ناس کورد-
وەزیری ئاوەدانکردنەوە و نیشتەجێکردن لەسەر پشکی بزووتنەوەی گۆڕان ڕوونکردنەوەیەکی بڵاوکردەوە و ڕایگەیاند، "ماوەی چەند رۆژێکە کۆمەڵێک سایت و پەیجی فەیسبوک بۆ چەواشەکاری هەواڵی ناراست و بێ بنەما و بوختانی ئاڕاستە دەکەن، ئەوەش بە دژایەتییەک بۆ کارە گرنگەکانی خۆی دەزانێت.
کەناڵی ناس کورد لە تێلیگرام جۆین بکە
لە ڕوونکردنەوەیەکدا دانا عەبدولکەریم، وەزیری ئاوەدانکردنەوە و نیشتەجێکردن (یەکشەممە 9ی ئایاری 2021) ڕایگەیاند، "ماوەی چەند رۆژێکە کۆمەڵێک سایت و پەیجی فەیسبوک کە خاوەنەکانیان دەیان ساڵە بەهۆی پێگەکانیانەوە خەریکی دزی و گەندەڵی و تاڵانکردنی سەروەت و سامانی ئەم وڵاتەن، بۆ چەواشەکاری هەواڵی ناراست و بێ بنەما و بوختان ئاراستەی ئێمە دەکەن."
ئاماژەی بەوەشکردووە، "وەک هەمووان دەزانن، ئەرکی ئێمە خزمەتکردنی هاووڵاتیانی کوردستانە بەبێ جیاوازی، ئەوانیش ئێستا بەدرۆ و بوختان دەیانەوێت ئەو خزمەتکردنەی وەزارەتی ئاوەدانکردنەوە و نیشتەجێکردن کە لەماوەی ساڵێک و 10 مانگی رابردوودا پێشکەشی خەڵکی کوردستانی کردووە، ناشرین بکەن."
ئەوەشی خستووەتەڕوو، "ئەوان درۆ و دراوەکانیان روون و ئاشکرابوە و دەزانین کوێیان دێشێت، بەڵام ئێمە وەڵامی ئەو درۆ و بوختانانەیان بەهەوڵ و خزمەت و پڕۆژە بەردەوامەکانمان دەدەینەوە کە ئێستا لە ناوچە جیاوازەکانی هەرێمی کوردستان کاریان تێدا دەکرێت."
وەزیری گۆڕان لە کابینەی نۆیەمی حکومەتی هەرێم جەختیشیکردووەتەوە، "لێرەوە دوپاتی دەکەینەوە، ئەو بوختان و چەواشەکارییانە لە کاروانی ئاوەدانی نامانوەستێنێت و هەر لەو رۆژەوەی لە پەرلەمانی کوردستان سوێندی یاساییمان خواردو بەڵێنمان بە خەڵکداوە، کە بەردەوام دەبین لەسەر هەوڵەکانمان لێبڕاوانە بۆ خزمەتکردنی هاوڵاتیان و سودی گشتی."
لە چەند ڕۆژی ڕآبردوودا لێدوانێک بەناوی دانا عەبدولکەریم بڵاوکرایەوە کە گوایە وتویەتی، ئەو ڕاگەیەنراوەی ئەنجومەنی وەزیران لەسەر سزادراوانی بادینان بڵاویکردەوە گوزارشت لە ڕای گۆڕانیش دەکات.
