گه‌ڕان

Shadow Shadow
سیاسه‌تی

زانیاریی زیاتر

پەلەکردن لە یەکخستنەوەی هێزی پێشمەرگە بۆ شەڕی پەکەکەیە؟.. فەرماندەیەک وەڵام دەداتەوە

2021.06.26 - 22:12
App store icon Play store icon Play store icon
پەلەکردن لە یەکخستنەوەی هێزی پێشمەرگە بۆ شەڕی پەکەکەیە؟.. فەرماندەیەک وەڵام دەداتەوە

 ناس کورد-

فەرماندەی هێزەکانی پشتیوانی دووی پێشمەرگە ڕایگەیاند، پەلەکردن لە یەکخستنەوەی هێزەکانی پێشمەرگە پەیوەندی بە شەڕی پەکەکەوە نییە و وەک یەکێتی شەڕی کورد بە کورد ناکەن، دەشڵێت، لەهەر شوێنێک شەڕ ڕوویدا، دەبێت ئەو قۆڵە خۆی تەحەمولی بەرپرسیارێتی بکات.

کەناڵی ناس کورد لە تێلیگرام جۆین بکە   

 

لیوا ڕوکن مەریوان محەمەد، فەرماندەی هێزەکانی پشتیوانی دووی پێشمەرگە (شەممە 26ی حوزەیرانی 2021) بە "دەنگی ئەمەریکای ڕاگەیاند، " پەلە پەلکردن بۆ یەکخستنەوەی هێزەکان و چوونە سەر وەزارەتی پێشمەرگە، پەیوەندی بەشەڕی پەکەکەوە نیە، لێدوانی بەرپرسانی پێشمەرگە و یەکێتیش ڕوونە، ئێمە شەڕی کورد بە کورد ناکەین، دژی شەڕین، وەکو یەکێتی بەکارناهێنرێین دژی هیچ هێزێکی کوردی."

 

 

ئاماژەی بەوەشکردووە، "شەڕ ڕوو نادات، لەهەر شوێنێک شەڕ ڕوویدا، دەبێت ئەو قۆڵە خۆی تەحەمولی بەرپرسیارێتی بکات."

 

باسی لەوەشکردووە، " هێزەکانی پشتیوانی دوو چوونەتەوە سەر وەزارەتی پێشمەرگە و نوسراوی فەرمی لەهێزەکانی 70 ەوە کراوە بۆ وەزارەتی پێشمەرگە و لەوێشەوە بۆ ئەنجومەنی وەزیران، هاوسەرۆکانی یەکێتی بڕیاریانداوە بچینەوە سەر وەزارەتی پێشمەرگە، هاوپەیمانانیش کە ئێمە پەیوەندی زۆرباشمان لەگەڵیان هەیە، پێیانباشە هێزەکان یەکبخرێنەوە، بەڵام پرۆسەکە قۆناغ بە قۆناغ ئەنجام دەدرێت، دەشبێت لەیەکخستنەوەی هێزەکاندا، بەرچاو ڕوونی و متمانە هەبێت، نەک گومانمان لەیەکتری هەبێ، نەک وەکو ئەو چەک و تەقەمەنیانەی لەسەردەمی شەڕی داعشدا دەدرایە پێشمەرگە، بەشێکی کەمی دەدرایە هەندێک لەمیحوەرەکان و بەشی زۆری بۆ میحوەرەکانی تربوو."

 

لیوا مەریوان ئەوەشی خستووەتەڕوو، "لەکاتی شەڕی داعشدا، چەک و تەقەمەنی هاوپەیمانان کەمتر دەگەیشتە میحوەرەکانی یەک و دوو و سێ و چوار، بەڵام ئێستا هاوپەیمانان دڵنیاییان داوە، چەک و تەقەمەنی وەک یەک بەسەر پێشمەرگەدا دابەش دەکرێت."

 

فەرماندەی گشتیی هێزەکانی پێشتیوانی دووی پێشمەرگە، ئاماژەی بە ڕۆڵی گرنگی هاوپەیمانان کرد لەشەڕی داعش و هاوکاریکردنی هێزەکانی پێشمەرگە لە عێراق و هەرێمی کوردستان داوە و ڕایگەیاندووە، "هاوپەیمانان بەتایبەت ئەمەریکا، هەم بەفڕۆکە دەیدا لەداعش، هەم چەک و تەقەمەنی دەدایە پێشمەرگە و مەشقی پێدەکردن، ئەو چەک و تەقەمەنیەی هاوپەیمانان بە پێشمەرگەیان داوە، گەر لەکاتی شەڕی داعش ئەم چەکانەمان هەبووایە، زۆرترین کات شەڕەکان بە قازانجی پێشمەرگە کۆتاییان دەهات."