کازمی سەردانی زیقاری کرد و سێ پڕۆژەی گرنگی کردەوە

ناس کورد-

مستەفا کازمی، سەرۆک وەزیرانی عێراق سەردانی پارێزگای زیقاری کرد و سێ پڕۆژەی کردەکە کە بریتین لە نەخۆشخانەی فێرکاریی ناسریە، وێستگەیەکی غاز بۆ بەرهەمهێنانی کارەبا و هەروەها پردی کۆنکرێتی زیقاریش.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا کە کۆپیەکى بە دەستى "ناس کورد" گەیشتووە، نوسینگەى ڕاگەیاندنى مستەفا کازمى ( 12ى حوزەیرانى 2021) ڕایگەیاندووە، بەئامادەبوونى دایکى عومەر سەعدون یەکێک لەقوربانیی خۆپیشاندانەکانى شارەکە سەرۆک وەزیران نەخۆشخانەیەکى فێرکارى لەشارى ناسڕییە کردووەتەوە.

 

ئاماژە بۆ ئەوەش کراوە، نەخۆشخانەکە یەکێک لەنەخۆشخانە مۆدێرنەکانى عێراق و چەند بەشێکى پسپۆڕى پزیشکى جیاجیا لەخۆدەگرێت و ئامێرى پزیشکى پێشکەوتووشى بۆ دابینکراوە بۆ ئەوەى بەباشترین شێوە خزمەتى نەخۆش بکات.

 

ئەوەش خراوەتە ڕوو، لەئێستادا نەخۆشخانەکە 429 قەرەوێڵە لەخۆدەگرێت و لەئایندەشدا هەوڵدەدەن فراوانترى بکەن و نەخۆشخانەکەش لەلایەن تیمى پزیشکى هەمان پارێزگاوە بەڕێوەدەبرێت و دەرفەتى کاریش بۆ دەرچووانى پزیشکى شارەکە دەڕخسێنێت.

هاوکات وێستگەیەکی غازی بۆ بەرهەمهێنانی کارەبا کردەوە کە توانای بەرهەمهێنانی 500 مێگاوات کارەبا هەیە، لە قۆناغی دووەمدا 250 مێگاواتی بۆ زیاد دەکرێت.