گه‌ڕان

Shadow Shadow
سیاسه‌تی

زانیارى زیاتر

ئەنجامی كۆبوونەوەی هاوسەرۆكان: پەیامی ئاگرین و قووڵكردنەوەی دابەشبوون

2021.07.12 - 10:12
App store icon Play store icon Play store icon
ئەنجامی كۆبوونەوەی هاوسەرۆكان: پەیامی ئاگرین و قووڵكردنەوەی دابەشبوون

ناس کورد-

كۆبوونەوەی ئێوارەی یەكشەممەی هاوسەرۆكانی یەكێتی وەك هیوایەكی گەورە بۆ نزیكبوونەوەی هەردوولا ڕاگەیەنرا، بەڵام لە دوای نیوە شەو بەپەیامێكی توندی ئاگرینی لاهور شێخ جەنگی كۆتاییهات كە جگە لەهێرشی زۆر بۆ سەر مەلا بەختیار هەنگاوەكانی ئەمدواییەی بافڵ تاڵەبانی بە پلانگێڕی پارتی و توركی لێكدایەوە.

 

کەناڵی ناس کورد لە تێلیگرام جۆین بکە   

 

یەكشەممە (11 تەمموزی 2021) ڕۆژێكی درێژ و پڕ لە پەرەسەندنی كێشمەكێشی هاوسەرۆكانی یەكێتی نیشتمانی، باقڵ تاڵەبانی و لاهور شێخ جەنگی بوو، بەدرێژایی ڕۆژ وێنە و ڤیدیۆكانی جێگیركردنی گۆڕانكارییەكانی بافڵ تاڵەبانی لە دەزگای زانیاری و دژە تیرۆر هەواڵی سەرەكی میدیا و سۆشیال میدیای یەكێتی و دەرەوەی ئەم حیزبەش بوون، لەبەرامبەریشدا میدیا و سۆشیال میدیاكانی لایەنگری لاهور شێخ جەنگی بەبێدەنگی ئەم پێشهاتانەیان بەڕێكرد.

 

ئێوارەی دوێنێ سەرچاوەكانی نوسینگەی لاهور شێخ جەنگی بەپەلە هەواڵی كۆبوونەوەی هەردوو هاوسەرۆكیان وەك هیوایەك بۆ چارەسەر ڕاگەیاند، بەڵام لەدوا نیوەشەو ڕاگەیەنراوێكی ئاگرینی لاهور شێخ جەنگی هەموو خۆشبینی و ئەگەرێكی بۆ چارەسەركردنی دەمودەستی ناكۆكییەكان دایە بەر با.

 

زانیارى زیاتر...دوا پەرەسەندنی كێشمەكێشی هاوسەرۆكان: بوو بەشەڕی وێنە

 

لە پەیامەكەیدا لاهور شێخ جەنگی ڕووداوەكانی ئەمدواییەی ناوخۆی یەكێتی و گۆڕانكارییەكانی بافڵ تاڵەبانی دەبەستێتەوە بە پلانگێڕی و "خەنجەری ژەهراوی" پارتی، هێرشی زۆریش دەكاتە سەر مەلا بەختیار بەوپێیەی دەوترێت لای بارزانی ئامادەكاریی بۆ ئەم دۆخە كردووە، توركیاش دەكات بە لایەنێكی كێشەی یەكێتی، لە كۆتاییشدا پەنا بۆ جەماوەری یەكێتی دەبات كە "ڕێگە نادەن یەکێتیی لاواز ببێت". ئەم لێكدانەوەیەش لە كاتێكدایە هەڵمەتی بافڵ تاڵەبانی و لەگەڵیدا قوباد تاڵەبانی سەرۆكی تیمی یەكێتی لە حكومەت، گۆڕانكارییەكانی ئەم دواییە دەبەستنەوە بە چاكسازی كردن و هەوڵی رێگەگرتن لە دیاردەی قاچاخچێتی سنور و فڕۆكەخانە و جەختكردنەوە لەدوورخستنەوەی دەزگا ئەمنییەكان لە دەستوەردان لە كاروباری سیاسی.

 

كێشمەكێشی هاوسەرۆكانی یەكێتی پێی نایە قۆناغێكی نوێوە

 

میدیا فەرمییەكانی یەكێتی خۆیان بوارد لە بڵاوكردنەوەی پەیامەكەی لاهور شێخ جەنگی لەكاتێكدا ئەو هێشتا هەر هاوسەرۆكی ئەم حیزبەیە بە فەرمی، ئەمە لەكاتێكدا پێشتر بەگرنگییەوە ڕووماڵی سەردانەكانی بافڵ و قوباد تاڵەبانییان كرد بۆ دەزگاكانی زانیاری و دژە تیرۆر و دانانی بەرپرسە نوێیەكان، ئەمەش قووڵبوونەوەی زیاتری ناكۆكییە حزبییەكان دەردەخات، پێشتریش لایەنگرانی لاهور هەڵمەتێكی گەورەیان بۆ هاوپێچكردنی وێنەی هاوسەرۆك بەڕێوەبرد لە دیواری میدیا فەرمییەكانی یەكێتی لە فەیسبوك، بەمەش كێشمەكێش و ململانێ ناوخۆییەكەی یەكێتی بەرۆكی بەدەزگا میدیاییەكانی حیزب گرت.

 

ناس زانیاری زیاتر لەبارەی پەرەسەندنی كێشمەكێشی هاوسەرۆكانی یەكێتی بڵاو دەكاتەوە

 

سەرچاوەكانی نزیك لە نووسینگەی لاهور شێخ جەنگی جەخت دەكەنەوە كۆبوونەوەی ئێوارەی یەكشەممە ( 11 تەمموزی 2021) بۆ بیروڕاگۆڕینەوە بووە، ئەمڕۆش گەڕی دووەمی بەدوادادێت و ئەگەر نەگەنە رێككەوتن هەریەك پەیامی خۆی بڵاو دەكاتەوە، بەڵام لەبەرەی بافڵ تاڵەبانییەوە هیچ گرنگییەك بە كۆبوونەوەكە نەدراوە و تەنانەت نەشكرا بەهەواڵ وەك ئەوەی لە شۆشیال میدیاكانیان بڵاوی دەكەنەوە بووبێتە بڕوا لەلایان كە بڕیاردەری یەكەمی یەكێتی لە ئێستادا بافڵ تاڵەبانییە و لە ئێستادا هەردوولایان هاوئاست و یەكلاكەرەوە نین.

 

چوارەم ڕۆژی كێشەی هاوسەرۆكان: شەڕكردن بە میدیا و سۆشیال میدیا

 

پێنج ڕۆژە كە ناكۆكییە دوو قۆڵییەكانی هەردوو هاوسەرۆك پەرەیان سەندووە، ئۆرگانە فەرمییەكانی یەكێتی (سەركردایەتی، مەكتەب سیاسی، ئەنجومەنی باڵای بەرژەوەندی) بێدەنگن و هیچ جموجوڵێكیان نییە، بەڵام بەرپرسان و پەرلەمانتارانی یەكێتی هەریەك بەجۆرێك خۆیان لەم كێشمەكێشەدا ساغ دەكەنەوە بەلایەكدا و لەهەمووی زەقتر یەكلاییبوونەوەی باڵی كۆسرەت ڕەسوڵە بۆ پشتیوانیكردنی ماڵی تاڵەبانی و هاوهەڵوێستی ژمارەیەك پەرلەمانتار و بەرپرسیترە لەگەڵ لاهور شێخ جەنگی.

 

ناس زانیاری لەبارەی بەریەككەوتنی هاوسەرۆكانی یەكێتی بڵاو دەكاتەوە

 

ڕووداوەكانی ناو یەكێتی خێراو كتوپڕن، بەڵام بەوپێیەی ئەم حیزبە بەزۆر ئەزمونیتری هاوشێوەدا گوزەری كردووە لە چەند ساڵی ڕابردوو (باڵی ریفۆرم، جیابوونەوەی گۆڕان، ناوەندی بڕیار)، هێشتا هەن پێیانوایە دەكرێت دەرچەیەك بۆ ناكۆكییەكانى ئەمدواییەش بدۆزرێتەوە، ڕەنگە یەكلاییبوونەوەی ئەمەش ئەمڕۆ یان سبەی لە دووەم كۆبوونەوەی چاوەڕوانكراوی هاوسەرۆكاندا بەلایەكدا بكەوێت.