گه‌ڕان

Shadow Shadow
سیاسه‌تی

’’بایکۆتى یەکترمان نەکردووە’’

یەکێتى ’’پەیوەندى مۆبایل’’ لەگەڵ پارتى ئاشکرادەکات

2021.06.21 - 21:08
App store icon Play store icon Play store icon

ناس کورد-

سكرتێری ئەنجومەنی سەركردایەتی یەكێتی ئاشکرایکرد، لەگەڵ پارتى بایکۆتى یەکتریان نەکردووە و پەیوەندییەکانى هەردوو حزبەکە ئەگەر لەبەرچاوى میدیاکانیش نەبێت "لەڕێگەى مۆبایلەوە" بەردەوامە.

کەناڵی ناس کورد لە تێلیگرام جۆین بکە   

 

لەدواى کۆنگرەى یەکێتییەوە کە لە کۆتایی 2020 بەسترا، پەیوەندییەکانى ئەو حزبە و پارتى ڕوویان لە ئاڵۆزى زیاتر کردووە و تائێستاش کێشەکانیان بێ چارەسەر ماونەتەوە، چەندین هەوڵ بۆ ڕێککەوتن و کۆبوونەوەى نێوانیان شکستى هێناوە.

 

فەرید ئەسەسەرد، سكرتێری ئەنجومەنی سەركردایەتی یەكێتی ئەمڕۆ دووشەممە بە "ناس کورد"ى ڕاگەیاند، "لەدواى پێکهێنانى حکومەتى ئێستاوە کێشەکانیان لەگەڵ پارتى زیاد بووە، تا ئێستا ئاسۆیەک نابینین بۆ چارەسەر".

 

کێشەکانى پارتى و یەکێتى لەسەر ئاستى جیاجیان، وەکو حکومەت و پەرلەمان، سەرەڕاى ئەوەى هێشتا هەردوو حزبەکە وەک دوو پێکهێنەرى سەرەکى کابینەى نۆیەم ماونەتەوە، بەڵام دیار نییە کێشەکانیان بەکوێ دەگات.

 

فەرید ئەسەسەرد وتى، "نازانم دەرفەت هەیە هاوپەیمانێتیمان لەگەڵ پارتى بگەڕێتەوە دۆخى جاران یاخود نا، چونکە زۆ شت گۆڕاون و هەندێ پرس هاتووەتە ئاراوە کە تەگەرەى دروستکردووە هاوپەیمانى یەکتر بین".

 

وتیشى، "دەرفەت هەیە پەیوەندییەکانمان چاک بکەینەوە و ڕێگرییەکى زۆر گەورە نییە، بەڵام ئەوە بە ئیرادەى هەردوولا دەبێت نەک یەک لایەن".

 

بەهۆى بەردەوامى کێشەکانیانەوە پارتى و یەکێتى زیاتر لەساڵێکە لەسەر ئاستى باڵا کۆنەبوونەتەوە و چەندین هەوڵ لەو بارەیەوە بێئەنجام بوون، بەڵام ئەسەسەرد پەیوەندى نێوان هەردوو حزبەکە بەشێوەى دیکە ئاشکرادەکات.

 

"بایکۆت لەنێوانماندا نییە، نە ئێمە بایکۆتى ئەوان بایکۆتى ئێمەیان کردووە، نە ئێمە بایکۆتى ئەوانمان کردووە، بەردەوام شاندەکان یەکتر دەبینن، ئەگەر لەبەرچاوى تەلەفزیۆنیش نەبێت بە مۆبایل قسە دەکرێت و کۆنتاکتەکان بەردەوامن"، ئەسەسەرد وایوت.

 

دەشڵێت، بەڵام هەنگاوەکان بچوکن و هەنگاوى گەورە نەنراوە، بۆیە نەتوانراوە کێشەکان چارەسەر بکرێت، پێویستیان بەهەنگاوى گەورەترە لەو بارەیەوە بۆ چارەسەرى کێشەکان.