گه‌ڕان

Shadow Shadow
سیاسه‌تی

گۆڕان و یەکێتى بێدەنگن

نوسینگەکەى لەبارەى ’’دەستلەکارکێشانەوەى’’ ئاواتی شێخ جەناب ڕوونکردنەوە دەدات

2021.06.30 - 14:13
App store icon Play store icon Play store icon
نوسینگەکەى لەبارەى ’’دەستلەکارکێشانەوەى’’ ئاواتی شێخ جەناب ڕوونکردنەوە دەدات

ناس کورد-
سەرچاوەیەک لە نوسینگەى وەزیرى دارایی هەرێم ڕایگەیاند، دوو ڕۆژە وەزیر نەچووەتە دەوام بەبێ ئەوەى هۆکارەکەیان پێ ڕابگەیەنێت، گۆڕانیش لەسەر ئاستى فەرمى بێدەنگى هەڵبژاردووە لەو بارەیەوە هاوشێوەى یەکێتى کە لەسەر هەڕەشەى دەستلەکارکێشانەوەى خالید شوانى بێدەنگە.

کەناڵی ناس کورد لە تێلیگرام جۆین بکە   

 

سەرچاوەکە ئەمڕۆ چوارشەممە بۆ "ناس کورد" باسى لەوەکرد، ماوەى دوو ڕۆژە ئاوات جەناب نەچووەتەوە دەوامى فەرمى لە باڵەخانەى وەزارەت لە هەولێر، هیچ هۆکارێکیشى بەبەرپرسانى وەزارەت نەوتووە لەبارەى نەچوونى بۆ دەوام.

 

لەبارەى ئەگەرى دەستلەکارکێشانەوەى وەزیرى دارایی، سەرچاوەکە بێئاگایی خۆى نیشاندا و وتى، "هێشتا زۆر زووە بۆ ئەوە، دەستلەکارکێشانەوە رێوشوێنى خۆى هەیە و پێویستە ئەنجومەنى وەزیران هەر داوایەکى لەو شێوەیە پێشکەش بکات".

 

ئەو دوو وەزیرە لەدوایین کۆبوونەوەى پەرلەمان لە 28 ى حوزەیرانى 2021 لەگەڵ چەند پەرلەمانتارێکى پارتى بووە دەمەقاڵەیان، کاتێک رووبەڕووى رەخنەى توند بوونەوە لەبارەى موچە و دۆخى داراییەوە.

 

پەرلەمانتارەکانى پارتى وەزیرەکانى ئامادەبووى کۆبوونەوەکەیان تۆمەتبارکرد بەوەى "ئاگایان لە دۆخى خەڵک" نییە و پێویستە ئیمیتیازەکانیان لێ وەربگیرێتەوە، ئەوانیش سەرەڕاى رەتکردنەوەى ئەو قسانە بێبەریبوونى خۆیان لە گەندەڵى راگەیاند.

 

ئەمڕۆ چوارشەممە سەرچاوەیەک لە ئەنجومەنى وەزیران بۆ ناس کوردى ئاشکراکرد، هەریەکە لە ئاوات شێخ جەناب، وەزیرى دارایی و خالید شوانى، وەزیرى هەرێم بۆ کاروبارى دانوستان لەگەڵ بەغدا بایکۆتى کۆبوونەوەى ئەنجومەنى وەزیرانیان کردووە کە بڕیار بوو ئەمڕۆ ئەنجام بدرێت، بەو هۆیەشەوە کۆبوونەوەکە دواخراوە.



وتیشى، "هۆکارى کێشەکە ئەوەیە کە فراکسیۆنى پارتى لەدوایین کۆبوونەوەى پەرلەماندا هەوڵیانداوە کێشەکان بخەنە ئەستۆى ئەو وەزیرانە و سەرۆکى حکومەت و تیمى پارتى بێبەرى بکەن".



بەوتەى سەرچاوەکە، ئەو دوو وەزیرە داواى هەڵوێستیان لە مەسرور بارزانى کردووە لەو بارەیەوە، هەڕەشەى دەستلەکارکێشانەوەشیان کردووە ئەگەر سەرۆکى حکومەت هیچ هەڵوێستێکى نەبێت.



سەرچاوەیەکى دیکە لە ئەنجومەنى وەزیرانى هەرێمى کوردستان بۆ "ناس کورد" جەختیکردەوە، کۆبوونەوەى ئەنجومەن کە بڕیاربوو ئەمڕۆ ئەنجام بدرێت بۆ کاتێکى نادیار دواخراوە.

 

تا ئێستا ئاوات شێخ جەناب و خالید شوانى هیچ رونکردنەوەیەکیان لەو بارەیەوە نەداوە و حزبەکانیشیان بێدەنگیان هەڵبژاردووە، هەروەها حکومەتى هەرێمیش نەهەواڵەکەى رەتکردووەتەوە نە پشتڕاستى کردووەتەوە.

 

ناس کورد پەیوەندى بەچەند بەرپرسێکى باڵاى گۆڕانەوە کرد، بەڵام هیچ قسەیەکیان نەکرد لەو بارەیەوە.

 

ئەمە دووەمجارە پرسی هەڕەشەى کشانەوە لە حکومەت روبەڕووى کابینەکەى مەسرور بارزانى دەبێتەوە، لەچەند مانگى رابردوودا تیمى یەکێتى لەحکومەت هەڕەشەى کشانەوە و وەرگرتنى هەڵوێستى کرد بەهۆى ناکۆکیان لەسەر هەڵوێستى سەرۆکى حکومەت، بەڵام هەڕەشەکە نەچووە بوارى جێبەجێکردنەوە.