گه‌ڕان

Shadow Shadow
سیاسه‌تی

داوای دواخستنی نەکراوە

پەرلەمان: هەڵبژاردن لەکاتی و ساتی خۆیدا بەڕێوەدەچێت

2021.05.29 - 08:40
App store icon Play store icon Play store icon
پەرلەمان: هەڵبژاردن لەکاتی و ساتی خۆیدا بەڕێوەدەچێت

ناس کورد-

بەشیر حەداد، جێگری سەرۆکی پەرلەمانی عێراق جەخت دەکاتەوە کە دۆخەکە پشتیوانی ئەنجامدانی هەڵبژاردنەکان دەکات و دەڵێت، لایەنە سیاسییەکان و هەروەها حکومەت و نەتەوە یەکگرتووەکانیش ئامادەی ئەنجامدانی هەڵبژاردنەکانی داهاتوون لەکاتی خۆیدا، هەروەها هیچ لایەنێکی سیاسیش داواکاریەکی پێشکەش نەکردووە بۆ دواخستن یان هەموارکردنەوەی یاسای هەڵبژاردنەکان.

کەناڵی ناس کورد لە تێلیگرام جۆین بکە   

 

 

بەشیر حەداد لە لێدوانێکیدا بۆ ڕۆژنامەی "سەباح"ی فەرمی (29ی ئایاری 2021) ڕایگەیاند، "تا ئێستا هیچ داوایەکی فەرمی لە پەرلەمانی عێراق نەکراوە بۆ هەموارکردنەوەی یاسای هەڵبژاردن، سەرەڕای چەندین لێدوانی میدیایی هەندێک کەس و لایەن بۆ ئەم داوایە"، بەڵام جەختی کردەوە "ئەگەر حکومەت یان سەرۆکایەتی پەرلەمان لەڕێگەی پڕۆژەیاسای هەموارکردنەوە داوا ئەمە بکەن، یاخود 10 پەرلەمانتار یان لیژنەیەکی تایبەتمەند بەپێی مادەی 60ی دەستور داوا ئەوە بکەن، ئەوە پەرلەمان دەست بە ڕێکارەکان دەکات بۆ ئەو مەبەستە".

 

ڕوونیشی کردەوە کە "پەرلەمانی عێراق ئەرک و پابەندبوونەکانی خۆی جێبەجێکردووە بۆ ئەنجامدانی هەڵبژاردنی پێشوەختە پاش ئەوەی یاسای کۆمسیۆنی باڵای سەربەخۆی هەڵبژاردنەکانی تێپەڕاند، هەروەها کێشەی دادگای فیدڕاڵی چارەسەرکرد بە هەموارکردنەوەی یاساکەی.

 

بەشیر حەداد دەشڵێت، "دیاریکردنی کات یان دواخستنی هەڵبژاردنەکان کاری پەرلەمان نییە، بەڵکو لە دەسەڵاتی حکومەتدایە بە هاوئاهەنگی لەگەڵ کۆمیسیۆنی هەڵبژاردنەکان، لەئێستادا ڕای زاڵ و گشتگیری حکومەت و نەتەوە یەکگرتووەکان ئەوەیە کە ئامادەکاری بەردەوام دەبێت بۆ ئەنجامدانی هەڵبژاردنەکان لە 10ی تشرینی ئەمساڵدا و گریمانەکانی دواخستنی لە ئاسۆدا نییە".

 

جێگری سەرۆکی پەرلەمانی عێراق وتیشی، "زۆرینەی لایەنە سیاسییەکان لەگەڵ ئەنجامدانی هەڵبژاردنەکانن لە کاتی خۆیدا، و هیچ لایەنێک داوای دواخستنی نەکردوون و هەموو لایەک هاوڕان لەسەر ئەوەی کە دروستکردنی ژینگەیەکی گونجاو بۆ ئاسایشی هەڵبژاردن و شەفافی و بەشداری فراوان کاری هەموو لایەکە و پێویستە حکومەت پابەند بێت بە دابینکردنی ئەو ژینگەیە بۆ مسۆگەرکردنی هەڵبژاردنێکی سەرکەوتوو".

 

وتیشی، "لیژنەکانی پەرلەمان چەندین پڕۆژەیاسایان لە بەردەستدایە کە پەرلەمان بەنیازە پێش کۆتایی خولی ئێستا تەواویان بکات و دەنگیان لەسەر بدات وەک پڕۆژەیاسای (گەڕاندنەوەى پارە دزراوەکان، ئازادی ڕادەربڕین، کۆبوونەوە و خۆپیشاندانی هێمنانە، تاوانی ئەلیکترۆنی، چارەسەرکردنی خراپ بەکارهێنانی خانووبەرە، خزمەتی فیدراڵی، ئاسایشی کۆمەڵایەتی و خانەنشینی بۆ کرێکاران، دادگای تاوانەکانی عێراق) و چەند یاسای تر کە دەردەکرێن".

 

لە ماوەی ڕابردوودا چەند پەرلەمانتار و بەرپرسێک ڕایانگەیاند کە ئاڕاستەیەک هەیە بۆئەوەى بە بیانووی خراپی دۆخی ئەمنی و ڕێگری لە ساختەکاری هەڵبژاردنی پێشوەختە دوابخرێت بۆ ساڵی داهاتوو.