گه‌ڕان

Shadow Shadow
سیاسه‌تی

’’زەرەرمەند هاوڵاتییە’’

ئەندامێکی لیژنەی دارایی: ئەگەر زۆرە عێراق سكاڵای نەوتی هەرێم لە توركیا بباتەوە

2021.03.28 - 12:04
App store icon Play store icon Play store icon
ئەندامێکی لیژنەی دارایی: ئەگەر زۆرە عێراق سكاڵای نەوتی هەرێم لە توركیا بباتەوە

ناس کورد-

ئەحمەدی حاجی ڕەشید، ئەندامی کوردی لیژنەی دارایی پەرلەمانی عێراق ڕایگەیاند، بەپێی ئەو دەقەی کە شاندی هەرێم و شیعەکان ڕێککەوتوون لەسەری، هەرێم بۆ ڕادەستکردنی داهاتی یەک بەرمیل نەوت بە نرخی سۆمۆ دەبێت دوو بەرمیل و نیو بفرۆشێت تا پارەی بەرمیلێک نەوت بدات.

کەناڵی ناس کورد لە تێلیگرام جۆین بکە   

 

ئەحمەدی حاجی ڕەشید لە فەیسبوکی خۆی بابەتێکی بەناوی "ئەوکاتەى دانوستانکاری کورد شکست دەهێنێت کێ باجەکەى دەدات؟" بڵاوکردووەتەوە کە "ناس کورد" بەدواداچوونی بۆ کردووە (28ی ئازاری 2021) باسی لەوەکردووە، "لە دانوستانی بوجەدا شاندی هەرێم لە سەرەتاوە لەگەڵ حکومەت ڕێککەوتوون لەسەر ڕادەستکردنی داهاتی 250 هەزار بەرمیل نەوت بە نرخی سۆمۆ لەگەڵ 50%ی داهاتی فیدراڵی و پاشانیش لەگەڵ هێزە سیاسیەکان ڕێکەوتوون بەتایبەت هێزە شیعیەکان لەسەر هەمان بابەت و بڕ."

 

دەشڵێت، لە ئێستادا ئەو دەقە کۆتا دەقە کە ڕێککەوتنی لەسەر کراوە بۆیە "من پێم باشە هەرێم لەسەر ڕادەستکردنی نەوت ڕێک بکەوێت نەک داهاتەکەی."

 

ئەحمەدی حاجی ڕەشید باسی لەوەشکردووە کە "ئەوەی هەرێم ڕازی بووە لەسەری بۆ ڕادەستکردنی داهاتی یەک بەرمیل نەوت بە نرخی سۆمۆ دەبێت دوو بەرمیل و نیو بفرۆشێت تا پارەی بەرمیلێک نەوت بدات، لە بەرانبەردا هەرێم سودی ئەوەی دەست دەکەوێت کە شەرعیەتی یاسایی بەدەست دەهێنێت بۆ فرۆشتنی نەوت و حکومەتی فیدڕاڵ ناتوانێت هیچ جۆرە سکاڵایە لەدژی هەرێم لە دادگای ناوخۆیی بێت یان لە دەرەوە تۆمار بکات لەمەو دوا."

 

ڕوونیشیکردووەتەوە کە "ئەگەری زۆرە وڵاتی تورکیا ئەو سکاڵایە بباتەوە کە عێراق لەدادگای پاریس لەسەری تۆمار کردوە و داوای 26 ملیار قەرەبووی لێدەکاتەوە."

 

جەختی کردووەتەوە کە "ئەگەر ڕێکەوتنەکە جێبەجێکرا ئەوا هەرێم لە فرۆشتنی نەوت و داهاتی ناوخۆ نزیکەی (750) ملیار دیناری دەستدەکەوێت کە لەسەری دەکرێتە ماڵ، لە باشترین حاڵەتدا حکومەتی فیدڕاڵ بە سیستەمی مقاسە بڕی (250) ملیاری بۆ بنێرێت، بەڵام هەرێم دەبیت پارەی کۆمپانیا و کرێی ئەو شتانەی دیکە بدات کە 55%ی داهاتی نەوتەکەیەتی، بۆیە ئەوەی دەمێنێتەوە دیسان بەشی خەرجیەکانی ناکات."

 

دەشڵێت، "خۆ ئەگەر بڕگەی (نفقات فعلیەی) سەردەمی عەبادی جێبەجێ بکەن ڕەنگە ئەو بڕەش نەنێرن، کەواتە بۆ دانوستامان کرد؟، خۆ ئەگەر سیستەمی مقاسە نەکرێت یاسای ئیدارەی دارایی مادەی 27 بڕگەی 5 جێبەجێ نەکرێت ئەوا دەگڕینەوە بۆ خاڵی سەرەتا هەرێم هیچ نەدات و بەغداش هیچ."

 

ئەحمەدی حاجی ڕەشید باسی لەوەشکردووە، "کەواتە زەرەرمەندی سەرەکی هاوڵاتی دەبێت."

 

لە کۆتاییدا دەڵێت، "بۆیە من دەنگ نادەم بە بوجەیەک بۆ بەرژەوەندی سیاسیەکان و بنەماڵە دەستڕۆشتوەکان نوسرابێت و لە بەرژەوەندی خەڵک نەبێت، دەنگ نەدانیش مەرج نییە نەچمە کۆبونەوەکەی ئەمڕۆوە."