گه‌ڕان

Shadow Shadow
سیاسه‌تی

نهێنییەک لەبارەى نەخۆشخانە گڕگڕتووەکەى بەغدا ئاشکراکرا

2021.04.25 - 23:37
App store icon Play store icon Play store icon
نهێنییەک لەبارەى نەخۆشخانە گڕگڕتووەکەى بەغدا ئاشکراکرا

ناس کورد-

 

لیژنەى تەندروستى پەرلەمانى عێراق رایگەیاند، سیستەمى ئاگرکوژانەوەى نەخۆشخانەى ئیبن خەتیب لەبەغدا لەساڵى 2015 ەوە لەکار کەوتووە و چاکنەکراوەتەوە.

کەناڵی ناس کورد لە تێلیگرام جۆین بکە   

 

وەفا شەمەرى ئەندامى لیژنەکە لە چاوپێکەوتنێکدا لەگەڵ کەناڵى عێراقییە ئاماژەى بەوەکرد، وەزارەتى تەندروستى و لایەنە چاودێرییەکان بەرپرسن لەو کێشانەى لە نەخۆشخانەکە بونیان هەبووە.

 

وتیشى "سەرۆکى حکومەت لیژنەیەکى لێکۆڵینەوەى پێکهێناوە بۆ دیاریکردنى لایەنى بەرپرس لەسوتانى نەخۆشخانەکە، سیستەمى ئاگرکوژێنەوەى نەخۆشخانەکە لەساڵى 2015 ەوە لەکارکەوتووە".

 

شەمەرى باسى لەوەشکردووە، دوایین ئامارى قوربانیانى رووداوەکە بریتییە لە 82 گیان لەدەستدان و زیاتر لە 112 بریندار.

 

لەسەر رووداوەکە کە شەوى رابردوو روویدا، ئەمڕۆ یەکشەممە ئەنجومەنی وەزیرانی عێراق حەسەن تەمیمی، وەزیری تەندروستیی و پارێزگاری بەغدا و بەڕێوەبەری تەندروستیی بەری ڕەسافەی لەسەر کار ڕاگرت. 

 

ئەمڕۆ مستەفا کازمی، سەرۆک وەزیری عێراق سەرۆکایەتی دانیشتنێکی نائاسایی ئەنجومەنی وەزیرانی کرد بۆ تاوتوێکردنی ڕووداوی ئاگرکەوتنەوە لە نەخۆشخانە "ئیبن خەتیب" لە بەغدا، بەپێی فەرمانەکە، لیژنەیەکی باڵای بە سەرۆکایەتی عوسمان غانمی، وەزیری ناوخۆ و ئەندامێتی وەزیری پلاندانان، وەزیری داد، سەرۆکى دەستەى دەستپاکی و سەرۆکى دیوانی چاودێری دارایی فیدڕاڵ دروستکرا بە مەبەستی لێکۆڵینەوەی ورد لە هۆکاری ئاگرەکە و "دیاریکردن کەمتەرخەم و لێپێچینەوەیان."  

  

هەر بەپێی فەرمانەکە، پێویستە لە ماوەی پێنج ڕۆژدا لیژنەکە ڕاپۆرتی خۆی پێشکەشی ئەنجومەنی وەزیران بکات و دەتوانن سود لە شارەزای وەزارەتەکانی ناوخۆ و تەندروستی وەربگرن.  

  

درەنگانی شەوی ڕابردوو لە شاری بەغدا ئاگر لە نەخۆشخانەی ئیبن خەتیب کەوتەوە و چەند بووتڵێکی ئۆکسیجینی نەخۆشخانەکەش بەهۆی ئاگرەکەوە تەقینەوە کە ژمارەیەکی زۆر توشبووانی کۆرۆنای تێدابوو کە پێویستیان بە ئۆکسجین هەبووە.  

  

وەزارەتی ناوخۆی عێراق ئاشکرای کرد، لە ڕووداوەکەدا 82 کەس گیانیان لەدەستداوە و 110 کەسی تری بریندار بوون.