گه‌ڕان

Shadow Shadow
سیاسه‌تی

ڕەبعوڵڵا كێن؟

ڕەبعوڵڵا كێن كە ئەمڕۆ لە شەقامەكانی بەغدا بڵاوەیان كرد؟

2021.03.25 - 21:42
App store icon Play store icon Play store icon
ڕەبعوڵڵا كێن كە ئەمڕۆ لە شەقامەكانی بەغدا بڵاوەیان كرد؟

ناس کورد-

لەدوای كوژرانی قاسم سلێمانی و ئەبو مەهدی موهەندیسەوە لە سەرەتای 2020 چەندین گروپ و ناونیشانی نوێی گروپی چەكداریی ڕاگەیەنراون كە یەكێكیان كۆمەڵی "ڕەبعەڵڵان" كە پاش هەڵكوتانە سەر بارەگای پارتی دیموكراتی كوردستان لە بەغدا و ژمارەیەك مەیخانەی بەغدا، ئەمڕۆ نمایشێكی چەكدارییان لە هەندێ شەقامی بەغدا ئەنجامدا.  

کەناڵی ناس کورد لە تێلیگرام جۆین بکە   

 

بەپێی زانیارییەكانی "ناس كورد"، ڕەبعوڵڵا كە بەشێوەزاری جڵفی بە "ڕبعەڵڵا" دەخوێنرێتەوە و هێمایە بۆ "خەڵكانی دۆستی خودا"، چەندین گەنج و ئەندامیان بە كردەیی لەبەردەستە كە لە سوتاندنی بارەگای كەناڵی UTV ی سەرمەدی كوڕی خەمیس خەنجەر و هەڵكوتانە سەر نوسینگەی بەغدای MBC عێراق بەشدارییان كردووە، لە زیارەتی چلەی ئیمام حوسێنی پارساڵیشدا بەشێوەیەكی فراوان لە شەقامەكانی كەربەلادا بە لۆگۆی ئەم گروپەوە دەردەكەوتن.  

 

پێشتر میدیا ئەمەریكییەكان لەوانەش ئەلحوڕە لە (9 تشرینی یەكەمی 2020) لەزاری زیاتر لە سەرچاوەیەكی ئاگادارەوە بڵاویان كردەوە كە "ڕەبعەڵڵا" سەر بە "بزوتنەوەی عەسایب" ن  كە قەیس خەزعەلی سەرۆكایەتی دەكات و پێشتر لە سەدر جیا بووەتەوە، بەڵام دواتر هەر ئەو میدیایانە ئەوەیان بەڕاستتر دانا كە ئەم گروپە سەربە كەتیبەكانی حیزبوڵڵابن كە باڵی سوپای پاسدارانە لەعێراق و لە (جرف الصخر) بارەگا و سەربازگەی دابڕاویان هەیە.

 

بەپێی ئەو زانیاریانەی بەردەستn, گروپی "ڕەبعەڵڵا" دەچێتەوە سەر مۆدێلی نوێی گروپە چەكدارەكانی سەر بە ئێران لە چەشنی "عصبة الثائرين"، "أصحاب الكهف" و "قبضة المهدي"، و دواترینیان "سرایا أولیاء الدم"، سەرجەم ئەمانەش بە نوێترین مۆدێلی كاركردنی حەشدی وەلائی (ئێرانی) لەقەڵەم دەدرێن، كە سەرچاوە هەواڵگرییەكانی وڵاتانی ڕۆژئاوا پێیانوایە لق یان ڕووكاری میلیشیا و گروپە چەكدارە ناسراوەكانی پاشكۆی ئێرانن كە بۆ خۆ بواردن لە ناسینەوەو سزادان یان بەئامانجكردنیان پەنایان بۆ خۆحەشاردان لەژێر ناوی نوێدا بردووە. 

 

هەندێ سەرچاوەش لە زاری كادیرانی حزبوڵڵای عێراقەوە ئەوەیان پشت ڕاست كردووەتەوە كە ئەو "گرووپە نەناسراوانە" لەلایەن ئەوانەوە بە ئاگاداریی بزوتنەوەی عەسایب و نوجەبا و گروپە دژەئەمەریكاییەكانی تر دامەزراون، شاردنەوەشیان لەژێر ناوی "ڕەبعوڵڵا" بۆ دوركەوتنەوەیە لە پەرچەكرداری حكومەت یان ئەمەریكا بەتایبەت لەسەردەمی ترەمپدا. 

 

پەیوەستنەبوونی ئەم گروپانەش بە هیچ گروپێكی ناسراوەوە، بازدانە بەسەر پڕۆسەی سیاسیی عێراق و تێپەڕاندنی چوارچێوەی فەڕمیی حەشدی شەعبییە كە لە ڕووی تێورییەوە بەپێی یاسای (40)ی ساڵی 2016 دەبێت سەر بە فەرماندەی گشتیی هێزە چەكدارەكانی عێراق بێت. 

 

رۆژنامەی ئەخباری لوبنانی سەر بە حیزبوڵڵای لوبنان لە راپۆرتێكدا  (29 ئەیلولی 2020) بڵاویكردەوە ئەو گروپانەی ناوی نامۆ و نوێیان هەیە، نەوەی نوێ و درێژكراوەی ئەو گرووپە چەكدارە ناسراوانەن كە لەلایەكیترەوە بەیاننامەی رەتكردنەوەی بەشداری لەو هێرشانە دەردەكەن.  

 

فەرماندەی گشتیی ئۆپەراسیۆنەكانی عێراق ڕایگەیاندووە: لێكۆڵینەوە لە شوناسی ڕەبعوڵڵا دەكات، بەڵام سەرچاوە هەواڵگرییە عێراقییەكان پێشتر دڵنیایی خۆیان ڕاگەیاندووە كە ئەم گروپە و هاوشێوەكانیان نوێ نین و پەیوەستن بە گروپیتری رێكخراوەوە كە تەكنیكی شەڕی پاش 2003 بەكاردەھێنن كە دەستوەشاندن و خۆ حەشاردان و بەكارهێنانی گوتاری مقاوەمەیە.

 

تەكنیكی كاری ڕەبعوڵڵا زیاتر لەوەدا خۆی دەبینێتەوە كە پێشتر هەڵمەتی میدیایی بەرپا دەكات دژی ئامانجەكانی بەتایبەت لەرێگەی ئەكاونتی وەهمییەوە لە تویتەر بۆ ئەوەی وای پیشان بدات هەنگاوەكانی پاڵپشتیی خەڵكیان هەیە، دواتریش بەسووتاندنی بارەگا و دابەزینە شەقام كۆتایی دێت.

 

ئەو ناوانەشی ڕبعوڵڵا بەكاردەهێنن هێمای جۆراوجۆریان هەیە، "بەرەی چەرخ" كە كاریان سووتاندنە، ئەو سەكۆ میدیاییەشی پاڵپشتییان دەكات ناوی "صابرین" ـە مە زۆرجار سەبقی میدیاییان هەیە.