گه‌ڕان

Shadow Shadow
سیاسه‌تی

وردەکاریى

ئەبوبەكر هەڵەدنی بە گێڕانەوەیەكی برایم ئەحمەد بەرگری لە سەڵاحەدین دەكات

2021.03.22 - 14:42
App store icon Play store icon Play store icon
ئەبوبەكر هەڵەدنی بە گێڕانەوەیەكی برایم ئەحمەد بەرگری لە سەڵاحەدین دەكات

ناس کورد-

ئەبوبەکر هەڵەدنى، ئەندامى پەرلەمانى کوردستان لە فراکسیۆنى یەکگرتوو رایگەیاند "سەڵاحەدینى ئەیوبى شانازی مرۆڤایەتییە و دووجاریش شانازیە بۆ ئێمەی کوردی موسوڵمان".

 

کەناڵی ناس کورد لە تێلیگرام جۆین بکە   

 

ئەبوبەکر هەڵەدنى (22ى ئازارى 2021) لەمیانەى بڵاوکردنەوەى بابەتێک لە هەژمارى خۆى لە فەیسبوک کە "ناس کورد" بەدواداچوونى بۆ کردووە وەک وەڵامدانەوەى قسەکانى پیر لوقمان لەبارەى سەڵاحەدینى ئەیوبى ئاماژە بە وێناى ئەو سەرکردەیەى ئیسلام دەکات لە زمانى هەردوو کۆچکردووان ئیبراهیم ئەحمەد و دکتۆر عیزەدین مستەفا رەسوڵ و جەخت لەوە دەکات کە سەڵاحەدینى ئەیوبى شانازییە بۆ مرۆڤایەتى و بۆ کوردى موسڵمانیش دووجار شانازییە.

 

دەقى نوسینەکەى:

 

وێنای سەڵاحەدینی ئەیوبی  لەزمانی کۆچکردوان  مامۆستا ئیبراهیم ئەحمەدو دکتۆر عزەدین مستەفا ڕەسوڵەوە!؟

 

دووجاران ولەدوو دیداردا کە جارێکیان لەخزمەتی مامۆستا سەڵاحەدین بەهائەدین  ئەمینداری گشتی یەکگرتوو وجارێکی دی لەخزمەتی ڕۆژنامەنووس شێروان شەمێرانی چووینە خزمەت و دیداری  پڕۆفیسۆر دکتۆر عزەدین مستەفا رەسوڵ وئەم بەسەرهاتەی گێڕاینەوە:

 

(کەچوومە لەندەن لەمامۆستا ئیبراهیم ئەحمەدم پرسی چونکە پێش من لەبەریتانیا بوو،ووتم مامۆستا ئیبراهیم ئەم ئینگلیز وخۆرئاوایە کەپشتیوانی لەکورد ناکەن و قەوارەی بۆ دروست ناکەن هۆکارەکەی ئەوە نیە کەبەهۆی سەڵاحەدینی ئەیوبیەوە ڕقیان لەکورد بێت چونکە لەجەنگی خاچ پەرستاندا ئەوانی تێکشکاندوە.

 

لەوەڵامدا مامۆستا ئیبراهیم ئەحمەد ووتی نەخێر نەک هەر ڕقیان لەسەڵاحەدینی ئەیوبی نیە بەڵکو خۆشیان دەوێ و  وەک سەرکردەیەکی گەورەی مرۆڤایەتی بۆی دەڕوانن بەتایبەت لەبەر دووهۆکار کەپەیوەندی بەڕەوشتی بەرزی سەڵاحەدینەوە هەیە:

 

یەکەم :سەڵاحەدین لەجەنگدا دیلی نەکوشتوە.

 

دووەم :لەگەرمەی جەنگدا کە (ڕیتشارد قلب الاسد) فەرماندەی لەشکری خاچپەرستان نەخۆش کەوتوە سەڵاحەدین پزیشکی تایبەتی خۆی بۆناردووە تا چارەسەری بکات.

 

سەڵاحەدین شانازی مرۆڤایەتی

دووجاریش شانازیە بۆئێمەی کوردی موسوڵمان

ئەبوبەکر هەڵەدنی

٢٢ی٣ی٢٠٢١

 

پیر لوقمان کەریم کە خۆی بە پیرشالیار زەردەشتییەکان دەناسێنێت سوکایەتی بە سەڵاحەدینی ئەیوبی دەکات و دەڵێت، "وێنەیەکیم داناوە و هەموو ڕۆژێک سێ تفی لێ دەکەین."   

 

پیر لوقمان کەریم لە ڕاستەوخۆیەکیدا لە فەیسبوک لەبارەى مێژووی نەورۆز قسە دەکات و دەڵێت، کورد تاوەکو هاتنی ئاینی ئیسلامی ئاگری کردووەتەوە، بەڵام لەدوای هاتنی ئیسلامی سەرکردە موسڵمانەکان ئاگرکردنەوەى نەورۆزیان قەدەغە کردووە.   

 

پیر لوقمان لە قسەکانیدا زۆر بە توندی هێرش دەکاتە سەر سەرکردەی کورد و موسڵمانان سەڵاحەدین ئەیوبی و بە "خیانەتکار" ناوی دەبات و دەڵێت، "وێنەیەکی سەڵاحەدینی ئەیوبیمان داناوە و هەموو بەیانییەک سێ تفی تێ دەکەین، ئەمەش خوڕەوشی زەردەشتیانە."   

 

پیر لوقمان سەڵاحەدینی ئەیوبی تۆمەتبار دەکات بە "قەتڵ و عامکردنی" شوێنکەوتووانی زەردەشتی لە ناوچە جیاوازەکانی کوردستان.     

 

بەپێی ماڵپەڕی کوردپێدیا، پیر لوقمان لەساڵی 2015 بۆ یەکەم جار و پاش 1437 ساڵ دابڕانی کورد لە ئاینی زەردەشتی لە کوردستان، دەستی بەبانگەشەی ئاینەکەى کردووە و ناوەندی زەردەشتیانی دامەزراندووە و خۆیشی وەک ڕێبەری ئاینی زەردەشتی و وەک سەرۆکی ناوەندی زەردەشتیان لەژێر ناوی پیر لوقماندا لەناو زەمینەی کوردەواریدا ناسێندرا.