گه‌ڕان

Shadow Shadow
سیاسه‌تی

’’بە ئاشکرا هاتوچۆ دەکەن’’

وێنەی جموجۆڵی چەکدارانی داعش لەنێوان کفری و خورماتوو بڵاوکرایەوە

2021.05.21 - 16:57
App store icon Play store icon Play store icon
وێنەی جموجۆڵی چەکدارانی داعش لەنێوان کفری و خورماتوو بڵاوکرایەوە

ناس کورد-

ماڵپەڕی دەنگی ئەمەریکا وێنەی جموجوڵەکانی چەکدارانی داعشی لە قەزای کفری و خورماتوو بڵاوکردەوە و بەرپرسێکی حزبی ناوچەکەش دەڵێت، ژمارەی چەکدارەکانی داعش لە دەوروبەری قەزای خورماتوو گەیشتووەتە نزیکەی 70 چەکدار.

کەناڵی ناس کورد لە تێلیگرام جۆین بکە   

 

مەلا کەریم شکور، بەرپرسی مەڵبەندی حەمرین-ی یەکێتی (هەینی 21ی ئایاری 2021) بە "دەنگی ئەمەریکا"ی ڕاگەیاندووە، "ژمارەی چەکدارەکانی داعش لە دەوروبەری قەزای خورماتوو گەیشتووەتە نزیکەی 70 چەکدار و سەرجەمیان لە گوندە عەرەبیە ڕووخاوەکانن."

 

بەپێی ئەو وێنانەی دەنگی ئەمەریکا بڵاویکردوونەتەوە، "چەکدارەکان بە ئاشکرا لەگوندەکانی سنوری خورماتوو و ناوچەی غەڕەو پەڵکانە دەسوڕێنەوە، کە چەکدارەکان بەدوو دوو هاتووچۆ دەکەن، لەکاتێکدا فڕۆکەکانی هاوپەیمانان بەردەوام چاودێریان دەکەن و ناو بە ناو لێشیان دەدەن."

 

بەرپرسی مەڵبەندی حەمرین ی یەکێتی، ئاماژەی بەوەشکردووە، هێزە عێراقیەکان ماوەی چەند ڕۆژێکە ئۆپەراسیۆنیان دەستپێکردووە، چونکە جموجۆڵی داعشەکان زیادیکردووە و ئەو هێزانە دەیانەوێ ناوچەکە بپارێزن.

 

سەبارەت بە پەیوەندی نێوان هێزە کوردیەکان و حەشدی شەعبی لەخورماتوو، مەلا کەریم ئەوەی خستووەتەڕوو، "دوو جۆر حەشدی شەعبی لە خورماتوو هەیە، بەشێکیان ئەو هێزانەن لە خوارووی عێراقەوە هاتوون، ئێمە پەیوەندیمان لەگەڵیان باشە، بەڵام ئەو هێزانەی خەڵکی ناوچەکەن، ماوەی چوار مانگە بێدەنگن و کێشەیان دروست نەکردووە."