گه‌ڕان

Shadow Shadow
سیاسه‌تی

بارەگای بارزانی لەبارەى شەڕی میدیایی یەکێتی و پارتی هاتەدەنگ

2021.04.20 - 23:58
App store icon Play store icon Play store icon
بارەگای بارزانی لەبارەى شەڕی میدیایی یەکێتی و پارتی هاتەدەنگ

ناس کورد-

بارەگای بارزانی لەبارەى شەڕی میدیایی پارتی و یەکێتی ڕاگەیەنراوێکی بڵاوکردەوە و دەڵێت، بارزانی فەرمانی بە ڕاگەیاندن و میدیاکانی حزبەکەى کردووە پێویستە ڕەچاوی بەها و پرەنسیپ و بنەماکانی ڕەوشتبەرزی بکرێت."

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا کە کۆپییەکی دەستی ناس کورد کەوتووە، بارەگای بارزانی (20ی نیسانی 2021) دەڵێت، "لەبارەی دیاردەی نامەقبووڵی جنێودان و بەكارهێنانی زمانی زبر لە ڕاگەیاندن و تۆڕە كۆمەڵایەتییەكان كە بە داخەوە ماوەیەكە لەنێوان لایەنە سیاسییەكاندا لە ئارادایە، سەرۆك بارزانی فەرمانی بە ڕاگەیاندن و میدیاكانی پارتی دیموكراتی كوردستان كردووە كە پێویستە لە چاڵاكی و كاری ڕاگەیاندندا ڕەچاوی بەها و پڕەنسیپ و بنەماكانی ڕەوشتبەرزی بكرێت و ئامانجی سەرەكیی پاراستنی بەرژەوەندییەكانی گەلی كوردستان بێت. هەر بەپێی ئەو فەرمانە هەر ئۆرگانێكی پارتی پابەندی بەها و ئامانجەكانی پارتی و پڕەنسیپە گشتییەكان نەبێت ئیجرائاتی لەگەڵدا دەكرێت."

 

دەشڵێت، "هەر لێرەشدا ڕایدەگەیێنین كە سەرۆك بارزانی، پێشتر و ئێستا و لە داهاتووشدا خۆی بە پێشمەرگە دەزانێت و، پێشمەرگایەتی لە سەرووی هەموو جۆرە پێناسە و پلە و پایە و، بە گەورەترین شانازی دادەنێت. بەلای سەرۆك بارزانییەوە خوێنی شەهیدان و سەنگەری پێشمەرگە مەرجەعن بۆ هەموو خاوەن قەزییە و نیشتیمانپەروەر و وڵاتپارێزانی كوردستان."

 

ڕۆژی 19ی نیسانی 2021، ئاڵا تاڵەبانی، سەرۆکی فراکسیۆنی یەکێتی لە پەرلەمانی عێراق لە چاوپێکەوتنێکی تەلەفزیۆنیدا لە کەناڵی "الهعد"ی عێراق وتی، مەسعود بارزانی مەرجەعی سیاسیی هەموو کورد نییە بەڵکو مەرجەعی حزبەکەیەتی.

 

قسەکانی ئاڵا تاڵەبانی کاردانەوەی توندی میدیای پارتی بەدوای خۆیدا هێنا و هێرشێکی میدیایی توندیان کردەسەر ناوبراو، ئەوەش کاردانەوەی جیاوازی لێکەوتەوە و تائێستاش کاردانەوەکان بەردەوامن.

 

لە نوێترین کاردانەوەشدا، قوباد تاڵەبانی، جێگری سەرۆکی حکومەتی هەرێم پشتیوانی خۆی بۆ ئالا تاڵەبانی ڕاگەیاند و لە بڵاوکراوەیەکدا ئاماژەی بەوەکرد، "ناكۆكییە سیاسییەكان چەندە قوڵ و فراوان بن، بۆچوون و تێبینییەکانمان چەندە دوور و دژبەیەك بن، نابێت ببنە بیانوو و بەھانە بۆ بێ ئەدەبی و تێپەڕاندنی سنورەكانی ئەخلاق، لەوەش خراپتر ئەو عەقڵییەتەیە کە بە بیانووی ناکۆکی سیاسی هێرش دەکاتە سەر کەسێتیی و جەستەی ژنە سیاسییەک."