گه‌ڕان

Shadow Shadow
سیاسه‌تی

لە دەزگاوە بۆ مەڵبەند

ناس زانیاری لەبارەی بەریەككەوتنی هاوسەرۆكانی یەكێتی بڵاو دەكاتەوە

2021.07.09 - 13:26
App store icon Play store icon Play store icon
ناس زانیاری لەبارەی بەریەككەوتنی هاوسەرۆكانی یەكێتی بڵاو دەكاتەوە

ناس کورد-

گۆڕانكاریی لە دەزگا ئەمنییەكانی زانیاری و دژە تیرۆر كە هەندێ گرژی بەدوای خۆیدا هێنا لە قەڵاچوالان، نوێترین پەرەسەندنی ناكۆكی هاوسەرۆكانی یەكێتین كە پێشبینی دەكرێت لەچەند ماوەی داهاتووشدا بگوزارێتەوە بۆ هەندێك جومگەی ڕێكخستن كە مەڵبەندەكانی یەكێتین، بەم پێیەش سەرەتاكانی قۆناغێكی نوێ لە كێشمەكێش لەناو یەكێتی نیشتمانی كوردستاندا لەئاسۆدا دیاركەوتووە.

کەناڵی ناس کورد لە تێلیگرام جۆین بکە   

 

ناكۆكی لەسەر زانیاری و دژە تیرۆر

بەگوێرەی ئەو زانیارییانەی دەست "ناس کورد" كەوتووە (9ی تەموزی 2021)، لەماوەی ڕابردوودا دەزگای دژە تیرۆر و زانیاری بەسەر هەریەك لە هاوسەرۆكانی یەكێتی بافڵ تاڵەبانی و لاهور شێخ جەنگیدا دابەش بوون، لەم میانەیەشدا بەكردەیی هەریەك لە هاوسەرۆكانی یەكێتی "دژە تیرۆر" و "زانیاری" تایبەت بەخۆیان هەبووە، ئەمەش حاڵەتێكی ناباوە لە كاری حزبی و تەنانەت پەیكەری ئەمنی حكومی، لەچەند ڕۆژی ڕابردووشدا بافڵ تاڵەبانی لەرێگەی تیمی حكومەتەوە (قوباد تاڵەبانی) سەرۆكێكی نوێی بۆ دەزگای زانیاری داناوە و هەوڵی دانانی سەرۆكێكی نوێی بۆ دەزگای دژە تیرۆر داوە. بۆ دەزگای زانیاری ئەژی ئەمین (هەڵەبجەیی) دانراوە لە جێگەی محەمەد تەحسینی برای ئاڵا تاڵەبانی، بۆ دژە تیرۆریش وەهاب هەڵەبجەیی لەجێگەی بۆلاد تاڵەبانی برای لاهور شێخ جەنگی، لەگەڵ گۆڕینی هەندێك لە یاریدەدەرانی ئەم دوو دەزگا هەستیارە لە بەرژەوەندی ماڵی تاڵەبانی لەكاتێكدا پێشتر لەدەستی ماڵی شێخ جەنگیدا بوون.

me_ga.php?id=4205

هەر بەگوێرەی زانیارییە بەردەستەكان، براكەی ئاڵا تاڵەبانی (محەمەد)، بەوەكالەت سەرۆكایەتی دەزگای زانیاری كردووە، بەڵام ئێستا جێگرەوەكەی كە ئەژی ئەمینی یەكێك لە فەرماندەكانی دەزگایە و برای د.موسەننا ئەمینی پەرلەمانتاری یەكگرتووە، فەرمانی هەرێمی بۆ دەركراوە لە چوارچێوەی ئەنجوومەنی ئاسایشی هەرێمی کوردستان، لەڕێگای نێچیرڤان بارزانی سەرۆكی هەرێمەوە كە ئاماژە بۆ جێگیركردنی بەشێوەیەكی فەرمی و یاسایی و پشتیوانی ناوبراویشە بۆ گۆڕانكارییەكە.

 

ناكۆكییە دوو قۆڵییەكان

ناس کورد ئەوەی زانیوە سەرباری ئەو نزیكایەتییە بنەماڵەیی و هاوڕێیەتییەی لەنێوان بافڵ تاڵەبانی و لاهوری شێخ جەنگیدا هەیە، لە ماوەكانی ڕابردوودا زیاتر لە جارێك ناكۆكی لەنێوان هەردووكیاندا وەك هاوسەرۆكی یەكێتی دروست بووە، هۆكاری ئەم بەریەككەوتنەش بەپلەی یەكەم بۆ جیاوازی دید و بیركردنەوەی هەریەكەیان دەگەڕێتەوە، كە تێڕوانینیان بۆ پرسەكان جیاوازی زۆری هەیە، ئەمە جگە لە بەریەككەوتنی دەسەڵات و بەرژەوەندی كەسانی نزیك و ئاڕاستەی كاركردنیان، بەم پێیەش ئەوەی دوێنێ پێنجشەممە (8ی تەموزی 2021) ڕوویدا لە دەزگای زانیاری و دژە تیرۆر حاڵەتێكی چاوەڕوانكراو و پیشبینیكراو بووە و بەشێكە لە پەرەسەندنی سروشتیانەی ئەو بەریەككەوتنە و حاڵەتێكی كتوپڕ نەبووە و دەمێكە ناوەندە باڵاكانی یەكێتی ئاگاداری ئەو ناكۆكییانەن. 


ناكۆكییەكانی تری هەردوولا

سەرچاوەكانی "ناس کورد" ئاماژە بەوە دەكەن، جگە لە ناكۆكی دوو قۆڵی لەنێوان هەردوو هاوسەرۆك، جەمسەرەكانی هێزی ناو یەكێتی و باڵیۆزخانەكان و هاوسەنگی نێوان پارتی و یەكێتیش بە قەبارە و شێوازی جیاواز كاریگەرییان لە سەر پەیوەندی هاوسەرۆكانی یەكێتی و ئاڵۆزكردنی هەیە.

me_ga.php?id=4204

بەگوێرەی زانیارییەكانی ناس کورد، گوشاری زۆری ئەمەریكی و ئەوروپییەكان (هاوپەیمانێتی نێودەوڵەتی دژی داعش) بە ئاڕاستەی یەكخستنی هێزە ئەمنی و چەكدارییەكانی هەرێمە (پارتی و یەكێتی)، ئەم گوشارەش تا ڕادەی هەڕەشەكردنی بڕینی هاوكاری ڕۆشتووە، بەڵام باوەڕێكی وەها هەیە كە لاهور شێخ جەنگی دردۆنگ بێت لە پارتی و ڕێگربێت لەو یەكخستنە، بەهۆی ئەوەی لەلایەك سەرمایەی گەورەی لاهور شێخ جەنگی لەناو یەكێتیدا بەرهەڵستیكردنی باڵادەستی پارتییە و لەلاكەی تر هێشتا كێشەكانی خۆی لەگەڵ پارتی بەكراوەیی ماوەتەوە.


بەوپێیەشی بافڵ و قوباد تاڵەبانی دوو كارەكتەری قبوڵكراون لەلایەن پارتی و بنەماڵەی بارزانییەوە وەك میراتگری باوكیان و واجیهەی یەكێتی، هەنگاوەكانیان لەلایەن باڵی لاهور شێخ جەنگییەوە بەجێبەجێكردنی ئەجێندای پارتی وێنا دەكرێت، لەم میانەیەشدا كەسانی نزیك لە باڵی لاهور هەوڵیانداوە گۆڕانكارییەكانی دوێنێی دەزگای زانیاری و دژە تیرۆر بە "كودەتای زەرد" بناسێنن.


سەبارەت بە ناوخۆی یەكێتیش، ئەو جەمسەر و جومگانەی گوایە لە دوا كۆنگرەی یەكێتی ( 21/ 12/ 2019) پەراوێزخرابوون، یان ڕۆڵیان كۆتایی پێهێنرابوو لە ئۆرگانە حیزبییەكان، بە گشتی ناڕازین لەم پەیكەر و بەرێوەبردنەی ئێستای یەكێتی كە ڕۆڵی ئەوانی تێدا سفر كراوەتەوە، پێشیان وایە هۆكارەكەی بەرێژەیەكی زۆر لاهور شێخ جەنگییە كە خەونی دروستكردنی قۆناغ و ستایلێكی نوێی لەناو یەكێتیدا هەیە كە لەسەر بنەمای بە سەنتەركردنی خۆی و دابڕان لەگەڵ ڕابردوو بەتایبەت لەپەیوەندی لەگەڵ پارتی. لەم میانەیەشدا زانیارییەكان بەشداریكردنی هێزی ئاڵتونی شێخ جەعفەر پشتڕاست دەكەنەوە بۆ پاڵپشتیكردنی بافڵ تاڵەبانی و قسەو باسی زۆریش لە نزیكبوونەوەی زۆری ماڵی تاڵەبانی و ماڵی كۆسرەت ڕەسوڵ هەیە بەمدواییانە، ئەمە جگە لە پاڵپشتی زۆری كەسایەتییەكانی وەك مەلا بەختیار و عومەر فەتاح و هەندێ لەفەرماندە كۆنەكان بۆ ماڵی تاڵەبانی وەك میراتگری یەكێتی.


هاوكێشە نوێیەكانی ناو یەكێتی

هەرچەندە ئێستا چەقی ناكۆكییەكان لەبارەی دەزگاكانی زانیاری و دژە تیرۆرن، بەڵام زانیارییەكانی "ناس کورد" باس لەوە دەكەن، چاوەڕوان دەكرێت قۆناغی داهاتوو ناكۆكییەكان بگوازرێنەوە بۆ سلكی ڕێكخستن، چونكە بافڵ تاڵەبانی و سەركردەكانی تری باڵەكانی یەكێتی بەرنامەی گۆڕانكاریی لە هەندێك مەڵبەند و هەندێ جومگەی رێكخستنیان هەیە، ئەم گۆڕانكارییانەش ناكۆكن لەگەڵ ئەو باڵادەستی و زۆرینە ڕەهایەی لاهوری شێخ جەنگی بەدەستیهێنابوو لە دوا كۆنگرەی یەكێتی و هەندێ لەسەركردەكانی یەكێتی پێیانوایە بە گوشاری ئەمنی و تەكەتول و پارە بەخشینەوە بەدەستهاتووە و بەئاشكرا چەندجارێك خەڵكانی وەك مەلا بەختیار لەبری ئەوانیتر باسیان لەمە كردووە.

May be an image of 8 people

هەر بەگوێرەی ئەو زانیارییانە لەناو یەكێتی، باوەڕێكی وا هەیە كە ئەنجامەكانی دوا كۆنگرە (چوارەم) سروشتی نەبوون، هەندێك لەوانەشی كاتی خۆی یەكێك لە دەنگەكانیان دابوو بە باڵی لاهور شێخ جەنگی و زۆرینەیەكی ڕەهایان بۆ دروستكردبوو (85 ئەندامی سەركردایەتی لەكۆی 128)، ئێستا كار بۆ خۆیان دەكەن یان چوونەتە ناو هاوكێشەی نوێ و هاوپەیمانێتییەكەیان تەنها بۆ ناو كۆنگرە و قۆناغێكی خێرا بووە، ئەمەش وایكردووە رهور شێخ جەنگی ئەو باڵادەستییە ڕەها حیزبییەی ساتی كۆنگرە لەدەست بدات و لەزیاتر لە پیشهاتێكیشدا لەماوەی ڕابردوو ئەمە بەڕوونی دەركەوتووە كە وەك كەسی یەكەمی یەكێتی ئیشی لەبەر نەڕۆشتووە وەك لە مەسەلەی لا مەركەزیەت و زەینی وەرتێ و هەڕەشەی كشانەوەی یەكێتی لەحكومەتدا دەركەوت. 


بەرامبەر پاشەكشەی ئەم پاڵپشتی و پشتیوانییە حزبییەش لەئاستی باڵا، ئەوەی تێبینی دەكرێت هێشتا لاهور شێخ جەنگی وەك سەركردەیەكی گەنجی "دژە پارتی" جەماوەری بەرچاوی لە بنكەی یەكێتی هەیە، لەگەڵ چەندین سەكۆ و دەزگا و پەیج و میدیای جۆراوجۆر كە بەئاسانی بۆچوونەكانی دەگەیەنن و گومان لەنەیارەكانی دروست دەكەن، جگە لەوەش تا ئەمدواییانەش هەژموونی بەسەر دوو دەزگای هەستیاردا هەبووە كە زانیاری و دژە تیرۆرن و سەرچاوەكی گرنگی هێزو باڵانسن چ لەناو یەكێتی چ لەمامەڵەكردن لەگەڵ دەزگا هەواڵگرییەكانی دەرەوەی یەكێتی.

 

نێوەندگیری و دوا پەرەسەندنەكان

بەگوێرەی زانیارییەكانی "ناس کورد"، دۆخی ئەمدواییەی یەكێتی بە نێوانگری د.بەرهەم ساڵح سەرۆککۆماری عێراق و ئێرانییەكان و ئەمەریكییەكان سەركردەكانی تری یەكێتی هێوركراوەتەوە، ئەوەشی تائێستا تا ڕادەیەك ڕوون بووەتەوە جێگیركردنی (ئەژی ئەمین)ـە لە سەرۆكایەتی دەزگای زانیاری لە بەرژەوەندی ماڵی تاڵەبانی، ئەمە لەكاتێكدا سەكۆ میدیاییەكانی نووسینگەی لاهور شێخ جەنگی باس لەراگرتنی گۆڕانكارییە ئەمنییەكان دەكەن تا كاتێكیتر و دۆزینەوەی میكانیزمێكیتر، بەڵام ئاماژەكان ئەوە دەردەخەن لەڕۆژانی داهاتوو دۆخی ناو یەكێتی كراوەیە بەڕووی ئەگەری جیاجیادا و ئاماژەی چەندین ناكۆكی و بەریەككەوتن لەئاسۆدا هەن، لەكاتێكدا هەڵبژاردنی پەرلەمانی عێراق لەبەردەرگایە، هەرێمی كوردستان لە ژێر هەڕەشەی هێرشی گروپە چەكدارەكان و بارودۆخی ئابووری و داراییشی لەپاشەكشە و چەقبەستندایە و ئەمەش تەحەداكان بۆ چارەسەری دۆخەكە قورستر دەكات و هێزە پەیوەندیدارەكان دەهێنێتە سەرهێڵ بۆ پێش لێگرتنی.