گه‌ڕان

Shadow Shadow
سیاسه‌تی

وردەکاریی

سۆشیال میدیا كەمتەرخەمی حكومەتی لە ئاست شێرپەنجە ئاشكراكرد

2021.06.20 - 15:35
App store icon Play store icon Play store icon
سۆشیال میدیا كەمتەرخەمی حكومەتی لە ئاست شێرپەنجە ئاشكراكرد

ناس كورد-
پاش هەڵمەتێكی بەرفراوانی سۆشیال میدیا و گوشارێكی زۆری مەدەنی، حكومەتی هەرێم بڕیاری دا مانگانە بڕی ملیارێك و 600 ملیۆن دینار بۆ نەخۆشخانەكانی شێرپەنجە تەرخان بكات، ئەمەش پاش ئەوەی خزمەتگوزاری سەنتەرەكانی شێرپەنجە خەریكبوو بەهۆی مانگرتن و بێ دەرمانی و كەمی بودجەوە پەكیان بكەوێت و لە پێشكەشكردنی خزمەتگوزاری وەستان.

کەناڵی ناس کورد لە تێلیگرام جۆین بکە   

 

بڕیارەكەی حكومەت كە نەخۆشخانەكانی نانەکەلی، ڕزگاری ( هەولێر)، هیوا (سلێمانی)، ئازادی (دهۆک) دەگرێتەوە ڕەزامەندی خەرجكردنی (بدل عیادە)ش لە خۆ دەگرێت، بە مانگانەی ملیارێك و 27 ملیۆن دینار، لە كاتێكدا بەپێی لێدوانی بەرپرسانی نەخۆشخانەی هیوا، ساڵی پار، شەش مانگ جارێك و بەدوو گوژم و پاش هەوڵ و بەدواداچوونی زۆر خەرج كراوە، لەو ماوەیەشدا مانگرتن و ناڕەزایی كارمەندانی هیوای بەدوادا هاتووە.

 

قەیرانی ئەمدواییەی نەخۆشخانە و سەنتەرەكانی چارەسەركردنی شێرپەنجە كە بووە بابەتی گەرمی سۆشیال میدیا و لە ڕۆژانی ڕابردوودا چەند هەڵمەت و كەمپینێكی بۆ سازكرا، پەردەی لەسەر زۆر ڕاستی هەڵماڵی كە ڕەنگە دیارترینیان نەبوونی ستراتیژێكی خێرای بەرەنگاربوونەوەی نەخۆشی شێرپەنجە بێت لە كوردستان لەكاتێكدا ئامارەكان ڕوو لە هەڵكشانن و پەنجەی تۆمەتیش بۆ قاچاخچێتی دەرمان و بەنزینی كواڵێتی خراپ و كراوەیی سنورەكان درێژ دەكرێت كە واڵان لەبەردەم ئەو كاڵاو كەرەستانەی كە باوەڕ وایە ببنە هۆی بڵاوكردنەوەی زیاتری شێرپەنجە.

 

بەگوێرەی ئامارە فەرمییەكانی نەخۆشخانەی هیوا، لەچوار مانگى یەكەمی ئەمساڵدا هەزار و 31 توشبووى نوێی شێرپەنجە تۆمارکراون، 80%ى دانیشتووى پارێزگاى سلێمانى و هەڵەبجەن، 9%ى دانیشتووى پارێزگاکانى دیکەى هەرێمن، ئەوانەى تر دانیشتووى پارێزگاکانى عێراقن. بەپێی ئامارەكانی تر، ناوەندی توشبوون حەوت كەسە لە ڕۆژێكدا، كە ئەگەرچی كەمترە لە ستانداردی جیهانی، بەڵام زۆرێك پێیانوایە بەوپێیەی هەریم وڵاتێكی پیشەسازی نییە ئەم رێژەیە هێشتا زۆرە و لە ساڵانی ئایندە مەترسی و ئەگەری هەڵكشانی زیاترە.

 

هەڵمەتەكانی ئەم دواییەی ناڕەزایەتی لە چۆنییەتی بەرەنگاربوونەوە و چارەسەركردنی شێرپەنجە، هەندێ ڕاستی و بارودۆخی نەوتراویان لەبارەی شێرپەنجەوە لە كوردستان ئاشكراكرد، لەوانە نەبوونی سەنتەری چارەسەری تیشك لە هەولێری پایتەخت و پارێزگای دهۆك، ئەمەش لۆدی زۆری لەسەر سەنتەری ژیانەوەی سلێمانی تیشك دروستكردووە بەجۆرێك نزیكترین سەرەی چارەسەر لە ئێستادا شەش مانگە، بەگوێرەی لێدوانی بەرپرسانی سەنتەرەكەش نەخۆش هەیە لە چاوەڕوانیی چارەسەرەكەدا گیانی سپاردووە یان ستەیج (نمرە)ی نەخۆشییەكەی هەڵكشاوە.

 

بەر لەوەی حكومەتی هەرێم بێتە سەرخەتی چارەسەركردنی كێشەی نەخۆشخانەی شێرپەنجە، هەندێ لایەنی حیزبی و میدیایی هەوڵی بەهاناوەچوونی نەخۆشخانەی هیوا و توشبووانی شێرپەنجەیان داوە، لەم میانەیەشدا هاوسەرۆكانی یەكێتی پاش سەردانی لاهور شێخ جەنگی بۆ هیوا بەڵێنی دابینكردنی بودجەی 50 خۆبەخشیان داوە تا ماوەی ساڵێك، كەناڵی NRT يش لاى خۆیەوە كەمپینی بۆ كۆكردنەوەی كۆمەك ڕێكخستووە. هەندێك ستایشی ئەم دەستپێشخەریانە دەكەن و هەندێكیتر پێیانوایە دەبێت حكومەت بەرپرسیار بكرێت لە بەهاناوەچوونی دۆخەكە نەك كەس و لایەنیتر ببنە جێگرەوە و بەدیل كە ڕەنگە نەتوانن درێژە بەهاوكارییەكانیان بدەن.

 

بەگوێرەی بەدواداچوونەكانی "ناس كورد"، جموجوڵی ئەمدواییەی حكومەت، هەندێك لە كێشەكانی نەخۆشخانەی هیوا و سەنتەرەكانی چارەسەركردنی شێرپەنجە چارەسەر دەكات، بەڵام كێشەی بودجەی دەرمان و مۆڵەقیی شایستەییەكانی خۆبەخشان و لەوەش گەورەتر دزەكردنی كادرانی چارەسەركردنی شێرپەنجە بۆ كەرتی تایبەت هەر وەك خۆیان دەمێننەوە. جگە لەوەش بەهۆی هاتنی نەخۆشی زۆر لە ناوەڕاست و باشوری عێراق و پارێزگاكانیتری كوردستانەوە قورسایی زۆر لەسەر نەخۆشخانەی هیوا دروست بووە لەكاتێكدا ئەم نەخۆشخانەیە لە بینایەكی تەنگەبەردایە و مەرج و بەندوباوی حەوانەوەی نەخۆشی تێدا نییە.