكەش دەوروبەری 750 ملیۆن دینار بووە، لەئێستاشدا لێكۆڵینەوە لەوەدەكرێت وەك پرۆژەیەكی میدیایی یەكێتی بمێنێتەوە یان دابەش بكرێت بەسەر كوردسات و گەلی كوردستاندا. 

 

هەر بەگوێرەی زانیارییەكانی ناس، لێپیچینەوە لەهەندێ میدیاكارانی نزیك لەلاهور شێخ جەنگی پەیوەندی بە زانیارییەكانی پەیوەندییانەوە هەیە بەو پەیج و ئەكاونتە سێبەر و سوپا ئەلەكترۆنییەی كە لاهوری شێخ جەنگی هەیبووە، دەستبەسەرداگرتنی خانووی بەڕێوەبەری كەناڵی ئای پڵەسی لاهور شێخ جەنگیش هەر لەم چوارچێوەدایە، بڕیاری بافڵ تاڵەبانیش بەو ئاراستەیە ئەوانەی لە سۆشیال میدیای لاهور شێخ جەنگی كاریانكردووە و میدیاكار یان رۆژنامەنووس نین و بەرهەمی رۆژنامەنوسییان نەبووە جێگەكردنەوە لە مەكتەبی ڕاگەیاندنی یەكێتی نەیانگرێتەوە. 

 

پاش ئەوەی لاهوری شێخ جەنگی، هاوسەرۆكی یەكێتی ئێوارەی پێش جەژن (19 تەمموزی 2021) جەختی لەوەكردەوە هاوسەرۆكی یەكەمە و بەشێوەیەكی كاتی دەستبەرداری دەسەڵاتەكانی بووە، سەرچاوە میدیاییەكانی ماڵی تاڵەبانی چەند دڵنیاییەكیان بڵاوكردەوە كە چیتر گەڕانەوە بۆ سیستمی هاوسەرۆكی نییە. ئەم سەرچاوانە جەختیان لەوەش كردەوە "یەكێتی گەیشتوەتە بڕوای ئەوەی بافڵ تاڵەبانی بكاتە سەرۆك".

  

میدیاكانی بافڵ تاڵەبانی لاهوری شێخ جەنگی بەوە تۆمەتبار دەكەن كە ئاسۆی برای "10 هەزار پارچە زەوی بەناوی دژە تیرۆرەوە وەرگرتووە بەبێ ئەوەی پارچەیەكیشیان پێ بدات". هەروەها باس لەوە دەكەن 12 هەزار پێناسی ساختەی دژە تیرۆر بۆ خەڵك كراون تا بۆ مەبەستی تایبەت بەكاریبهێنن لە كاتێكدا ژمارەی كارمەندانی ئەم دەزگایە 2 هەزار كەسن.


میدیای لاهور شێخ جەنگی باس لەوە دەكەن ناوبراو زۆرترین جەماوەری حزبی هەیە (902 دەنگی كۆنگرە)، دەبوو ئەویش سەرۆكی یەكێتی بێت، بە زەبری هێزیش دوورخراوەتەوە لە هاوسەرۆكی، لەم كێشمەكێشەشدا هێزی شێخ جەعفەر بەكارهاتووە كە پێشتر كێشە و گرێ و گۆڵی ئەمنییان لە سلێمانی دروستكردووە. هەروەها ئەوەی ڕوودەدات پلانگیڕی توركیا و پارتییە و ئامانج لێی دەستبەسەرداگرتنی یەكێتییە.  

  

زیاتر بخوێنەرەوە؛ ئاژانسی پاراستن و زانیاری / زانیاری: ئەم کەسانە دەستگیردەکرێن

 

 

ئەم زبربوونەی گوتاری ململانێكانی هاوسەرۆكانی یەكێتی و بەریەككەوتنە توندە لە كاتێكدایە لە (15 تەمموزی 2021) هەردوولا بە ئامادەبوونی ئەندامانی مەكتەب سیاسی كۆنووسی گواستنەوەی دەسەڵاتەكانیان واژوو كرد و لەسەر ئەوەش ڕێككەوتن لەماوەی داهاتوودا پەیڕەوی ناوخۆی یەكێتی هەموار بكەنەوە بە ئاراستەی سیستمی سەرۆكایەتی.

 

بەگوێرەی ئەو زانیارییانەشی كە دزەی پێكرا لە پاش كۆبوونەوەكە دەبوو هەردوولا پابەندی بێدەنگی بن، بەڵام وا دیارە ڕەوشی ڕووداوەكان بەمجۆرە بەڕێوە ناچێت و تۆمەتەكان ڕۆژ لەدوای ڕۆژ هەڵكشانی زیاتر بەخۆیانەوە دەبینن.  

 

زیاتر بخوێنەرەوە: ڕاگەیەنراوێک لە دژەتیرۆری یەکێتییەوە: ئەو کارانە لە دەرەوەی ویستی ئێمە کراوە