گه‌ڕان

Shadow Shadow
سیاسه‌تی

وردەکارییەکەى بزانە

دادگا دۆسیەی دیارنەمانی 54 ملیار دیناری سلێمانی ’’بە بڕیاری سیاسی’’ داخست

2021.03.27 - 15:04
App store icon Play store icon Play store icon
دادگا دۆسیەی دیارنەمانی 54 ملیار دیناری سلێمانی ’’بە بڕیاری سیاسی’’ داخست

ناس کورد-

عەلی حەمە ساڵح داخستنی دۆسیەیەک لە دادگای سلێمانی ئاشکرا دەکات و دەڵێت، "ئەمە تاوان بوو بەرامبەر نزیکەی دوو ملیۆن دانیشتوانی ئەم پارێزگایە و ئەم دۆسیە پێی وتین سەربەخۆی دادگا درۆیەکی گەورەیە."

کەناڵی ناس کورد لە تێلیگرام جۆین بکە   

 

عەلی حەمە ساڵح، پەرلەمانتاری فراکسیۆنی گۆڕان لە پەرلەمانی کوردستان لە فەیسبوکی خۆی بابەتێکی بەناوی "ئەو تاوانەی بەرامبەر سلێمانی کرا، دادگا بە بڕیاری سیاسی دایخست" بڵاوکردووەتەوە کە "ناس کورد" بەدواداچوونی بۆ کردووە و دەڵێت، ساڵی 2013 بڕی 368 ملیار دینار بۆ پرۆژەکانی پارێزگای سلێمانی تەرخانکرا، بەڵام چی ڕویدا! 48٪‏ پارەی پرۆژەکانی سلێمانی خەرج نەکرا، لەوەشی کە خەرجکرا 54 ملیاری دیار نەما.


ئاشکراشیکردووە، لە 12ی کانونی دووەمی 2015 دۆسیەی دیارنەمانی پارەی پرۆژەکانی سلێمانیم دا بە دادگا، بۆ ئەم دۆسیەش پشتم بە ڕاپۆرتی چاودێری دارایی بەستبوو.


ڕاشیگەیاندووە، ساڵی 2013 بۆ پارێزگای هەولێر 106% ئەو پارە خەرج کرا کە بۆ پڕۆژە بۆی تەرخانکرا، بۆ پارێزگای دھۆک 102% ئەو پارە خەرجکرا کە بۆی تەرخانکرا، بۆ پارێزگای سلێمانی 52% ئەو پارە خەرجکرا کە بۆی تەرخانکرابوو، لەوەش 54 ملیار دیناری دیار نەما!!


عەلی حەمە ساڵح نوسیویەتی، دھۆک، بەراورد بە سلێمانی پارێزگایەکی بچوکترە بۆ دھۆک 226 ملیار دینار بۆ پرۆژە خەرجکرا، بەڵام بۆ کۆی پارێزگای سلێمانی 192 ملیار! 54 ملیار دیناری دیکەی تەمویلکراوی پڕۆژەش خەرج نەکراو دیار نەما!! ئەو کات کاک سەردار قادر پارێزگاری سلێمانی بوو، ھەموو ئەو بەڵگانەی لە ڕاپۆرتێکدا ئاراستەی دەستەی نەزاھە کرد کە ڕاستی و دروستی ئەم قسانەیان دەسەلماندو چۆن پارەکە لە بانکدا براوە!!


باسی لەوەشکردووە، ئەم دۆسیە بەبێ ھیچ دانیشتنێکی دادگا و بە بڕیاری سیاسی داخرا. "دواتر زانیم دوو دادوەر کە دژی ئەم داخستنە بوون گواسترانەوە!! ئەمە تاوانبوو بەرامبەر نزیکەی دوو ملیۆن دانیشتوان ئەم پارێزگایە! ئەو پارەی برا دەبوو بکرێتە چەندین قوتابخانەو نەخۆشخانەو پرۆژەی ڕێگاوبان بۆ ئەم شارەو قەزاکانی."


پەرلەمانتارەکەی گۆڕان لە پەرلەمانی کوردستان ئەوەش دەڵێت، "ئەم دۆسیە پێیوتین سەربەخۆی دادگا درۆیەکی گەورەیە، ئەم دۆسیە پێیوتین، ئەم ھێزو حوکمڕان و سیاسیانە لە خەمی گیرفانی خۆیاندان نەک ئەم شارە".