گه‌ڕان

Shadow Shadow
سیاسه‌تی

’پەیامێکە بۆ ئێران’

ئەمەریکا زانیارى نوێ لەسەر هێرشەکان بۆ سەر گروپە چەکدارەکان ئاشکرا دەکات

2021.06.28 - 14:05
App store icon Play store icon Play store icon
ئەمەریکا زانیارى نوێ لەسەر هێرشەکان بۆ سەر گروپە چەکدارەکان ئاشکرا دەکات

ناس كورد- 

لەسەر هێرشەکانى ئەمەریکا بۆ سەر گروپە چەکدارەکانى سەر بەئێران لەناوچە سنورییەکانى نێوان عێراق سوریادا، پنتاگۆن زانیارى گرنگ ئاشکرا دەکات و رایگەیاند "ئەو هێرشانە پەیامێکن بۆ ئێران و هەروەها دەری خست جۆ بایدن بۆ پاراستنى ئەمەریکییەکان کەوتووەتە جموجۆڵەوە.

 

کەناڵی ناس کورد لە تێلیگرام جۆین بکە   

 

جۆن کێربى وتەبێژى وەزارەتى بەرگرى ئەمەریکا (پنتاگۆن) ئەمڕۆ دووشەممە (28ى حوزەیرانى 2021) بەمیدیاکانى ئەمەریکاى ڕاگەیاندووە، هێرشەکان بەوردى کراونەتە سەر دوو پێگەى گروپە چەکدارەکانى عێراق و سوریا کە لەلایەن ئێرانەوە پاڵپشتى دەکرێن زیاتر کۆگاى چەک و تەقەمەنییەکانیان کراوەتە ئامانج.

 

ئاماژەى بۆ ئەوەش کردووە، هێرشەکان پێگەیەکى کەتیبەکانى حزبوڵا و کەتیبەکانى سەیدلشوهەداى لەناوچەى سنورى نێوان عێراق و سوریا کردووەتە ئامانج.

 

هاوکات جیسیکا ماکنۆڵتى بە کەناڵى (الحرة )ى ڕاگەیاندووە، بەپێى هەڵسەنگاندنەکان هەموو هێرشەکان ئامانجەکانى خۆیان پێکاوە و لەئێستاشدا تاوتوێى لێکەوتەکانى دەکەن.

 

ماکنۆڵتى وتوشیەتى، ئەو هێرشانە پێویست  و گونجاو نەخشە بۆ داڕێژراوبوون بۆ ڕاگرتنى زیاترى پەلهاوێشتنى ئەو گروپانە.

 

ئەو وتەبێژە وتیشى "دەمانەوێت ئەو پەیامە بگەیەنێنە ئێران ئەوەش ئاکامى پاڵپشتى کردنى میلیشیاکانە".

 

دەشڵێت، قەڵاچۆکردنى ئەو گروپانە تواناى هەواڵگرى ئەو گروپە چەکدارانە پەک دەخات و هەروەها ڕێگرى لە هێرشەکانیشیان دەکات.

 

لەبارەى کاردانەوەکانى ئەو هێرشانەوە، بەرپرسێکى سەربازى ئەمەریکا بەتۆڕى هەواڵى فۆکس نیوزى وڵاتەکەى ئەو ئەگەرەى ڕەتکردووەتەوە و ڕاشى گەیاندووە، فڕۆکەکانى  F-15 و F-16 هێرشەکانیان ئەنجام داوە و دواتر گەڕاونەتەوە بۆ بنکەکانیان.

 

ئاماژەى بۆ ئەوەش کرد، یەکێک لەو کۆگاى تەقەمەنییانە لەلایەن گروپەکانەوە بەکاردەهێنرا بەتایبەت بۆ هەڵفڕینى درۆنەکان و ئەوانەش تێک و پێکدراوون.

 

وتوشیەتى، بەهۆى وادەى هێرشەکانەوە پێناچێت زیانى گیانى زۆرى چەکدارى گروپەکانى سەر بە ئێرانى لێکەوتبێتەوە.

 

لەسەر ئەو هێرشانە، کەتیبەکانى سەیدولشوهەدا لەڕاگەیەنراوێکدا کە بەرەبەیانى ئەمڕۆ دووشەممە بڵاوى کردووەتەوە ئاماژەى بەوە داوە، 4 چەکداریان بەهۆى هێرشەکانى ئەمەریکاوە کوژراوە.

 

ئەوەش خراوەتە ڕوو، ئەوانەى کوژراون بریتى بوون لە حوسێن عەلى هەبدولحوسێن، سەعد حەمدان، عەبدولعەزیز زەینەڵ شەبەکى، محمەد ڕۆمى فەڕتووسى.

 

پێشتریش هەر لەسەر ئەو هێرشانە لەڕاگەیەنراوێکدا  وەزارەتى بەرگرى ئەمەریکا ڕایگەیاند، هێرشەکان دواى ئەوە هاتن لەلایەن ئەو گروپانەوە بەدرۆن هێرشکرایە سەر چەند بنکەیەکى سەربازى ئەمەریکا لەعێراق.

 

وەزارەتى بەرگرى ئەمەریکا ئاماژەى بۆ ئەوەش کرد، شەوى ڕابردوو ئەوەى دەرخست کە سەرۆک بایدن ئەوەى ڕوونکردنەوە کە بۆ پاراستنى ئەمەریکیەکان جموجۆڵ دەکات.

         

هاوکات میدیاکانى ئەمەریکاش لەسەر زارى سەرچاوەیەکى ئاگادارەوە بڵاویان کردەوە، هێرشەکان لەنزیک ئەو سنورانە بوون کە گروپەکانى کەتبیەکانى حزبوڵا و سەیدشوهەدا کردویانەتە پێگەى سەربازى خۆیان.

 

پنتاگۆنیش لەڕاگەیەنراوەکەیدا جەختى لەسەر ئەوەش کردووەتەوە، ئەو پێگانە لەلایەن گروپە چەکدارەکانى سەر بەئێرانەوە بەکارهێنراون.

 

پنتاگۆن ئەوەشى ئاشکرا کردووە، سەرۆک بایدن فەرمانى کردووە بەجموجۆڵى زیاترى سەربازى بۆ پەکخستنى کارى ئەو گروپانە و هەروەها بەرپەرچدانەوەى هێرشەکانیان کەلەلایەن ئێرانەوە پاڵپشتى دەکرێن لەدژى بەرژەوەندییەکانى ئەمەریکا لەعێراقدا.

 

ئەوەش خراوەتە ڕوو، هێزەکانیان لەعێراقدا لەسەر خواستى حکومەت ماونەتەوە بۆ تێکشکاندنى چەکدارانى داعش و بۆرۆدمانەکانیشیان لەسنورەکانى عێراق سوریادا سنوردارە و بۆ ڕاگرتنى هەڕەشەکانە.