گه‌ڕان

Shadow Shadow
سیاسه‌تی

وردەکاریى

 پێشبینییەکان بۆ شەپۆلێکی ترى بارانبارین لەهەرێمى کوردستان 

2021.03.31 - 22:52
App store icon Play store icon Play store icon
 پێشبینییەکان بۆ شەپۆلێکی ترى بارانبارین لەهەرێمى کوردستان 

ناس کورد-

کەشناسێکی هەرێمی کوردستان پێشبینی دەکات، سبەی پلەکانی گەرما لە ناوچە جیاجیاکانی هەرێم بە شێوەیەکی بەرچاو بەرزببنەوە و دەشڵێت، ڕۆژی هەینی و شەممەی داهاتوو جارێکی تر شەپۆلێکی بارانبارین ڕوو لە شارەکانی هەرێمی کوردستان دەکاتەوە و پلەکانی گەرماش چەند پلەیەک دادەبەزن. 

 

کەناڵی ناس کورد لە تێلیگرام جۆین بکە   

 

ئاراس جەبار، شارەزای بواری کەشناسی لەهەرێمی کوردستان (31ی ئازاری 2021) لە ڕوونکردنەوەیەکدا کەوێنەیەکی دەست "ناس کورد" کەوتووە، بڵاویکردەوە "سبەی (پێنجشەمە1ی نیسان 2021 ) لە ئەنجامی بەردەوامی کاریگەری شەپۆلی گەرما و نزمە پاڵەپەستۆی لاوازی دەریای سور پلەکانی گەرمی بەتێکرای پێنج پلەی سلیزی بەرزدەبنەوە".

 

ڕاشیگەیاند "ئاسمانی ھەرێم بە زۆری لەنێوان پەڵە ھەور و ساماڵدا دەبێت، لەناوچەکانی سلێمانی، گەرمیان و ھەڵەبجە زیاتر نیمچە ھەور دەبێت ئەگەری بارانبارین نابێت و چالاکی با بەخێرای مامناوەند دەبێت بەئاراستەی باشوری رۆژئاواوە ".

 

ئەو کەشناسە ئاماژەی بەوەشکردووە "رۆژی ھەینی لە دەمی نیوەرۆ بەدواوە ناوچەکانمان دەکەوێتەوە ژێر کاریگەری ھاتنی نزمە پاڵەپەستۆیەکی لاوازی دەریای ناوەراست و کاریگەری بارستە ھەوایەکی فێنکی لەگەڵ ئەبێت لەئەنجامدا پلەکانی گەرما بە تێکرای چوار پلەی سلیزی روو لەنزمبوونەوە دەکاتەوە".

 

ئەوەشی خستووەتەڕوو "شەپۆلێکی لاوازی بارانبارین ناوچە سنورییەکانی سنوریی پارێزگای ھەولێر، دھۆک دەگرێتەوە و کاریگەری لەسەر ناوچەکانی دیکەی ھەرێم نابێت و کەش سەقامگیر دەبێت".

 

جەبار، ڕوونیشکردەوە "لە پێشنیوەرۆی رۆژی شەممە 3 ی نیسان کاریگەری نزمە پاڵەپەستۆکە بە لاوازی درێژ دەبێتەوە بۆ ناوچەکانی سنوریی ئیدارەی راپەرین و ھەردوو پارێزگای سلێمانی و ھەڵەبجە، ئەگەری نمەباران دەبێت لە سەنتەری پارێزگاکاندا، لە ناوچە شاخاوییەکان بارانبارینێکی کەم و پچر پچر بە رێژەی 1 تا 3 ملیمەتر دەبارێت".

 

ئەو کەشناسە پێشبینی ئەوەشی کردووە "لە ئەنجامی زیاتر بوونی بارستە ھەوا فێنکەکە لەسەر ناوچەکە بە تێکرای 2 پلەی سلیزی پلەکانی گەرمی زیاتر روو لەنزمبوونەوە دەکاتەوە".

 

دەشڵێت "کاریگەری ئەم شەپۆلە ھەر لە ئێوارەی رۆژی شەممە 3ی نیسان کۆتای پێ دێت و لەرۆژانی دواتر پلەکانی گەرما جارێکی دیکە روو لەبەرزبوونەوەی بەرچاو دەکاتەوە، بۆیە پێشبینی دەکەین تا ماوەی ھەفتەیەک شەپۆلی بارانبارین ناوچەکە نەگرێتەوە کەشێکی وشک و نیمچە گەرم باڵادەست ببێت لە ناوچەکەدا" .