گه‌ڕان

Shadow Shadow
سیاسه‌تی

وردەکاریى

لەسەر خراپ خەرجکردنى 20 ملیار دینارى سلێمانى بەڕێوەبەرێکی گشتی دەدرێتە دادگا 

2021.05.17 - 14:48
App store icon Play store icon Play store icon
لەسەر خراپ خەرجکردنى 20 ملیار دینارى سلێمانى بەڕێوەبەرێکی گشتی دەدرێتە دادگا 

ناس کورد-

بەپێی زانیارییەکانی "ناس کورد" بابەکر دڕەیی بەڕێوەبەری گشتی ڕۆشبیری و هونەری سلێمانی دراوەتە دادگا، وتەبێژی وەزارەتی ڕۆشنبیری حکومەتی هەرێمی کوردستانیش ئاشکرایکرد، پێشتر لەلایەن دەستەی دەستپاکی لەسەر خراپ خەرجکردنی 20 ملیار دیناری پایتەختی ڕۆشنبیری کە لەساڵی 2014ەوە بۆ پارێزگای سلێمانی دیاریکراوە دەستەی دەستپاکی لێکۆڵینەوەی کردووەو ئەوان بڕیاری کۆتایی دەدەن.

 

کەناڵی ناس کورد لە تێلیگرام جۆین بکە   

 

نامیق هەورامانی وتەبێژی وەزارەتی ڕۆشنبیری و حکومەتی هەرێمی کوردستان لە لێدوانێکدا بۆ "ناس کورد" (17ی ئایاری 2021) ڕایگەیاند، لەسەر دۆسیەی خەرجکردنی 20 ملیار دیناری پایتەختی ڕۆشبیری کە لەساڵی  2014 بۆ سلێمانی خەرجکراوە، دەستەی دەستپاکی لێکۆڵینەوەی کردووەو باس لەوەکراوە لەسەر خراپ خەرجکردنی پارەکە لێکۆڵینەوە لە دۆسیەی بابەکر دڕەیی بەڕێوەبەری گشتی رۆشنبیری و هونەری پێشووی سلێمانی دەکرێت و دواتر ئەوان بڕیاردەدەن بدرێتە دادگا یان دادگای کارگێڕی.

 

ئەوەشی وت "ئێمە ئاگاداری نین ڕێککارەکانی چۆنە چی لەگەڵ دەکرێت چونکە دۆسیەیەک بچێتە دەستەی دەستپاکی بڕیاری سەرەتاو کۆتایی خۆیان دەیدەن چی دەکەن و چۆن دەبێت".

 

حکومەتی هەرێمی کوردستان لە 2014 بە فەرمانی نێچیرڤان بارزانی سەرۆک وەزیران بڕی 20 ملیار دیناری تەرخان کرد بۆ بوژاندنەوەی ژێرخانی هونەری شارەکە، بۆ ئەوەی لە چالاکی هونەری و بەرەوپێشبردنی بواری ڕۆشنبیری و دروستکردنی هۆڵ و ناوەندی نوێی هونەری تەرخان بکرێت.

 

بەگوێرەى بەدواداچونەکانی پێشتری "ناس کورد" لە ساڵی 2014ەوە لەنێو پەرلەمانی کوردستانەوە چەند جارێک وەزارەتی ڕۆشنبیری و بەرێوبەرایەتی ڕۆشنبیری سلێمانی ئاگادارکراونەتەوە لە چارەنوسی ئەو پارەیە بەڵام بەپێی وتەی پەرلەمانتاران وەڵامی ئەو کاتەی وەزارەتیش وەکو وەڵامەکانی ئێستایان جێگای باوەڕ نەبووە.

 

بەپێی بەڵگە نامەیەکیش کە دەست "ناس کورد" کەوتوە و ڕۆژی 22ی تەموزی 2014 دەرچوێنراوە، دەریدەخات یوسف محەمەد، سەرۆکی پێشووى پەرلەمانی کوردستان لەسەر داوانامەیەکی سۆران عومەر، پەرلەمانتاری فراکسیۆنی کۆمەڵ، داوای لە خودی خالید دۆسکی وەزیری ڕۆشنبیری ئەو کاتی حکومەتی هەرێم کردوە کە بە نوسراو یان ئامادەبوونی لە دانیشتنێکی تایبەتی پەرلەماندا وەڵامیان بداتەوە دەربارەی چارەنوسی ئەو 20 ملیار دینارە کە حکومەتی هەرێم بۆ سلێمانى تەرخان کردووە. 

 

هەر بەگوێرەى بەڵگەنامەیەکی دیکە کە دەست ناس کورد کەوتوە، ڕۆژی 28ی تەموزی 2014 وەزارەتی ڕۆشنبیری وەڵامی پرسیارەکەی سۆران عومەر، ئەندامى پەرلەمانى کوردستانى داوەتەوە و ڕایگەیاندوە "ئەو بڕە پارەیە لە 27ی ئازاری 2014ەوە گواستراوەتەوە بۆ بەڕێوبەرایەتی ڕۆشنبیری سلێمانی و بڕی 11 ملیار و 391 ملیۆن دینار تەرخان کراوە بۆ پڕۆژەکان، بەڵام تا ئەو کاتە تەنها بەبەهای 2 ملیار و 263 ملیۆن دینار پڕۆژە جێبەجێکراوە و ئەوەی دیکەی ماوەتەوە و لەقۆناغەکانی جێبەجێکردنایە، هەروەها لیستێکی پڕۆژە جێبەجێکراو و جێبەجێ نەکراوەکانیان بۆ پەرلەمان ناردوە". 

 

بەڵام وەڵامەکانی وەزارەتی ڕۆشنبیری بۆ سۆران عومەر، جێگای بڕواپێکردنی تەواو نەبووە دووبارە لە بەرواری 23ی تشرینی دووەمی 2014، نوسراوێکی دیکەی بۆ سەرۆکی پەرلەمانی کوردستان ناردووە و ڕایگەیاندوە "لەمیانەی بەدواداچونمدا بۆ وەڵامەکەی وەزیری ڕۆشنبیری بۆم دەرکەوتوە کەموکوڕی زۆر هەیە لە جێبەجێکردنی ئەو پڕۆژانەیاندا و ژێرخانی ڕۆشنبیری سلێمانی بەو هەنگاوانە پێش ناکەوێت کە ئەوان دەینێن و تا ئێستا بڕی 17 ملیار و 630 ملیۆن دینار لەو 20 ملیار دینارە بۆ چەند پڕۆژەیەکی جێبەجێنەکراو تەرخان کراوە و پڕۆژەکان بونیان نییە، بۆیە دەبێت پەرلەمانی کوردستان لەڕێگای لیژنەکانیەوە بەدواداچوون بۆ ئەو پڕۆژانەی وەزارەتی ڕۆشنبیری بکات کە کەموکورتی تێدایە و چارەنووسی ئەو پارانە بدۆزرێتەوە"..

 

 پێشتریش لەمیانەى بەدواداچوونێکى ناس کوردا لەبارەى چارەنوسی ئەو 20 ملیارە، بابەکرد دڕەیی بەڕێوبەری گشتی ڕۆشنبیری سلێمانی وتی "من بەڕێوەبەری گشتیم و بەرپرسم لە خەرجکردنی ئەو پارەیە، بە ئارەزووی خۆمە چۆن خەرجی دەکەم، کێش قسە دەکات با بیکات و هەر کات یاسا داوای لێکردم ئامادەم بچمە بەردەم دادگا بۆ هەر شتێک".