گه‌ڕان

Shadow Shadow
سیاسه‌تی

ئاواتی شێخ جەناب و خالید شوانی هەڕەشەی دەستلەکارکێشانەوەیان کردووە

2021.06.30 - 11:40
App store icon Play store icon Play store icon
ئاواتی شێخ جەناب و خالید شوانی هەڕەشەی دەستلەکارکێشانەوەیان کردووە

ناس کورد-

سەرچاوەیەک لە ئەنجومەنی وەزیرانی حکومەتی هەرێم ئاشکرای کرد، هەریەکە لە وەزیرانى دارایی و وەزیرى هەرێم بۆ کاروبارى دانوستان لەگەڵ بەغدا هەڕەشەى دەستلەکارکێشانەوەیان گەیاندووەتە مەسرور بارزانى سەرۆکى حکومەت و لەئێستادا بایکۆتى کۆبوونەوەى حکومەتیان کردووە.

کەناڵی ناس کورد لە تێلیگرام جۆین بکە   

 

سەرچاوەکە بە مەرجی بڵاونەکردنەوەى ناوەکەى ئەمڕۆ چوارشەممە (30ی حوزەیرانی 2021) بە "ناس کورد"ى ڕاگەیاند، هەریەکە لە ئاوات شێخ جەناب، وەزیرى دارایی و خالید شوانى، وەزیرى هەرێم بۆ کاروبارى دانوستان لەگەڵ بەغدا بایکۆتى کۆبوونەوەى ئەنجومەنى وەزیرانیان کردووە کە بڕیار بوو ئەمڕۆ ئەنجام بدرێت، بەو هۆیەشەوە کۆبوونەوەکە دواخراوە.

 

وتیشى، "هۆکارى کێشەکە ئەوەیە کە فراکسیۆنى پارتى لەدوایین کۆبوونەوەى پەرلەماندا هەوڵیانداوە کێشەکان بخەنە ئەستۆى ئەو وەزیرانە و سەرۆکى حکومەت و تیمى پارتى بێبەرى بکەن".

 

بەوتەى سەرچاوەکە، ئەو دوو وەزیرە داواى هەڵوێستیان لە مەسرور بارزانى کردووە لەو بارەیەوە، هەڕەشەى دەستلەکارکێشانەوەشیان کردووە ئەگەر سەرۆکى حکومەت هیچ هەڵوێستێکى نەبێت.

 

سەرچاوەیەکى دیکە لە ئەنجومەنى وەزیرانى هەرێمى کوردستان بۆ "ناس کورد" جەختیکردەوە، کۆبوونەوەى ئەنجومەن کە بڕیاربوو ئەمڕۆ ئەنجام بدرێت بۆ کاتێکى نادیار دواخراوە.

 

سەرچاوەکە کە داوایکرد ناوى نەهێنرێت وتى، وەزیرەکان ئاگادارکراونەتەوە کە ئەمڕۆ کۆبوونەوەى ئەنجومەنى وەزیران هەیە، بەڵام دواتر ئاگادارکردنەوەیەکى دیکەیان پێگەیشتووە کە کۆبوونەوەکە دواخراوە.

 

وتیشى هۆکارى دواخستنى کۆبوونەوەکە گەڕێنراوەتەوە بۆ ئەوەى مەسرور بارزانى سەرۆک وەزیران کارێکى بەپەلەى بۆ هاتووەتە پێش.

 

دانیشتنى 28ى حوزەیرانى 2021 ى پەرلەمان کە بەبەشدارى چەند وەزیرێکى حکومەت بەڕێوەچوو بۆ تاوتوێکردنى دۆخى دارایی و موچە مشتومڕى توندى بەخۆوە بینى و پەرلەمانتاران لەناویاندا پەرلەمانتارانى پارتى رەخنەی توندیان لەوەزیرەکان گرت.