گه‌ڕان

Shadow Shadow
سیاسه‌تی

وردەکاری بزانە

هەرێم و بەغدا ’’ڕێککەوتنى نوێ’’ لەسەر بودجە دەکەن

2021.04.12 - 21:09
App store icon Play store icon Play store icon
هەرێم و بەغدا ’’ڕێککەوتنى نوێ’’ لەسەر بودجە دەکەن

ناس کورد-

سەرۆکی لیژنەی دارایی پەرلەمانی کوردستان ڕایگەیاند، میکانیزمى هەژمارکردنى پشکى هەرێم لە یاساى بودجەى عێراق پێویستى بە ڕێککەوتنى نوێ هەیە، بۆ ئەو مەبەستەش شاندى هەرێم دەچێتەوە بەغدا.

کەناڵی ناس کورد لە تێلیگرام جۆین بکە   

 

زیاد جەبار (12ی نیسانی 2021) بە "ناس کورد"ی ڕاگەیاند، تاوەکو ئێستا دیار نییە مانگانە حکومەتی فیدراڵ چەندە داهات ڕەوانەی هەرێمی کوردستان دەکات ئەوەش بەهۆی ئەوەی وردەکاری ماوە لەبارەی ڕێککەوتنەکە.

ڕوونیشیکردەوە، "پێویستە دوای دەرکردنی ڕێنمایی لە وەزارەتی دارایی عێراق تایبەت بە یاسای بودجە لەگەڵ وەزارەتی دارایی هەرێم کۆببنەوە بەتایبەت بۆ پرسی فرۆشتنی نەوت و داهاتەکەی کە ئایا بە چ میکانزمێکە، داهاتەکەی لێ دەردەکەن یاخود چۆن دەبێت، ئەمانەش تاوەکو ئێستا یەکلایی نەکراوەتەوەو ڕەنگە بۆ ئەوەش پێویست بکاتەوە شاندی هەرێم سەردانی بەغدا بکاتەوە".



زیاد جەبار باسى لەوەشکرد، ئەمڕۆ وەزارەتی دارایی هەرێم نوسراوی کردووە بۆ وەزارەتی دارایی عێراق و داوایکردووە میکانزمى ناردنى پارەکە دیاری بکرێت چۆن دەبێت، لێدەرکردنە یاخود ناردنی داهاتەکەیەو ئەوەش پێویستی بە ڕێککەوتنە.



سەبارەت بەوەی داواکراوە حکومەتی فیدراڵی لەسەرەتای ئەمساڵەوە پابەندی یاسای بودجەی 2021 بێت و داهاتی ئەو مانگانە ڕەوانە بکات، ئایا حکومەتی هەرێمیش پابەندی ناردنی داهاتی ئەو سێ مانگە دەبێت، سەرۆکی لیژنەی دارایی وتی، "بێگومان دەبێت هەرێمی کوردستانیش بەهەمان شێوە پابەندبێت".



ئەمڕۆ دووشەممە (12ی نیسانی 2021) شاندى دانوستانکارى هەرێم و پەرلەمانى کوردستان کۆبوونەوە و تاوتوێی رێککەوتنى هەرێم و بەغدا و بەشە بودجەى هەرێمیان کرد.


بەگوێرەى راگەیەندراوێکى نوسینگەى قوباد تاڵەبانى، لە کۆبوونەوەکەدا جێگرى سەرۆکی ئەنجومەنى وەزیران ئاماژەى بەوەدا وە‌ك حکومەتى هەرێمی کوردستان پابەندبوونی خۆیان دەربڕیوە بەجێبەجێکردنی ئەو رێککەوتنە ولایە‌نە‌ پە‌یوە‌ندیدارە‌كانیشیان راسپاردووە‌ بۆ ئە‌و مە‌بە‌ستە‌.