گه‌ڕان

Shadow Shadow
سیاسه‌تی

زانیارى زیاتر

بەنزینی محسن لە پارێزگاكانی عێراق بوو بەقەیران و لە کوردستان بەرزبوەوە 

2021.06.23 - 17:57
App store icon Play store icon Play store icon
بەنزینی محسن لە پارێزگاكانی عێراق بوو بەقەیران و لە کوردستان بەرزبوەوە 

ناس کورد- 

قەیرانەکان بەرۆکى عێراق بەر نادەن، هەندێک وڵات ئەگەر قەیران لە دواى قەیرانیشیان هەبێت، ئەوا عێراق چەندین قەیران لە دواى چەندین قەیرانى تر ڕووی تێدەکات، لە کۆتا ئەو قەیرانانەش کە سەریان هەڵداوە و بەڕێوەن، قەیرانى بەنزین و بەدوایشیدا قەیرانى کەمبوونەوە و نەمانى کارەبا لە وەرزى گەرمادا.

 

کەناڵی ناس کورد لە تێلیگرام جۆین بکە   

 

لە بەغدا بەنزینى باش نامێنێت و لە هەرێمى کوردستانیش نرخەکەى ڕۆژ لە دواى ڕۆژ لە زیادبوونە، بەرپرسانى حکومیش بەردەوامن لە هێنانەوەى بیانوى جۆراو جۆر لە دیارترینیشیان گرانبوونى نەوت و دانانى باج و بەرزبوونەوەى نرخى دۆلار، کە ئەمەى کۆتایى یەکێکى تر بوو لەو نەهامەتییانەى ڕووى لە هاوڵاتیانى هەرێمى کوردستان و عێراق کرد.



بەنزینخانەکانى بەغدا داواى لێبوردن دەکەن

 

لە بەغداى پایتەختى عێراق بەنزینى باش نەماوە و بەشێک لە بەنزینخانەکان نوسیویانە "داواى لێبوردن دەکەین..بەنزینى موحەسەنمان نییە" ئەم نوسینە لەسەر پەڕەیەکى سپى لەبەردەم زۆرینەى بەنزینخانەکاندا نوسراوە.

 

شۆفێرانیش ئەوەیان بە "ناس" ڕاگەیاند، گەڕان بەدواى بەنزینێکدا باش بێت و ئۆکتانى بەرز بێت بێسوودە، ئەو وێنە و زانیاریانەى دەست ناس کەوتوون ئەوە پشتڕاست دەکەنەوە.



بەرزبوونەوەى کتوپڕ و بەردەوامى بەنزین لە هەرێمى کوردستان

 

هەرچى لە هەرێمى کوردستانیشە شۆفێران گلەیى بەردەوامى بەرزبوونەوەى بەنزین دەکەن و باس لەوە دەکەن، نرخەکەى بووەتە دوو هێندە، یەکێک لەو شۆفێرانە لە پارێزگاى سلێمانى بە ناس-ى وت، ماوەى دوو مانگە نرخەکان دەستیان کردووە بە بەرزبوونەوە.

 

شۆفێرەکە دەڵێت، نرخى یەک لیتر بەنزینى ئاسایى 390 دینار بوو بەڵام ئێستا بووەتە 750 دینار، بەنزینى مەحەسەنیش لە 525 دیارەوە گەیشتووەتە 800 دینار، هەرچى بەنزینى سوپەریشە لە 650 دینارەوە نرخى گەیشتووەتە 900 دینار و لە هەندێک بەنزینخانە نرخەکان لەوەش زیاترن.



ئێران یەکێکە لە هۆکارەکان 

 

سەبارەت بە هۆکارەکانى گرانبوونى بەنزین ئازاد محەمەد سەرۆكی ئەنجومەنی پارێزگای سلێمانی لە کۆنگرەیەکى ڕۆژنامەوانیدا ئاماژەى بەوەدا، هۆکارەکانى گران بوونى بەنزین زۆرن بەشێکیان دەرەکین و بەشێکیان ناوەکین، بەشێکى پەیوەندى بە کۆمارى ئیسلامى ئێرانەوە هەیە و بەشێکى بە بۆرسەى جیهانى و بەشێکیشى پەیوەندى بە حکومەتى هەرێمى کوردستانەوە هەیە.

 

ڕونیشیکردەوە، حکومەت باج و ڕسومانى لەسەر هاودەرکردنى سوتەمەنى داناوە هەروەها پاڵپشتى نییە بۆ ناوخۆ لە ڕێگەى پاڵاوتگەکان و تەوتیان ناداتێ، بەشێکیشى پەیوەندى بە ئێرانەوە هەیە و تائێستا زیاتر لە 280 دۆلار چووەتە سەر یەک تۆن بەنزین کە لەو وڵاتەوە دەهێنرێت، هەروەها لە ڕابردوودا کڕیارەکان کەمبوون و زۆرینەى کڕیارەکان هەرێمى کوردستان و بەتایبەتى پارێزگاى سلێمانى بوون سەرەڕاى ئەوەش گواستنەوەى بەنزین تێچوویەکى زیاترى هەیە و هەموو ئەمانەش کاریگەرییان هەیە لەسەر گرانبوونى نرخى بەنزین.

 

چ پەیوەندییەکى بە دۆلارەوە هەیە؟

 

بەهۆى بەرزى تێچووى هاودەرکردن و گواستنەوە، بەنزینى موحەسەن تێچوویەکى زۆر لەسەر عێراق دەکەوێت، جەبار على شارەزاى ئابوریى دەڵێت، قەیرانى نوێى بەنزین بەهۆى تەواوبوونى ئەو بڕەیە پێشتر هێنرابوو، هەروەها پرۆسەى هاوردەکردن بە چەند هۆیەک وەستاوە، هۆکارەکانیش بریتین لە بەرزبوونەوەى تێچووى هاوردەکردن بەهۆى بەرزبوونەوەى نرخى نەوتەوە لە جیهاندا لەکاتێکدا لە ناوخۆ نرخى جێگیر بوو و لیتیرێک بە 54 سەنت دەفرۆشرا بەپێى نرخى ئێستاى دۆلار کە بەرز کراوەتەوە.

 

جەختیلەوەشکردووەتەوە، نرخى ئێستا لەگەڵ تێچووى هاوردەکردنى بەنزینى ئۆکتان بەرزدا ناگونجێت لە بازاڕە جیهانییەکاندا کە نرخى یەک لیتر 63 سەنتە کە بە نرخى ئێستا دەکاتە 925 دینارى عێراقى، بۆیە دواى چوونە سەرى تێچووى گواستنەوە و قازانج، نرخى کۆتایى بەنزینى موحەسەن لە عێراق دەگاتە 1000 دینار.



نەوت.. وەستان بۆ ماوەیەک

 

لەلایەکى ترەوە وەزارەتى نەوتى عێراق ڕەتیکردووەتەوە کە وەستابن لە دابینکرنى بەنزینى ئۆکتان بەرز بۆ هاوڵاتیان و کۆمپانیاى دابەشکردنى بەرهەمە نەوتییەکانى سەربە وەزارەتەکە لە بەیاننامەیەکدا بڵاویکردووەتەوە، دەروازەکانى دابینکردنى بەنزینى ئۆکتان بەرز بە شێوەیەکى باش و بەردەوام کار دەکەن.

 

هێما بۆ ئەوەشکراوە، کۆمپانیاکە چەند ڕێوشوێنێکى پشکنین و بەراورد کردنى هەبووە لە چەند دەروازایەک بۆ چەند ڕۆژێک، بەهۆى ئەوەشەوە لە هەندێک لەو دەروازانەوە بۆ ماوەیەک دابینکردنى بەنزینى ئۆکتان بەرز وەستا.