گه‌ڕان

Shadow Shadow
سیاسه‌تی

زانیاریی زیاتر

وەزارەتی شارەوانی لەبارەی کەمئاوییەوە ڕوونکردنەوە دەدات: خەتای هاووڵاتیانە

2021.07.05 - 10:08
App store icon Play store icon Play store icon
وەزارەتی شارەوانی لەبارەی کەمئاوییەوە ڕوونکردنەوە دەدات: خەتای هاووڵاتیانە

ناس کورد-

وەزارەتی شارەوانی و گەشتوگوزاری هەرێمی کوردستان لەبارەی کێشەکانی کەمئاوییەوە بەتایبەت لەشاری هەولێر ڕوونکردنەوەیەکی بڵاوکردەوە و ڕایگەیاند، حکومەت زیاد لە پێویستی ئاوی داوە بە هاووڵاتیان، بەڵام هاووڵاتیان بەفیڕۆی دەدەن و بەشێکی بەرپرسیارێتییەکە لە ئەستۆی خۆیانە.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا وەزارەتی شارەوانی و گەشتوگوزاری هەرێم ڕایگەیاند، "حكومەتی هەرێمی كوردستان لە رێگەی وەزارەتی شارەوانی و گەشتوگوزارەوە ڕۆژانە ملیۆنێك و 900 هەزار تا دوو ملیۆن و 100 هەزار مەتر سێجا ئاوی خواردنەوە دابین دەكات، لەكاتێكدا بە گوێرەی ستانداردی جیهانی، پێویستە 200 تا 250 لیتر ئاو دابین بكرێت، بەڵام ئێستا ئێمە لە سەرووی 300 لیترەوە ئاوی خواردنەوە دابین دەكەین، ئەم بڕەش زۆر زیاترە لە پێداویستی هەر هاووڵاتییەك."

 

ئاماژەی بەوەشکردووە، " لەگەڵ ئەوەشدا بەهۆی بەرزبوونەوەی پلەكانی گەرما، خواست لەسەر ئاو زیاد دەكات بە تایبەتی بەهۆی فێنككەرەوە و چالاكییە هەمەجۆرەكانی ناو ماڵ و ئاودانی باخچەكان و شۆردنی پێش دەرگە و كۆڵان و ئۆتۆمبێل و دەیان جۆری دیكەی بەكارهێنان و بەفیڕۆدانی ئاو، هەروەها بەهۆی بەرزبوونەوەی پلەكانی گەرماش كاتژمێرەكانی كارەبا كەم دەبنەوە كە بەشێوەی پچڕپچڕ دەبێت، بۆیە ئەمانە گرفتی كەمئاوی دروست دەكەن. "

 

لەبارەی کێشەی کەمئاوی شاری هەولێر، وەزارەتی شارەوانی دەڵێت، "شاری هەولێر سێ پرۆژەی ئاوی هەیە كە كارەبای بەردەوامیان بۆ دابین كراوە، بەڵام لەگەڵ ئەوەشدا 1190 بیری ئاو هەن، نزیكەی 30%یان دوو كارەبایان هەیە و نزیكەی 100 بیریشیان كارەبای مۆلیدە و نیشتمانیان هەیە و زیاتر لە 600 بیریشیان تەنیا یەك كارەبایان هەیە، كێشەكان زیاتر لەو بیرانەن كە یەك كارەبایان هەیە، چونكە بەشێوەی پچڕپچڕ كارەبایان بۆ دێتەوە و ئەمەش وا دەكات ئاوی پێویست نەگاتە هەموو ماڵەكان، كاتێك تۆڕەكانی ئاو پڕ دەبن بەهۆی پچڕانی كارەباوە، دووبارە بەتاڵ دەبنەوە و ئاو ناگاتە ماڵەكان، بە تایبەتی ئەو ماڵانەی دوور لە سەرچاوەكەن زیاتر گرفتیان بۆ دروست دەبێت، بۆ ئەو مەبەستە زیاتر لە 1000 مۆلیدەمان لە سەرتاسەری كوردستاندا لەسەر بیرەكانی ئاو داناوە تا گرفتی كەم ئاوی روو نەدات."

 

ئەوەشی خستووەتەڕوو، "لەگەڵ ئەوەی حكومەتی هەرێمی كوردستان بەرپرسیارە لە دابینكردنی ئاوی خواردنەوە، بەڵام ئەو بەرپرسیارێتییە بەشێكی دەكەوێتە ئەستۆی هاووڵاتییانیش، چونكە لایەنی دووەم (هاووڵاتییان) كە خزمەتگوزاریی ئاو وەردەگرن، بەوە بەرپرسیارێتی هاوبەشیان لەگەڵ حكومەتدا دەبێت، بۆیە پێویستە هاوبەشانی ئاو، لەپێناو رێگریكردن لە گرفتی كەمئاوی و هاوكاریكردنی حكومەت، پێوەری ئاو و تەوافەی ناو تەنكی ببەستن لەگەڵ رێكخستنەوەی ئەو بڕە ئاوەی دەدرێتە باخچەكان نابێت بە هەدەر بدرێت و كە زۆربەی شوێنەكان سۆندەی ئاو لەناو باخچەكان بە كراوەیی جێدەهێڵن ئەمەش دەبێتە هۆی بەفیڕۆدانی ئاوێكی زۆر و كاریگەری لەسەر ماڵەكانی دیكە دەبێت."

 

جەختیشیکردووەتەوە، "هەروەها پێویستە دایكان و باوكان منداڵەكانیان هۆشیار بكەنەوە كە ئاو بە فیڕۆ نەدەن، پێویستە هاوبەشانی ئاو بە هەموو شێوەیەك دوور بكەونەوە لە شۆردنی ئۆتۆمبێل بە ئاوی خاوێن، مەگەر لە خاڵەتی زۆر پێویست نەبێت نابێت كۆڵان و پێش دەرگەكان بشۆردرێن كە بەگوێرەی بەدوادچوونەكانمان زۆرترین ئاو لەو بابەتانە بەفیڕۆ دەچێت و ئەمە بووەتە هۆی دابەزینی ئاستی ئاو و دروستكردنی گرفتی كەمئاوی لەو شوێنانە. "

 

باسی لەوەشکردووە، "دیاردەی وشكەساڵی، كاریگەری گەورەی لەسەر ئەو دابەزینی ئاستی ئاو هەیە و كێشەكانی گەورەتر كردووە بەوەی ئاستی ئاوی ژێر زەوی بە بەردەوامی لە دابەزیندایە، ئەگەر جاران لە دەشتەكان بووە، ئێستا لە ناوچە شاخاوییەكان، كانیاو و كارێزەكان و بیرەكانی ناوچە شاخاوییەكان، هەموویان ئاستی ئاویان دابەزیوە، تەنانەت هەندێك لە كانییەكان وشك بوونە و بەشێكی كارێزەكانیش چاوەكانیان داخراون، بۆیە داوا لە هاووڵاتییان دەكەین بە هەموو شێوەیەك دەست بە ئاوەوە بگرن و زێدەڕۆیی لە بەكارهێنانیدا نەكەن، بۆ ئەوەی بتوانین ئاو بۆ هەموو ماڵەكان دابین بكەین. "

 

ڕوونیشیکردووەتەوە، "ئێمە وەك حكوومەت بە هەموو شێوەیەك هەوڵ دەدەین ئاستی دابینكردنی ئاو زیاد بكەین و گرفتەكان چارەسەر بكەین، وەك ئاماژەمان پێی كرد زیاد لە پێویستی هاووڵاتییان ئاو بەرهەم هاتووە، بەڵام دیارە ڕێژەیەكی زۆری ئەو ئاوە لەلایەن هاووڵاتییانەوە بەفیڕۆ دەدرێت، بۆیە بەشێكی ئەو ئەرك و بەرپرسیارێتییە راستەوخۆ دەكەوێتە سەرشانی هاووڵاتییانیش بەوەی پێویستە ئاو بەفیڕۆ نەدەن و رێز لەو سامانە نیشتمانییە بگرن، چونكە حكومەت زیاد لە پێویستی هەر هاووڵاتییەك ئاوی خواردنەوەی دابینكردووە، بەڵام هاووڵاتییان زێدەڕۆیی لە بەكارهێنانیدا دەكەن."