ناس کورد-
بەڵێندەری پرۆژەى رێگاى كه‌لار -كفری رایگەیاند، دەستوەردراوەتە کارەکەی و لە کوالێتی پرۆژەکەی کەمکراوەتەوە و بۆ بەرژەوەندی چەند کەسێک بەرژەوەندی گشتی لەبەرچاو نەگیراوە.
کەناڵی ناس کورد لە تێلیگرام جۆین بکە
هێمن هادی، بەڵێندەری پرۆژەى رێگاى كه‌لار -كفری له راپۆرتى یه‌كه‌ى چاودێرى حكومه‌تى خۆجێی گه‌رمیان کە رادیۆى دەنگ بڵاویکردوەتەوە ئاماژه‌ى به‌وه‌كردووە لە ستەیشنی وێستگەی ٨و ١٠٠ تا ٢٣ و ٤٠٠ سێ قیری رێگاکەیان بە سێ چین کردوە، بەڵام لەدوای ئەوەوە کراوە بە ٢ چین.
وتیشى ”ئەمە یەکێکە لەهەڵەکانی حکومەت هاتوە چینێک لە قیرەکەی بە ئێمە لابردوە لەبەر ئەوەی کە فڵان کەس لە جڤاتی گۆڕانە یان لە مەڵبەندی یەکێتیە خەڵکی فڵان دێی گەرمیانە زەخت دەکات لە وەزیر یان لە ئیدارەی گەرمیان بێن رێگای گوندەکەی چاکبکەن ئەوانیش مەجبور دێن سێ چینەکەی ئێمە دەکەن بە دو چین و پارەی پڕۆژەکە دادەبەزێنن شوێنی دیکەی پێ چاک دەکەن ئەمە پێی دەڵێن لاتبازی“.
له راپۆرته‌كه‌دا بەڕێوبەری ریگاوبانی گەرمیان، ئەوە روندەکاتەوە بە پێی پێویستی رێگاکە چینەکانی قیر دیاری دەکەن، ئەوەشی دوچین قیردەکرێت لەبری چینی سێیەم بەردی شکاو و هاڕاو بە ٢٠ سم بەکاردەهێنن کە هەمان تۆکمەیی قیری هەیە.
بەپێی راپۆرتەکە، کاتی مانه‌وه‌ى قیر ١٠ بۆ ١٥ ساڵە، دواتر دەبێت بە بەردەوامی نۆژەن بکرێتەوە، هۆکارەکانی تێکچونی قیر لە ماوەیەکی کەم دا دەگەڕێتەوە بۆ جۆری قیرەکە و جۆری ئەو مەوادەی کە تێیدا بەکار دەهێنرێت لەگەڵ کۆمپاکشن .
