گه‌ڕان

Shadow Shadow
سیاسه‌تی

وردەکاریى

نوسەرێکى دیار هەڵەیەکى مێژوویى لەبارەى یادى ڕۆژنامەگەریى کوردى راستدەکاتەوە 

2021.04.22 - 11:59
App store icon Play store icon Play store icon
نوسەرێکى دیار هەڵەیەکى مێژوویى لەبارەى یادى ڕۆژنامەگەریى کوردى راستدەکاتەوە 

ناس کورد- 

فەرهاد شاکەلى نوسەرى دیارى کورد ڕایدەگەیەنێت، لەلێکۆڵینەوەیەکیدا لەساڵانى ڕابردوو ئەنجامیداوە ئەوەى سەلماندووە یەکەمین ڕۆژنامەى کوردى بەناوى کوردستان لەقاهیرە لە ڕێکەوتى 21ى نیسانى ساڵى 1898ەوە دەرچووە نەک لە 22ى نیسانى ئەو ساڵە.

 

کەناڵی ناس کورد لە تێلیگرام جۆین بکە   

 

شاکەلى لەوتارێکیدا بۆ ڕاستکردنەوەى ئەو دۆخە بەناوى (ڕاستکردنەوەى هەڵەیەکى چل ساڵە) ساڵى 2017 بڵاوى کردووەتەوە و داواى کردووە ئەو ڕێکەوتە چاک بکرێتەوە و ڕێکەوتە ڕاستەقینەکە کە دەکاتە 21ى نیسان بکرێتە یادى ڕۆژنامەگەرى کوردى، بەڵام بەهۆى دووبارە بوونەوەى ئەو دۆخەوە ئەمساڵ لەو یادەدا ئەو وتارە کۆنەى بیرهێناوەتەوە و لەپەڕەکەى فەیسبوکى دیسانەوە بڵاوى کردووەتەوە.



دەقى وتارەکەى فەرهاد شاکەلى:

 

ڕاستکردنه‌وه‌‌ی هه‌ڵه‌یه‌کی چلساڵه

 

یه‌که‌مین ژماره‌ی ڕۆژنامه‌ی کوردستان ١٠٩ ساڵ پێش ئێستا له‌ قاهیره‌ بڵاو کراوه‌ته‌وه‌. حه‌فتا ساڵ پاشتر به‌ کۆششی چه‌ند لێکۆڵه‌ره‌وه‌یه‌کی کورد ژماره‌کانی ڕۆژنامه‌که‌ دۆزرانه‌وه‌ و چاپ کران و ئه‌م کاره‌ بوو به‌ سه‌ره‌تایه‌ک بۆ لێکۆڵینه‌وه‌ی ڕۆژنامه‌گه‌ریی کوردی و نووسینه‌وه‌ی مێژووه‌که‌ی. له‌ ساڵی ١٩٦٨ه‌وه و تا ئه‌مڕۆ،‌ هه‌ر هه‌موو ئه‌وانه‌ی له‌سه‌ر ڕۆژنامه‌گه‌ریی کوردییان نووسیوه‌ وایان زانیوه‌ یه‌که‌مین ژماره‌ی ڕۆژنامه‌که‌ ڕۆژی ٢٢ی نیسانی ساڵی ١٨٩٨ی زایینی بڵاو کراوه‌ته‌وه‌،  هه‌ر له‌به‌ر ئه‌وه‌یش ڕۆژی ٢٢ی نیسان (ئه‌پریل) کراوه‌ به‌ ڕۆژی ڕۆژنامه‌گه‌ریی کوردی و هه‌موو ساڵێک له‌و ڕۆژه‌دا یادی ڕۆژنامه‌ی کوردستان ده‌کرێته‌وه‌.

 

له‌و لێکۆڵینه‌وه‌یه‌دا من هه‌وڵم داوه‌ ئه‌و هه‌ڵه‌یه‌ ڕاست بکه‌مه‌وه‌ و ئه‌وه‌ بچه‌سپێنم که‌ یه‌که‌مین ژماره‌ی ڕۆژنامه‌ی کوردستان ڕۆژی پێنجشه‌ممه‌ی ٢٩ی زولقه‌عده‌ی ساڵی ١٣١٥ی کۆچی، ٩ی نیسانی ساڵی ١٣١٤ی ڕوومی و ٢١ی نیسانی ساڵی ١٨٩٨ی زایینی ده‌رچووه‌. ئه‌و باوه‌ڕه‌ی که‌ تا ئێستا له‌و بواره‌دا له‌ ئارادا بوو له‌گه‌ڵ بنه‌ماکانی لێکۆڵینه‌وه‌ی زانستیدا ناکۆک و نه‌گونجاوه‌.

 

ئه‌گه‌ر تا ئێستا ڕۆژی ٢٢ی نیسان به‌ ڕۆژی ڕۆژنامه‌گه‌ریی کوردی دانراوه‌، ده‌بێ له‌ ئه‌مڕۆ به ‌دواوه‌ ڕۆژی ٢١ی نیسان ببێته‌ ڕۆژی ڕۆژنامه‌گه‌ریی کوردی. ئه‌م جیاوازییه‌ ئه‌گه‌رچی یه‌ک ڕۆژه‌، به‌ڵام هه‌م له‌ کار و لێکۆڵینه‌وه‌ی زانستیدا و هه‌م له‌ مێژووی سیاسی و فه‌رهه‌نگیی مرۆڤایه‌تیدا بایه‌خی خۆی هه‌یه‌ و ده‌بێ ڕاستی ئامانجی یه‌که‌م بێت. 

 

سوێد، به‌هاری 2017