گه‌ڕان

Shadow Shadow
سیاسه‌تی

زانیاری و وردەکاری نوێ

ناوی ئەو دوو کەسە ئاشکرا کرا کە دەستکارى ڕێککەوتنى هەرێم و بەغدایان کردووە

2021.03.24 - 11:54
App store icon Play store icon Play store icon
ناوی ئەو دوو کەسە ئاشکرا کرا کە دەستکارى ڕێککەوتنى هەرێم و بەغدایان کردووە

ناس کورد-

ئەندامێکى لیژنەى دارایی پەرلەمانى عێراق ئاشکرایکرد، حەسەن کەعبى، جێگرى سەرۆکى پەرلەمان و فالح سارى، سەرۆکى فراکسیۆنی حیکمە دەستکاریی ڕێککەوتنى هەرێم و بەغدایان کردووە.

کەناڵی ناس کورد لە تێلیگرام جۆین بکە   

 

شیروان میرزا لە چاوپێکەوتنێکى تەلەفزیۆنیدا لەگەڵ میدیاى یەکێتى کە "ناس کورد" بەدواداچوونى بۆ کردووە وتى، "شیعەکان دوو شتیان لەو ڕێککەوتنە دەستکاریکردووە کە لە لیژنەى دارایی پەسەندکراوە، ئەوەش نایاساییە، ئەگەر تێبینییەکیان هەیە یان پەشیمان بوونەتەوە دەتوانن پێشنیازەکانیان بهێننەوە لیژنەکە و تاوتوێی بکەینەوە".

 

ڕوونیشیکردەوە، دەستکارییەکە کە لەلایەن حەسەن کەعبى و فالح سارىییەوە کراون، یەکێکیان ئەوەیە لەجیاتى بەرهەمهێنانى 460 هەزار بەرمیل نەوت، کردویانە بەوەى بەهاى 460 هەزار بەرمیل ڕادەست بکرێت، ئەوەیان زۆر کێشەى نییە چونکە دواى لێدەکردنى خەرجییەکان هەر بەهاى 250 هەزار بەرمیل نەوت دەمێنێتەوە.

 

بەوتەى شیروان میرزا، دەستکارى دووەمیان کە کێشەیە، بڕەگەى (هـ)ـە کە وەک یاساى کورتهێنانى داراییان لێکردووە و کراوە بەوەى ئەگەر هەرێم پابەند نەبوو ئەوا هیچ بڕە پارەیەک بۆ هەرێم نانێردرێت.

 

دەشڵێت، ئەوان دوو تێبینیان هەیە لەسەر ئەو دەستکاریکردنە، یەکەمیان ئەوەیە کە ئەوە نابێتە هۆى چارەسەرى کێشەى ڕادەستکردنى نەوت کە بەردەوام لەشەقامى عێراقى دەوروژێنرێت چونکە باسى بەهایە نەک نەوت، دووەم هەرێم دەبێت نەوتێکى زۆرتر بفرۆشێت بۆ ئەوەى بەهاى 250 هەزار بەرمیل بدرێتە سۆمۆ، چونکە هەرێم لانیکەم 10 دۆلار کەمتر دەیفرۆشێت.

 

"ئێمە پشتیوانى ئەو دەقەمان کرد لەبەرئەوەى شاندى هەرێم لەسەرى ڕێککەوتبوو، هەرچەندە پێمانوایە ئەمە لەزیانى هەرێمە"، شیروان میرزا وایوت.

 

بەوتەى ئەو ئەندامەى لیژنەى دارایی، مەبەست لەو دەستکاریکردنە لەلایەن ئەو دوو کەسەوە کە نوێنەرایەتى سائیرون و حیکمە دەکەن دیار نییە کە ئایا پەشیمان بوونەتەوە لە ڕێککەوتنیان لەگەڵ هەرێم، یان هەر ویستیان لەو رێگەیەوە پڕۆژەکە تێنەپەڕێت.

 

دەستکاریکردنى ڕێککەوتنەکە لەلایەن نوێنەرانى سائیرون و رەوتى حیکمەوە لەکاتێکدایە، دوێنێ سێشەممە جەعفەر ئیمینکى، ئەندامى مەکتەبى سیاسی پارتى لە چاوپێکەوتنێکدا لەگەڵ کەناڵى "ڕووداو" ڕایگەیاندبوو، سەدرییەکان نزیکترین هێزی سیاسییە بۆ ئەوان، هەروەها ڕەوتی حیکمەش دەستپێشخەری باشیان هەبووە بۆ ئەوان و یەکێتیش.

 

بڕیاربوو شەوى هەینى پڕۆژەى بودجە لەلایەن پەرلەمانى عێراقەوە بخرێتە دەنگدانەوە، بەڵام تێپەڕاندنى دواخرا بۆ ڕۆژى شەممەی ڕابردوو، بەڵام ئەو وادەیەش دواخرا بۆ شەممەى داهاتوو (27ی ئازاری 2021).

 

پێش دواخستنى دانیشتنەکە، لیژنەى دارایی پەرلەمانى عێراق ڕێککەوتنى نێوان شاندى هەرێم و لایەنە شیعییەکانى پەسەندکرد، کە تایبەتە بە رادەستکردنى 460 هەزار بەرمیل نەوت و نیوەى داهاتە فیدراڵییەکان.

 

سەمیر هەورامى، وتەبێژى قوباد تاڵەبانى دوێنێ سێشەممە، 23 ئازارى 2021، لە لێدوانێکیدا بۆ ڕۆژنامەى "سەباح"ى فەرمى عێراق کە "ناس کورد" بەدواداچوونى بۆ کردووە ئاماژەى بەوەکردووە، ئەو دەقە نوێیەى کە لە چوارچێوەى پڕۆژەى بودجەدا لەسەرى ڕێککەوتوون دوو پێشنیاز لەخۆ دەگرێت.

 

وتیشى، "هەرێم ئامادەیە یەکێک لەو دوو پێشنیازە جێبەجێ بکات کە رێککەوتنى لەسەر کراوە".

 

سەمیر هەورامى ئاماژەى بەوەشکردووە، شاندى هەرێم لەچەند رۆژى داهاتوودا دەگەڕێتەوە بەغدا بۆ دەستپێکردنەوەى دانوستانەکان و جێبەجێکردنى ئەوەى ڕێککەوتنى لەسەرکراوە، رێککەوتنەکەى لەگەڵ حکومەتى عێراق کە خراوەتە ناو پڕۆژەکەوە یان ئەو ڕێککەوتنەى لەگەڵ بەشێک لە کوتلە سیاسییەکان کراوە لەبارەى پشکى هەرێم.

 

جەختیشیکردەوە، حکومەتى هەرێم رەزامەندى خۆى نیشانداوە لەسەر جێبەجێکردنى ڕێککەوتنى پەیوەست بە پشکى هەرێم لە بودجە.