گه‌ڕان

Shadow Shadow
سیاسه‌تی

وردەکاریى

جەعفەر شێخ مستەفا لەبارەى ئەگەرى شەڕى پێشمەرگە و پەکەکە پەیامێکى بڵاوکردەوە

2021.06.18 - 09:37
App store icon Play store icon Play store icon
جەعفەر شێخ مستەفا لەبارەى ئەگەرى شەڕى پێشمەرگە و پەکەکە پەیامێکى بڵاوکردەوە

ناس کورد-

جێگرى سەرۆکى هەرێمى کوردستان پەیامێکى لەبارەى ئەگەرى شەڕى نێوان هێزەکانى پێشمەرگە و گەریلاکانى پەکەکە بڵاوکردەوە و لەو بارەیەوە هۆشدارى دەدات.

 

کەناڵی ناس کورد لە تێلیگرام جۆین بکە   

 

جەعفەر شێخ مستەفا (18ى حوزەیرانى 2021) لە پەیامێکدا ئاماژەى بە هەوڵێک کردووە بۆ پەلکێشکردنی شەڕێکی نەخوازراو لەنێوان چەکدارانی پەکەکە و هێزی پێشمەرگە لە خاکی هەرێمی کوردستان.

 

لە پەیامەکەیدا جێگرى سەرۆکى هەرێمى کوردستان پەکەکە بە تێوەگلانى پێشمەرگە بە شەڕ تۆمەتبار دەکات و دەڵێت "ئەگەر بابەتەکە بۆ چەکدارانی پەکەکە بەرگریکردن بێت لە خۆیان، بۆ هێزی پێشمەرگە تێوە دەگلێنن لەو شەڕەی کە خواستی گەلی کورد و پێشمەرگەی لەسەر نییە؟".

 

هەروەها پرسیار دەکات لەوەى بۆچى پەکەکە "تەنها لەو قەوارەیەی هەرێمی کوردستان چالاکییەکانیان چڕ کردووەتەوە کە بە خوێنی هەزاران شەهید بنیادنراوە و پاساو دەدەن بە تورکیا هێرشیان بکرێتەسەر! ئێمە لەگەڵ هاتنی هیچ هێزێکی بێگانە نین کە سنوور و سەروەرییەکانی هەرێمەکەمان ببەزێنێت، لە هەمان کاتیشدا رێز لەو پارتە سیاسییانە دەگرین کە لە خاکی هەرێمەکاندا گیرساونەتەوە و رێگامان داون کار و چالاکیی سیاسی ئەنجام بدەن، بەڵام هەرگیز لەگەڵ ئەوەدا نین کە ببنە مایەی شەڕ و ناسەقامگیری و هۆکاری چۆڵکردن و ماڵوێرانکردن و شەهیدکردنی دەیان خەڵکی سڤیل لە ناوچەکەدا".

 

 لەبەشێکى ترى پەیامەکەیدا باس لە پلانى نەیارانى کورد دەکات بۆ دروستبوونى گرژیى و ناکۆکى لەناوچەکە و دڵنیایى ئەوە دەدات کە ئەوەی کە ئێستا روودەدات، پلانی نەیارانی دژ بە نەتەوەی کوردە.

 

هیواشى خواست لە کوردانی هەر چوار پارچەی کوردستان دەست لەناو دەست بن بۆ چارەسەری ریشەیی هەموو ئەو زوڵم و ستەمەی کە بە درێژایی مێژوو لە کورد کراوە بە پاساوی نالۆژیکی و دەشڵێت "با پلانی نەیارانمان بە یەکڕیزیی نێوانمان لەبارببەین لەپێناو گەیشتن بە کەناری ئارامی بۆ گەلێکی ماندوو لە شەڕ و ماڵوێرانی".

 

 جەختیش لەسەر ئەوە دەکاتەوە کە براکوژى بەپێی هەموو لۆژیکێک ماڵوێرانترین کارەساتە لە میتۆدی هەر گەلێک کە روویدابێت، "بەتایبەت بۆ ئێمەی گەلی کورد کە مێژووییەکی تاڵمان هەیە لەگەڵ ئەو پرسە نەگریسە".

 

داواش دەکات بە یاسا "شەڕی براکوژی" شەرمەزار بکرێت و دەڵێت "گرنگە بۆ ئێمە کە خاوەن قەوارەیەکی هەرێمین لە ئێستادا، لەژێر ئەم قەوارەیەدا خاوەن حکومەت و پەرلەمانین، با بە یاسا شەڕی براکوژی شەرمەزار بکەین، چونکە نەیارانمان هەمیشە لە هەوڵی ئەوەدابوون و مێژووش شاهیدیی ئەوە دەدات کە ببنە هەوێنی ناسەقامگیری و دووبەرەکی لەنێوانمان".