گه‌ڕان

Shadow Shadow
سیاسه‌تی

زانیاری زیاتر

لەدوای قسەکانی لەسەر سەڵاحەدینی ئەیوبی دوو سکاڵا لەسەر پیر لوقمان تۆماردەکرێت

2021.03.22 - 14:00
App store icon Play store icon Play store icon
لەدوای قسەکانی لەسەر سەڵاحەدینی ئەیوبی دوو سکاڵا لەسەر پیر لوقمان تۆماردەکرێت

ناس کورد-

 ‎بەڕێوەبەرایەتی پێکەوەژیانی ئایینى لە وەزارەتی ئەوقاف و کاروباری ئایین و سەرۆکئ فراکسیۆنی کۆمەڵ و سکاڵا لەسەر "پیر لوقمان" تۆماردەکەن، ئەوەش بەهۆی ئەو قسانەی لە چەند ڕۆژی ڕابردوودا لەسەر ئایینی ئیسلام و سەڵاحەدینی ئەیوبی کردبووی.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا نوسینگهەی عەبدولستار مەجید، سەرۆکی فراکسیۆنی کۆمەڵ (دووشەممە 22ی ئازاری 2021) ڕایگەیاند، "سەرۆکی فراکسیۆنی کۆمەڵ لە ڕێگەی داواکاری گشتییەوە سکاڵای یاسایی دژی (لوقمان) ناوێک دەجوڵێنێت کە خۆی بە (زەردەشتیی) ناساندووە و لە ڕۆژانی ڕابردوودا ئەوپەڕی سوکایەتی و بێڕێزی بە ئایینی ئیسلام و سەرکردەی مسوڵمانی کورد سەڵاحەدینی ئەیوبی کردبوو ."

 

لە دەقی سکاڵاکەدا هاتووە، " پاش ئەوەی کەسێک بەناوی لوقمان لە تۆڕی کۆمەڵایەتی ڤیدیۆیەکی خۆی بڵاوکردەوە کە تیایدا بەشێوەی وێنە و دەنگ سوکایەتی بە ئاینی پیرۆزی ئیسلام و سەرکردەی مێژویی کورد صلاح الدين الايوبي دەکات، بە مافی خۆمی دەزانم کە لەیەکەم ڕۆژی دەوامی فڕمی سکاڵای یاسایی لەسەر ناوبراو لە ڕێی داواکاری گشتیەوە تۆمار دەکەم بەپێی ماددەی 372 لە یاسای سزادان، هەمیشە سەرکەوتنیش لە خودای بەرزەوەیە."

 

هاوکات ‎بەڕێوەبەرایەتی پێکەوەژیانی ئایینى لە وەزارەتی ئەوقاف و کاروباری ئایینی ڕاگەیەنراوێکی لەوبارەیەوە بڵاوکردەوە و ڕایگەیاند، لەدوای پشووەکانی نەورۆز سکاڵا لەسەر "پیر لوقمان" تۆماردەکەن.

 

ئاماژەی بەوەشکردووە، "شانازییەکانی سەرجەم خەڵکی کوردستان و ئێمە بەتوندی ئیدانەی ھەرکەس ولایەنێک دەکەین کەبیەوێ بە وشە یان  توانج و قسەي نابەجێ  یان ھەرشێوەيەك لە شێوەكان ھەستی پێکھاتەیەکی تر  بریندار بکات."

 

ئەوەشی خستووەتەڕوو، "رۆژی ١٩ مانگي ئادار کەسێک کە لەدەرەوەی کوردستان نیشتەجێیە دوور لەبەھای پێکەوەژیان لەڕێگەی پەیامێکی ڤیدیۆیی ھێرشی کردووەتەسەر سەرکردەی مەزنی کورد و ئایینی پیرۆزی ئیسلام صلاح الدین ئەیوب لەوکاتەوە ئێمە لەگەڵ یەکێتی زانایاني ئاينی ئيسلامیی كوردستان و  لایەنە پەيوەنديدارە و یاساییەکان لەپەیوەندیداین بۆ گرتنەبەری رێکاری یاسایی پێویست، بەڵام بەھۆی پشووەکانی جەژنی نەتەوەیی نەورۆزەوە بۆ دوای پشوو رێکارەکانمان دواخست، لەگەڵ ئەوەش نوێنەری فەرمی  زەردەشتیەكان ئیدانەی کارەکەی کردوە و رایەگەیاند کە ئەو کەسە پەیوەندی بەوانەوە نیە دژی پێکەوەژیانی ئایینیە، بەڵام لێرەوە رادەگەێنین وێرای بەتوندی ئیدانەکردنی ئەم ھێرشە نارەوایە و بێ بنەمایە، کەسەگەورەکان بەم جۆرە قسانەی کەسانی کەم مەعریفە ناشکێن و بەڵکو زۆر گەورەتردەبن."

 

پیر لوقمان کەریم کە خۆی بە پیرشالیار زەردەشتییەکان دەناسێنێت سوکایەتی بە سەڵاحەدینی ئەیوبی دەکات و دەڵێت، "وێنەیەکیم داناوە و هەموو ڕۆژێک سێ تفی لێ دەکەین."  

 

پیر لوقمان کەریم لە ڕاستەوخۆیەکیدا لە فەیسبوک لەبارەى مێژووی نەورۆز قسە دەکات و دەڵێت، کورد تاوەکو هاتنی ئاینی ئیسلامی ئاگری کردووەتەوە، بەڵام لەدوای هاتنی ئیسلامی سەرکردە موسڵمانەکان ئاگرکردنەوەى نەورۆزیان قەدەغە کردووە.  

 

پیر لوقمان لە قسەکانیدا زۆر بە توندی هێرش دەکاتە سەر سەرکردەی کورد و موسڵمانان سەڵاحەدین ئەیوبی و بە "خیانەتکار" ناوی دەبات و دەڵێت، "وێنەیەکی سەڵاحەدینی ئەیوبیمان داناوە و هەموو بەیانییەک سێ تفی تێ دەکەین، ئەمەش خوڕەوشی زەردەشتیانە."  

 

پیر لوقمان سەڵاحەدینی ئەیوبی تۆمەتبار دەکات بە "قەتڵ و عامکردنی" شوێنکەوتووانی زەردەشتی لە ناوچە جیاوازەکانی کوردستان.    

 

بەپێی ماڵپەڕی کوردپێدیا، پیر لوقمان لەساڵی 2015 بۆ یەکەم جار و پاش 1437 ساڵ دابڕانی کورد لە ئاینی زەردەشتی لە کوردستان، دەستی بەبانگەشەی ئاینەکەى کردووە و ناوەندی زەردەشتیانی دامەزراندووە و خۆیشی وەک ڕێبەری ئاینی زەردەشتی و وەک سەرۆکی ناوەندی زەردەشتیان لەژێر ناوی پیر لوقماندا لەناو زەمینەی کوردەواریدا ناسێندرا.